Katolski Posoł – 9. julija 2023
Serbski duchowny pisa w swojim zawodnym nastawku wo tym, k čemu sćěhowace prózdninske tydźenje přeprošuja. Wón mjez druhim rozłoži, kotre pućowanje njetrjeba w tymle času wulke dyrdomdejstwa.
Tysacy młodych ludźi wobdźěli so na europskim swjedźenju před Drježdźanskej cyrkwju Našeje knjenje. Biskop Heinrich Timmerevers běše přeprošenje na njón tohorunja podpěrał a so z młodostnymi rozmołwjał.
Serbski duchowny prědowaše na putnikowanju składnostnje swjedźenja Marije wopytanja w Róžeńće wo tym, što je žórło wšeho žiwjenja. Boža mša bu prěni raz přez livestream wusyłana.
Wo swojim poměrje k domiznje rozmysluje serbski duchowny w swojim přinošku. K tomu pohnuł je jeho znaty serbski spěw.
Na zahrodźe Katolskeho dźěćaceho domu „Alojs Andricki“ poswjeći Radworski wosadny farar Beno Jakubaš swjaty křiž. W prěnjej połojcy 20. lětstotka steješe wón na wěži tamnišeje farskeje cyrkwje.
Ze swjedźenskej Božej mšu spominachu w Koćinje zhromadnje z biskopom Wolfgangom Ipoltom na 50. róčnicu poswjećenja tamnišeje kapałki. Něhdyši Zhorjelski generalny wikar přepoda wjesnjanam składnostnje tohole jubileja wosebity dar.
Claudia Kilankec z Chrósćic dźěła wot spočatka julija w Dekanatnym dušepastyrstwje za dźěći we Worklecach. W portreće wona mjez druhim praji, što budźe jeje hłowny nadawk.
Dźěłarnja za zbrašenych swjateho Michała w Pančicach-Kukowje poskićuje wot srjedź julija wosebity serwis. Za to požohnowa rjadniski duchowny tele dny nakładne koleso.
Tójšto hosći je swójbna njedźela w Smochčanskim kubłanišću swjateho Bena přiwabiła. Mjez druhim zahaji na nim hólči chór swoju lětnju koncertnu jězbu po Sakskej a Frankskej.
Dekanatne dušepastyrstwo młodźiny we Worklecach přeprošuje wšitkich młodostnych wot 8. lětnika kaž tež młodych dorosćenych na seksualnopedagogisku dźěłarničku WaageMut®. Wona wotměje so sobotu, 9. septembra, na „Radlubinje“ w Ralbicach. Přizjewjenja přijimuja hač do wutory, 8. awgusta.
Serbska dekanatna młodźina je tež lětsa na zhromadny wulět přeprošena. Tón budźe njedźelu, 3. septembra. Přizjewjenja přijimuja hač do wutory, 8. awgusta, online.
Budyski Serbski muzej změje w lětnich prózdninach wšelake poskitki za dźěći. Mjez druhim móža sej wone wobrazy z mozaika zhotowić abo so na šćežki wuměłcow po Budyšinje podać.
Na putnikowanje z kolesom přeprošuje Smochčanske kubłanišćo swjateho Bena wšitkich zajimcow wot njedźele, 24. septembra, do njedźele, 1. oktobra. Nawod změjetaj farar Thomas Cech ze Žitawy a Alojs Rječka z Łužnicy.
Serbska protyka
