Katolski Posoł – 9. februara 2025
Awtor w swojim zawodnym nastawku mjez druhim pisa, što při powołanju, dobre poselstwo wozjewjeć, na prěnim městnej njesteji. Zdobom wón rozłoži, čemu je kóždy křesćan powołany.
Biskop Heinrich Timmerevers je w Smochčanskim kubłanišću swjateho Bena nowu jednaćelsku hotelowu managerku witał. Za swoje dźěło móže wona z mnoho nazhonjenjow čerpać.
W Słonej Boršći bu swjaty křiž wonječesćeny. Hdy je so njeskutk stał runje tak kak wulki je rozměr škody, dotal jasne njeje.
Wotkazanju zbóžneho a swjateho, kotrejuž cyrkej 3. februara wopomina, wěnowaše so duchowny w swojim prědowanju w Radworju. Tam běchu so wěriwi ze serbskich wosadow na wopomnjenskim dnju serbskeho zbóžneho k zhromadnej Božej mši zhromadźili.
Wuměna wo zwjazanju cyrkwje, politiki a socialnych projektow stejše w srjedźišću zetkanja zapósłanče Sakskeho krajneho sejma Elaine Jenčec a nawodnicy Katolskeho běrowa Sakskeje dr. Daniely Pscheida-Überreiter. Mjez druhim wopytaštej wonej klóštersku dźěłarnju swjateho Michała w Pančicach-Kukowje.
Z Hózka pochadźacy Serb je nowy sobudźěłaćer Katolskeho kubłanja dorosćenych Sakskeje (KEBS). W přinošku awtor jeho a jeho nadawki bliže předstaji.
Tele dny skónči so prěnja doba předsydy Towarstwa Cyrila a Metoda z.t. (TCM) Cyrila Hančika. W interviewje z Katolskim Posołom wón na to wróćo zhladuje, zwuraznja pak tež swoje přeća za přichod TCM.
Z domyswjećenjom a kreatiwitu je dekanatna młodźina nowe lěto we Worklečanskim Don Boskowym domje zahajiła. Na nyšporje wustupi tež nowe hudźbne ćěleso.
Na njewšědne mjeno prodrustwa, kotrež něhdy w swojej wsy mějachu, pokaza awtor w jeho přinošku. Mjez druhim wón wuwjedźe, kak je k pomjenowanju dóšło.
Dźěłowe zjednoćenstwo za katolske kubłanje swójbow z.t. (AKF) poskićuje w póstnym času akciju „7 tydźenjow HAJ prajić“. Z tym přeprošuje pory, swoje partnerstwo wosrjedź wšědneho dnja wědomje skrućić. Tež sydomtydźenska wersija za swójby z dźěćimi w zakładnošulskej starobje eksistuje.
Pod hesłom „Chcu ći spěwać
a hrać“ wotměje so wot pjatka
do soboty, 14. do 16. měrca,
wosebite dalekubłanje
na polu cyrkwinskeje hudźby
w Smochčanskim kubłanišću
swjateho Bena. Pod nawodom
tachantskeho kapałneho
mištra Christiana Bonatha
skića dny bohaty kursowy
program za spěwarjow, instrumentalistow
a chórowych na wodow.
Sekcija wěda a skutk Towarstwa Cyrila a Metoda z.t. (TCM) přewjedźe wot póndźele, 29. septembra, do pjatka, 3. oktobra, wulět přez Helfta a Bad Frankenhausen do Heiligenstadta. Wottam poda so skupina na wšelake městna Eichsfelda kaž tež do Göttingena. Zajimcy měli so hač do pjatka, 28. februara, w redakciji Katolskeho Posoła přizjewić, telefonowe čisło (0 35 91) 55 02 10. Zdobom měli potom na konto TCM 200,00 eurow napłaćić.
„Wobchad z palnymi murjemi – wotmjezowanje a mjeza“ rěka hesło lětušeho Ekumeniskeho póstneho seminara w Smochčanskim kubłanišću swjateho Bena. Planowane su wospjet štyri zarjadowanja po štyrjoch póndźelach, kotrež wěnuja so temje ze towaršnostneho, sociologisko-cyrkwinskeho kaž tež bibliskeho wida.
Na poslednim zarjadowanju 13. kulturneje zymy w putniskej hospodźe Moniki Gerdesoweje w Chrósćicach přednošuje sobotu, 15. februara, w 19.45 hodź. Josef Heirich z Königsbrunna k putniskemu pućej w Awstriskej „Der Weg des Buches“. Hižo w 16.00 hodź. poskića hosćićelka serbske dźěćace kino. Wšitcy zajimcy su wutrobnje přeprošeni.
K temje „Pěši do Roma. Jurja Wawrikowy putniski dźenik z lěta 1842“ přednošuje dr. Lubina Malinkowa z Budyskeho Serbskeho instituta wutoru, 11. februara, w 19.00 hodź. na žurli Budyskeho Zwjazka archiwow na Hrodowej 12. Zastup je darmotny.
Pod hesłom „Pój, wjesel so!“ su dźěći 1. a 2. lětnika w zymskich prózdninach do Don Boskoweho domu we Worklecach přeprošene. Zarjadowani wotmějetej so po wutoromaj, 18. kaž tež 25. februara, wot 9.00 do 15.00 hodź. Přizjewjenje je hač do njedźele, 9. februara móžne. Njech so dźěći póstnisce předrasća.
Na serbsku putnisku jězbu do Weserskich horin wot póndźele do štwórtka, 14. do 17. julija, přeprošuje Radworske Šmitec-Schwarzec busowe wozydłownistwo. Duchowny nawod změje farar Gabriš Nawka. Přizjewjenja přijimuja w Radworju, telefonowe čisło (03 59 35) 28 60.
Ambulantna hospicna słužba Hornjołužiskeho zwjazka Carity
z.t. w Kamjencu poskićuje lětsa zaso kurs k čestnohamtskemu
přewodźenju ćežkochorych a mrějacych. Štóž chcył
wukubłanje absolwować, měł so pola hospicneje słužby
Carity w Kamjencu přizjewić.
Serbska protyka
