Wo nas

Katolski Posoł je časopis katolskich Serbow, kotryž Towarstwo Cyrila a Metoda z.t. wudawa. W tydźeniku nańdu čitarjo duchowne impulsy, rozprawy wo cyrkwinskim žiwjenju we Łužicy, ale tež powěsće wo połoženju cyrkwje a podawkach na nabožnym polu zwonka njeje a po cyłym swěće. Zdobom jimaja so čitarjo sami słowa a swoje přinoški w nim wozjewja. Mnohim je časopis njeparujomny njedźelny přewodnik.

Spočatki časopisa

Prěnje čisło Katolskeho Posoła je w januaru 1863 pod redaktorom Michałom Hórnikom wušło. Spočatnje je časopis měsačnje wuchadźał, pozdźišo jako tydźenik.

Čas nacionalsocializma

Mjeztym dawno woblubowany časopis je jenož hač do 1939 wuchadźeć móhł. Po tym zo běchu nacionalsocialisća wuchadźenje druhich serbskich publikacijow hižo 1937 zakazali, potrjechi dwě lěće pozdźišo tutón dóńt tež Katolski Posoł.

Po Druhej swětowej wójnje

Po Druhej swětowej wójnje je Katolski Posoł wot decembra 1950 znowa wuchadźał – spočatnje zaso měsačnje, pozdźišo dwójce wob měsac. Prěnje lěta smědźachu so měsačnje jeničce štyri strony poćišćeć. Wot lěta 1953 wozjewjeja so w Posole prawidłownje tež fota. Strona SED pak njeda redaktorej dospołnu swobodu. Wona kontrolowaše wobsah a postaji zdobom, z kelko stronami smědźeše Katolski Posoł wuchadźeć. Prěni redaktor po wójnje a zdobom prěni lajk w tutej zamołwitosći bě wučer Michał Nawka z Radworja. Katolski Posoł so po lětach dale wuwiwaše – z wjetšim wobsahom a wot 1996 něšto razow wob lěto, wot 2010 stajnje w pisanym šaće z barbnymi fotami. Hdyž Posoł hač do 1988 hišće ze 144 stronami wuchadźeše, rozšěri so 1989 měsačnje wot 12 na 16 stronow. Wot septembra 1992 přichadźa Katolski Posoł zaso tydźensce do domjacnosćow we Łužicy a zwonka njeje. Wobjim je so wot přewrótoweho časa wjace hač podwojił na něhdźe 400 stron wob lěto.

Po politiskim přewróće

Hakle po politiskim přewróće bě móžno, Katolski Posoł zaso tydźensce wudawać. Wot 1992 je časopis nětko tydźenik, wot 2010 wuchadźa tež stajnje barbnje. Wot lěta 2008 prezentuje so časopis ze swójskej internetowej stronu zdobom w interneće.