Katolski Posoł – 8. decembra 2024
Rozsudźić so, kotre wołanje chceš sćěhować, móže wužadace być. Kak zamóže ewangelij tuteje njedźele při tym pomhać, pisa awtor w swojim zawodnym nastawku.
Dotal njepřistupne městna su ministranća farskeje wikarije w Pančicach-Kukowje w tamnišim klóštrje Marijina hwězda wopytać móhli. Wone zetkachu so tam krótko do prěnjeho adwenta k zabawnemu popołdnju.
Cyrkej je na někotrymžkuli polu moderniša, hač sej mnozy mysla. Jako přikład předstaja awtor awtomatisce zhotowjene serbske podtitule za kemše, kotrež so jako livestream wusyłaja.
Na pozabyty titul pokłada serbskeje cyrkwinskeje hudźby skedźbnja awtor w swojim přinošku. Jón nańdźeš drje tež w tučasnje wužiwanym Wosadniku, ale nic w cyłku pod poprawnym zapřijećom.
Ze swójskimaj programomaj wuhotowaštej chór dorosćenych kaž tež dźěći wosadneje šole tradicionalne popołdnjo za seniorow w serbskej wosadźe. Zdobom přitomni z pomocu wobrazow zhonichu, što běše so minjene lěto wšitko we wosadźe stało.
Hodowny dar za swojich swójbnych abo přećelow zbliska a zdaloka móhła serbska abo dwurěčna kniha być. Katolski Posoł je někotre z nabožnym abo duchownym pozadkom zestajał.
Worklečanske dekanatne dušepastyrstwo za młodźinu je z jednotliwymi młodostnymi wšelake impulsy spřihotowało, kotrež zaběraja so z prašenjemi wěry. Zaměr je, kóždu adwentnu njedźelu z pomocu třoch tajkich na wšelake wosoby abo aplikacije w cyrkwi pokazać, kotrež so rozdźělnym temam kołowokoło wěry wěnuja. Tónraz předstaja Passauskeho biskopa Stefana Ostera kaž tež aplikaciju „Hallow“ a pokazaja na přednošk dr. Johannes Hartla, załožerja Augsburgskeho modlerskeho domu.
Žiwjenju swjateho Franca Assisiskeho, předstajenemu na sćěnach křižneje chódby něhdyšeho klóštra a nětčišeho kubłanskeho, konferencneho a putniskeho centruma w sewjernej Čěskej, wěnujetaj so awtoraj w nowej publikaciji „SANCTE FRANCISCE ORA PRO NOBIS – Život světce na lunetách hejnického kláštera / Das Leben des Heiligen in den Lünetten des Haindorfer Klosters“. W redakciji Katolskeho Posoła někotre eksemplary předleža, hdźež móža sej zajimcy knihu za 16,00 eurow kupić.
W putniskej hospodźe w Hirschfeldźe su hač do swjedźenja Předstajenja Knjeza, pjatk, 2. februara, zaso Bože narodki wustajene. Mjez tajkimi, kiž słušeja hižo ke krutemu inwentarej, maja tam tež lětsa zaso nowe.
Drježdźanski komorny chór Ad libitum wuhotuje njedźelu, 8. decembra, w 16.30 hodź. pod hesłom „Adwent“ hudźbny koncert w cyrkwi klóštra Marijineje hwězdy w Pančicach-Kukowje. Wšitcy su wutrobnje přeprošeni.
Drježdźanscy Kapałnicy koncertuja tutu njedźelu, 8. decembra, w Baćońskej cyrkwi Jězusoweje wutroby. Započatk je w 17.00 hodź.
Dekanatne dušepastyrstwo za młodźinu přeprošuje młodych dorosćenych na kubłanski dźeń z kapłanom Florianom Mrózom. Tón budźe njedźelu, 29. decembra, wot 10.00 do 18.00 hodź. Přizjewjenje přijimuje dekanatne dušepastyrstwo hač do njedźele, 8. decembra, online.
Dekanatne dušepastyrstwo za dźěći přeprošuje šulerjow 6. do 8. lětnika do Don Boskoweho domu we Worklecach na kreatiwnu dźěłarničku, kotraž budźe sobotu 14. decembra. Wobdźělić móža so pak dopołdnja wot 9.30 do 12.00 hodź. abo popołdnju wot 13.00 do 15.30 hodź. Přizjewjenja přijimuja online hač do póndźele, 9. decembra. Ličba městnow je wobmjezowana.
