Katolski Posoł – 5. nowembra 2023
Kajka měła cyrkej być, kotraž wot Jězusa wuchadźa, pisa awtor w swojim zawodnym nastawku. Zdobom wón wuswětla, za čim móžeš w Nowym zakonju podarmo pytać.
W Romje zakónčichu prěni dźěl swětoweje synody. W zhromadnym wozjewjenju su na njej wobdźěleni biskopja a lajkojo teologiske a cyrkwinskoprawniske změny nastorčili.
Modlitwa maćeri Božej, kralownje měra
Z namołwu, zo měli zapalerjo wěry być, nawróći so 46 wěriwych Radworskeje wosady kaž tež z druhich wosadow z Roma. We wobłuku putniskeje jězby do Wěčneho města pak njewotkrychu sej jeničce Vatikan a italsku stolicu.
Serbska wosada je swojemu duchownemu składnostnje jeho kulowatych narodnin swjedźeń wuhotowała. Při jednym z programowych dypkow bu jubilar tež sam aktiwny.
Jónkrótny a swjatočny wokomik dožiwi 22 młodostnych we Wotrowje. Jim běše biskop Heinrich Timmerevers sakrament swjateho firmowanja spožčił.
Młodostny pisa, što začuwaše, jako dósta w Chrósćicach sakrament swjateho firmowanja. Tón přija wón zhromadnje z 41 dalšimi młodostnymi.
Z wěstej katolskej podpěru je znowa kniha za serbskich ewangelskich křesćanow wušła. Na Božej słužbje tutu njedźelu w Budyskej Michałskej cyrkwi ju prěni raz swjatočnje wužija.
Něhdyši abt cistercienskeho klóštra Marienstatt juhowuchodnje Kölna běše tež z łužiskimaj klóštromaj zwjazany. Nětko je wón na prawdu Božu wotešoł.
Pod hesłom „Za žiwjenje wažne“ je Smochčanske kubłanišćo swjateho Bena swój program wot nowembra hač do klětušich jutrow wozjewiło. Dohromady
planuja 20 zarjadowanjow.
Wo pozadku nałožka na swjateho Měrćina, kotryž je pola dźěći woblubowany, pisataj Hańžka a Feliks. A štóž nima hišće latarnju za lampionowy ćah, nańdźe na samsnej stronje kaž tež w interneće pokiw a móže sej ju hišće spaslić.
Na městna a aktiwity katolskeje cyrkwje w Němskej pokazuje nowy biskopstwowy atlas. Wón wopřija wjace hač 36.000 katolskich zarjadnišćow a je online přistupny.
Dekanatne dušepastyrstwo
přeprošuje wšitke dźěći,
kotrež so na prěnje swjate
woprawjenje přihotuja,
na zhromadny dźeń srjedu,
22. nowembra, wot 9.00 do
15.00 hodź. do Njebjelčic.
Přizjewjenja přijimuja hač do srjedy, 8. nowembra,
online.
Seminary k přihotej na sakrament mandźelstwa wotměja so klětu stajnje pjatk a sobotu, 16. a 17. februara, 26. a 27. apryla kaž tež 29. a 30. nowembra w Smochčanskim kubłanišću swjateho Bena. Přizjewjenja přijimuja hač do srjedy, 17. januara.
„Žiwy być kaž w paradizu?!“ rěka hesło kubłanskeho dnja, na kotryž přeprošuje dekanatne dušepastyrstwo wšitkich młodostnych a młodych dorosćenych w starobje wot 18 do 30 lět. Wón wotměje so sobotu, 6. januara 2024, w Ewangelskim centrumje za dźěći a młodźinu TiK w Budyšinje.
Worklečanske młodźinske dušepastyrstwo přewjedźe klětu zaso za zajimcow kurs JULEICA. Wukubłanje wobsteji z dweju dźělow a wotměje so stajnje wot pjatka do njedzele z přenocowanjom w Smochćicach. Prěni termin budźe hižo wot 19. do 21. januara, a nic kaž dotal wozjewjene spočatk februara. Druhi dźěl sćěhuje wot 26. do 28. apryla.
Serbska protyka
