Katolski Posoł – 5. měrca 2023
W aktualnym wudaću nańdźeće mjez druhim tole:
Wo čłowječim zmysle, kotryž je bytostny w žiwjenju, pisa awtorka zawodneho nastawka. Pokazujo na čitanja tuteje njedźele wona k tomu pohnuwa, jemu w swojim žiwjenju wjace kedźbnosće dać.
W Drježdźanach zetkachu so čłonojo Němskeje biskopskeje konferency k swojej nalětnjej plenarnej zhromadźiznje. Biskopja rozjimachu w tych dnjach kontrowersne naležnosće. Zahajenske kemše mějachu tež serbske elementy.
Jedne z Jězusowych napominanjow steji w srjedźišću dalšeho dźěla póstneje serije k sydom skutkam ćělneje miłosće. Wone je zdobom jedne z hłownych nadawkow cyrkwje.
Jedna z móžnych wotmołwow na palace prašenja moderneho časa běše hesło prěnjeho póstneho seminara w Smochćicach. Referent poda přitomnym štyri tezy jako nastork, dale wo temje swojeho přednoška rozmyslować.
Kak Jězus k čłowjekam rěči a što ma wěste wobchadne znamješko z tym činić? Wo tym pisataj Hańžka a Feliks. Zdobom namakaja dźěći k tomu wotpowědne hódančko.
Žiwjenju katolskich Serbow budźe so nowa wosebita wustajeńca wěnować, kotraž budźe wot meje w Budyskim Serbskim muzeju přistupna. Za nju chcedźa tež fotowu přehladku zhotowić. Hač profi abo lajk – kóždy móže swój foto zapodać.
Z wopomnjenskim zarjadowanjom hódnoćeše Hodźijska ewangelska wosada serbskeho duchowneho, kotryž běše z ćěłom a dušu horliwy a přećelny Serb. Wón běše před sto lětami zemrěł.
K dnjam rozpominanja a nutřkowneho přihota na martrowny tydźeń přeprošuja sotry klóštra Marijineje hwězdy wot pjatka do njedźele, 31. měrca do 2. apryla. Ličba wobdźělnikow je na dwanaće wosobow wobmjezowana.
„Křesćanske orientacije na prašenja našeho časa“ rěka hesło lětušeho Ekumeniskeho póstneho seminara w Smochčanskim kubłanišću swjateho Bena. Dalše zarjadowanje pod temu „Wšo wěrne žiwjenje je zetkanje“ wotměje so póndźelu, 6. měrca.
Dekanatne dušepastyrstwo za dźěći přeprošuje šulerjow 4. a 5. lětnika na zhromadny dźeń pod hesłom „Połčas“. Zarjadowanje wotměje so sobotu, 18. měrca, we Worklečanskim Don Boskowym domje.
Serbska protyka
