Katolski Posoł – 7. julija 2024
Wo wuprajenju z pohanskeje antiki rozmysluje serbski duchowny w swojim zawodnym nastawku. Mjez druhim wón zwuraznja, što wěra křesćana w tutym zwisku wuči.
Němska biskopska konferenca je statistiku katolskeje cyrkwje za lěto 2023 wozjewiła. Nimo často spadowaceje tendency ličby w napřećiwnym směrje tu a tam tež pozitiwnje překwapja. Statistika ke katolskim serbskim wosadam je w časopisu wozjewjena.
Wěriwi ze wšitkich serbskich wosadow swjećachu na swjedźenju Marije wopytanja zhromadnje Božu mšu w Róžeńčanskej putniskej cyrkwi. Mnozy běchu so pěši w procesionach na puć podali.
Po wjelelětnym skutkowanju we Łužicy je so serbski organist ze swojej domiznu rozžohnował. Cyle parować pak ju na swojim nowym městnje skutkowanja njetrjeba.
Wo swojich dožiwjenjach na nabožnym tydźenju pisatej wobdźělnicy z Budyšina a Rakec. Tón měješe móhłrjec tež mały ekumeniski raz.
We wobłuku Budyskeho pišćeloweho lěća w tachantskej cyrkwi swjateho Pětra koncertuje srjedu, 10. julija, z Baćonja pochadźacy wjelelětny organist Berlinskeje katedrale Tomaš Žur. Započatk je w 19.30 hodź.
Budyski Serbski muzej poskićuje w lěćnych prózdninach wšelake poskitki za dźěći. Mjez druhim podadźa so na „Slědy serbskich bajow“, zaběraja so ze žiwjenjom w měsće přichoda a zhotowja sej mozaikowe wobrazy.
Na zahrodźe klóštra Marijineje hwězdy w Pančicach-Kukowje dožiwja wopytowarjo sobotu, 20. julija, wot 19.00 hodź. zaso „Nóc tysac swěčkow“. Hač do zaswěćenja swěčkow budźe pisany program na jewišću.
Pod hesłom „Što tam spěwa, lěta, šumi?“ přeprošuje sekcija Swójba Towarstwa Cyrila a Metoda z.t. (TCM) w kooperaciji z Dekanatnym dušepastyrstwom za dźěći na zhromadny dźeń za šulerjow wot 4. do 6. lětnika w Njeswačanskim hrodźe. Tón budźe sobotu, 10. awgusta, wot 10.00 do 14.00 hodź.
Kubłanske dny serbskeje młodźiny wotměja so wot pjatka do njedźele, 27. do 29. septembra, w ponowjenym Schmiedebergskim Winfriedowym domje. Wobdźělnicy změja składnosć po přirodźe pućować, so zhromadnje modlić a spěwać kaž tež duchownje so posylnjeć. Zajimcy měli so hač do póndźele, 29. julija, online přizjewić.
Pod hesłom „Kreuz und quer“ su młodostni na diecezanske zetkanje młodźiny do Wechselburga přeprošeni. Wone budźe pjatk a sobotu, 13. a 14. septembra, w tamnišim klóštrje. Serbscy wobdźělnicy móža sej tam zhromadnje dojěć. Přizjewić móža so hač do soboty, 24. awgusta, online.
Wulět dekanatneje młodźiny budźe sobotu, 24. awgusta. Přeprošeni su młodostni wot přichodneho 9. lětnika kaž tež młodźi dorosćeni. Přizjewjenja přijimuja hač do srjedy, 7. awgusta, online.
Drježdźansko-Mišnjanske biskopstwo přeprošuje wěriwych we wobłuku Swjateho lěta na diecezanske putnikowanje z biskopom Heinrichom Timmereversom do Roma. Wone wotměje so wot soboty do soboty, 11. do 18. oktobra 2025.
Chróšćanska wosada so tuchwilu na swoju 800. róčnicu prěnjeho naspomnjenja klětu přihotuje. K jubilejej ma w meji 2025 w Budyskim Ludowym nakładnistwje Domowina (LND) kniha wuńć. LND prosy wšitkich, kotřiž maja dotal njeznate historiske fota ze žiwjenja w Chrósćicach a wokolnych wsach – wosebje fota hač do Druheje swětoweje wójny a z NDRskeho časa –, so přizjewić.
Serbska protyka
