Katolski Posoł – 6. awgusta 2023
Čłowječe žiwjenje njeje statiske, ale skerje na něšto trajne wusměrjene, pisa awtor zawodneho nastawka. Wón mjenuje to metamorfozu a skedźbnja při tym na ikonu.
Hłownu modlitwu na kemšach spěwaše měšnik na swjedźenju swjateje Hany w Jablonecu nad Nisou w serbskej rěči. Awtor wopisuje zdobom dóńt a wožiwjenje tohole Božeho domu w sewjernej Čěskej.
Znaty serbski pućowar poby w Indoneskej. Wón wopisuje nabožiny a smjertne kulty w tutym juhowuchodoaziskim kraju.
Prěnje zaćišće ze swětoweho zetkanja młodźiny podawa přisłušna serbska referentka. Tójšto prašenjow mějachu w Portugalskej dla jednoho serbskeho utensila.
W Čěskej je dwurěčna kniha wo legendźe putniskeho městna Hejnice wušła. Zajimcy móža ju přez Katolski Posoł dóstać.
Druhi dźěl konferency wo žiwjenju a skutkowanju biskopa Christiana Schreibera wotměje so składnostnje jeho 90. posmjertnin wot pjatka do soboty, 1. do 2. septembra, w Berlinskej Katolskej akademiji. Prěni dźeń, kotryž je zdobom smjertny dźeń biskopa Schreibera, chcetaj Berlinski arcybiskop Heiner Koch a Drježdźansko-Mišnjanski biskop Heinrich Timmerevers, wopomnjenske kemše swjećić.
Smochčanski kubłanski dom swjateho Bena poskići wot srjedy do pjatka, 13. do 15. septembra, seminar, w kotrymž móža ludźo na stres, wysoke wužadanja abo žiwjenske krizy wotpowědnu podpěru z pomocu reziliency dóstać. Přizjewjenja su hač do srjedy, 23. awgusta, móžne.
Na kongres Adoratio – rěčenje
wo a modlenje před Najswjećišim
– su wěriwi a zajimcy
sobotu a njedźelu, 19. do
20. awgusta, do Noweje Cale
přeprošeni. Přizjewjenja přijimuja online.
Dekanatne dušepastyrstwo młodźiny we Worklecach přeprošuje wšitkich młodostnych wot 8. lětnika kaž tež młodych dorosćenych na seksualnopedagogisku dźěłarničku WaageMut®. Wona wotměje so sobotu, 9. septembra, na „Radlubinje“ w Ralbicach. Přizjewjenja přijimuja hač do wutory, 8. awgusta.
Serbska dekanatna młodźina je tež lětsa na zhromadny wulět přeprošena. Tón budźe njedźelu, 3. septembra. Přizjewjenja přijimuja hač do wutory, 8. awgusta, online.
Na putnikowanje z kolesom přeprošuje Smochčanske kubłanišćo swjateho Bena wšitkich zajimcow wot njedźele, 24. septembra, do njedźele, 1. oktobra. Nawod změjetaj farar Thomas Cech ze Žitawy a Alojs Rječka z Łužnicy.
Serbska protyka
