Katolski Posoł – 8. januara 2023
W aktualnym wudaću nańdźeće mjez druhim tole:
Z mnohimi Božimi słužbami w Rostocku a wokolinje je so 45. europske młodźinske zetkanje Taizéskeho zhromadźenstwa skónčiło. Na nim běše so tež 80 žonow a muži z wójnskeje kónčiny Ukrainy wobdźěliło.
Prědowanje němskeho duchowneho w hodownej nocy w Kulowje a na to sćěhowaca peticija wubudźatej we wosadźe rozdźělne měnjenja. Reagowali pak su na to po wšej Němskej.
Po dwurěčnej wsy běchu w minjenych dnjach swjeći třo kralojo po puću. Iniciatiwa wuńdźe ze swójbneho kružka, kotryž běše ideju spontanje zrodźił.
Swěčku z překwapjenku dóstachu swójby, kotrež wobdźělichu so na hodownej hrě w Ralbičanskej cyrkwi. Předstajili běchu ju wosadni nimale wšěch generacijow.
Mjez druhim wozjewi chór jandźelow patoržicu w Radworskej wosadnej cyrkwi poselstwo wo narodźe Jězu Chrysta. Hodownu hru předstajichu młodostni wosady.
Po mnohich organizatoriskich wužadanjach móžachu dźěći patoržicu w Róžeńčanskej swjatnicy hodownu hru předstajeć. Stało je so, štož su hrali: Hodowny to dźiw.
Wo aspektach křćeńcy a kak móžeš jako křćeny žiwy być, pisa awtor w swojim nastawku. Je to dalši dźěl swojeje serije „Wěra praktisce“.
W Chrósćicach mějachu wěriwi loni wosebitu Božu nóc. Přetwara swojeje wosadneje cyrkwje dla swjećachu ju pod hołym njebjom.
Wo swojich dožiwjenjach w hodownych prózdninach rozprawjataj Hańžka a Feliks. Zdobom dźěći zhonja, kotre pjeć swjedźenjow so hnydom na prěnim dnju lěta swjeća a što mějachu w hodownym hódančku wuhódać.
Serbske spěwne ćěleso wuhotowa w połnje wobsadźenej Róžeńčanskej cyrkwi swój hodowny koncert. W swojim rozmyslowanju wěnowaše so rěčnica prašenju, kak hodźa so tež ćežke nadawki přiwzać.
Po hesłom „rozMYSLOwanje“ wotměje so w Lipšćanskim Schumannowym domje sobotu, 14. januara, w 19 hodź. wosebity koncert na spočatku noweho lěta. Na nim zaklinča prapremjery serbskich komponistow. Wuměłski nawod změje Heidemarija Wiesnerec. Samsny koncert wotměje so mjez druhim sobotu, 21. januara, w Budyskim Serbskim muzeju a njedźelu, 22. januara, w 16 hodź. na žurli Wojerowskeho hrodu.
„Kak móžu to jenož rozrisać?…“ rěka hesło kursa k praktiskej žiwjenskej pomocy a sebjespóznaću, kotryž budźe wot pjatka do njedźele, 3. do 5. februara, w Smochčanskim kubłanišću swjateho Bena. Zajimowani su přeprošeni, swoje wosobinske prašenja z pomocu systemiskich nastajenjow wobdźěłać.
Smochčanske kubłanišćo swjateho Bena přeprošuje na dny rozpominanja filma. Wone wotměja so klětu wot pjatka do njedźele,
20. do 22. januara.
Klóšter Marijina hwězda w Pančicach-Kukowje pyta za putnisku cyrkej w Róžeńće wosobu, kotraž chcyła nadawki zwóńka a rjedźerskeje mocy přewzać. Zajimcy měli so tak spěšnje kaž móžno přizjewić.
Serbska protyka