Na pišćelowy koncert z cyrkwinskohudźbnym direktorom Friedemannom Böhme su wšitcy zajimcy do Chróšćanskeje wosadneje cyrkwje přeprošeni. Tón budźe třeću adwentnu njedźelu, 15. decembra, w 17.00 hodź. Zastup je zadarmo, kolekta budźe za ponowjenje pišćelow.
Na adwentne wiki su wopytowarjo sobotu, 14. decembra, wot 10.00 do 18.00 hodź. do klóštra Marijineje hwězdy prošeni. Mjez druhim poskića hodowne štomy, Ochranowske hwězdy a swójske wudźěłki kaž wšelake likery, sele a wolije, kotrež klóšterske sotry same zhotowjeja.
Třeći adwentny koncert Čěskeje telewizije wotměje so třeću adwentnu njedźelu, 15. decembra, w 17.30 hodź. w klóšterskej cyrkwi Marije donjebjeswzaća w Oseku. Zastup je darmotny, přiwšěm pak měli zajimcy zastupne lisćiki rezerwować. Koncert přenjesu tohorunja jako livestream.
Poslednje lětuše zarjadowanje we wobłuku 13. kulturneje zymy w putniskej hospodźe Moniki Gerdesoweje w Chrósćicach budźe sobotu, 14. decembra. Ulrike Flämig z Berlina porěči k temje „Spjećujemy so njepřećeljo być – Tent of Nations – měrowy projekt z Betlehema“. Tent of Nations rěka stan narodow. Započatk je w 19.45 hodź. Hižo w 16.00 hodź. poskićuje hosćićelka serbske dźěćace kino.
Budyski Serbski ludowy ansambl (SLA) předstaja swój rejowanski kruch „Smy! – Bin ich?“, zaběracy so z identitu, sobotu, 14. decembra, w 19.30 hodź. kaž tež njedźelu, 15. decembra, w 17.00 hodź. na swojej žurli. Wustajeńcu, kotruž stej Hella Stoleccyc a Karoline Krawcec k tomu zestajiłoj, móža sej zajimcy hišće hač do pjatka, 31. januara, stajnje wutoru a srjedu wot 14.00 do 17.00 hodź. w SLA wobhladać.
Katolski dźěćacy dom w Budyšinje,
kotryž je w nošerstwje Budyskeje tachantskeje wosady swjateho Pětra, pyta tak spěšnje kaž móžno kubłarja abo socialneho pedagogu. Wuměnjenje mjez druhim je, zo identifikuje so wosoba z pedagogiku Marije Montessori a křesćanskej wučbu.
Spirituelnu zwukowu instalaciju wo psalmje 23 móža wopytowarjo po lěće 2021 znowa w Rakečanskej ewangelskej cyrkwi dožiwić. Wona je hač do njedźele, 2. februara, přistupna. Psalm wo dobrym pastyrju předstajeja w modernym wobdźěłanju a ze swětłowymi efektami. Wopytowarjo smědźa so, na hudźbu słuchajo, po cyrkwi pohibować. Boži dom je wšědnje wot 9.00 do 20.00 hodź. přistupny.
Comic wo influenceru Božim, kotryž ma so bórze swjatoprajić, předleži wotnětka tež w serbskej rěči. Kniha z krutej wjazbu je na wšitkich katolskich farach na předań a płaći 15,00 eurow.
Klětu přeprošuje dušepastyrstwo młodźiny we Worklecach wospjet na seminaraj k přihotej na sakrament mandźelstwa. Wonej wotmějetej so stajnje pjatk a sobotu, 7. a 8. februara kaž tež 28. a 29. nowembra, w Smochčanskim kubłanišću swjateho Bena. Přizjewjenja přijimuje dekanatne dušepastyrstwo hač do srjedy, 8. januara, online.
Worklečanske młodźinske dušepastyrstwo přewjedźe klětu zaso kurs JULEICA. Wukubłanje wobsteji z dweju dźělow a wotměje so stajnje wot pjatka do njedźele, 4. do 6. apryla, kaž tež wot 25. do 27. apryla, w Smochčanskim kubłanišću swjateho Bena, tam z přenocowanjom. Kompletne wukubłanje je darmotne.
Serbska protyka
