Katolski Posoł – 4. septembra 2022
Što woznamjenja mudrosć? Z tym zaběra so awtor w swojim zawodnym nastawku. Při tym rozmysluje wón wo starozakonskim čitanju tuteje njedźele a pisa tež wo słowach, kotrež njejsu po waze přećežke.
Dwaceći duchownych je bamž Franciskus we Vatikanje ke kardinalam katolskeje cyrkwje pozběhnył. Zdobom wuradźowachu přitomni wo reformje kurije.
Pod hesłom „Lubosć Chrystusowa pozbudźa, wujednawa a zjednoća swět“ schadźuje so wot srjedy do štwórtka, 31. awgusta do 8. septembra, w Karlsruhe Ekumeniska swětowa cyrkwinska rada (ÖRK) k swojej 11. plenarnej zhromadźiznje. Mjez něhdźe 4.000 wobdźělnikami z wjace hač 100 krajow je tež Serbowka.
Městno zetkawanja mjez čłowjekami, kotrehož natwar je tež serbske towarstwo sobu podpěrało, je swjećacy biskop litawskeho arcybiskopstwa we Wojdatach poswjećił. Tam skutkuje duchowny, kotryž njeje w Serbach njeznaty. Mjez přitomnymi wěriwymi běchu zdobom někotři z Łužicy.
Po nimale dwaceći lětach je zaso Serbowka wěčne sluby złožiła. Wona přisłuša Šulskim sotram našeje lubeje knjenje. Jako rjadniske mjeno nosy wona předmjeno serbskeho zbóžneho. Mjez koncelebrantami swjatočneje Božeje mšě běchu tež duchowni z jeje domizny.
Wo swojich dožiwjenjach w lětnich prózdninach rozprawjataj Hańžka a Feliks. Dźěći zhonja pak tež tójšto zajimaweho k pismikam kaž tež pismikowym znamjenjam a kak móža někomu tajnu powěsć sposrědkować.
W klóštrje Marijinej hwězdźe w Pančicach-Kukowje wotměje so njedźelu, 9. oktobra, modlerske zetkanje za Drježdźansko-Mišnjanske biskopstwo. Wone steji pod hesłom „Symanje, lubuješ mje?“.
Hnydom dwójce změje historiska hra „Mór a lubosć“ w septembru w Chrósćicach premjeru. Wjace hač 130 wosobow předstaji žiwjenje před 600 lětami.
Kulowska katolska wosada Marije donjebjeswzaća pyta wosobu, kotraž by po móžnosći hnydom hłownohamtsce městno cyrkwinskeho hudźbnika přewzała. Zajimcy měli so pola fararja dr. Wolfganga Křesáka přizjewić.
Kubłanske dny serbskeje młodźiny wotměja so wot pjatka do njedźele, 23. do 25. septembra. w Schmiedebergskim Winfriedowym domje. Zajimcy měli so hač do póndźele, 5. septembra, online přizjewić.
Smochčanske kubłanišćo swjateho Bena přeprošuje wot pjatka do njedźele, 14. do 16. oktobra, na tworjacy kurs „Bibliske powědace figury“. Při tym dźe wo bibliske powědace figury, kotrež mnohostronske gesty zwuraznjeja a kotrež hodźa so lochce do druheje postawy přetworić. Přeprošeni su ludźo kóždeježkuli staroby.
Na katolskej žurnalistiskej šuli ifp w Mnichowje zahaji so klětu nalěto nowy kurs žurnalistiskeho wukubłanja paralelnje k studijej. Wón traje tři lěta, w kotrychž nawuknu zajimcy zakłady žurnalizma. Požadanja přijimuja hač do 20. septembra.
W Kulowje zhladuje tamniše Arcybratstwo swjateho róžowca lětsa na 350. róčnicu swojeho załoženja. Składnostnje tutoho jubileja ma wustajeńca nastać, za kotruž móža wěriwi wosebite róžowcy abo napisane wosobinske nazhonjenja z modlenjom róžowca na tamnišej farje wotedać.
Serbska protyka
