Katolski Posoł – 4. junija 2023
Wo swjedźenju tuteje njedźele a što ma tón z wažnym symbolom křesćanskeje wěry činić, rozmysluje serbski duchowny w swojim zawodnym nastawku. Zdobom wón pisa, komu čłowjek wšojedny njeje.
Korpus ze serbskeje wosady je serbski cyrkwinski chór w zapadnej Sakskej našoł. Spěwne ćěleso přewjedźe tam swoje třidnjowske probowe lěhwo.
Na kotrym wulkim swjatym dnju njeměł katolski křesćan jeno hósć na kromje być. Wo tym pisa serbski duchowny w dalšim dźělu swojeje serije „Wěra praktisce“. Mjez druhim wón wažny wobstatk tohole swjedźenja wuswětla.
Kotry nadawk křesćanow njeměł so na hrački stajić, rozłoži serbski kapłan swjatkownu póndźelu w Róžeńće. Wěriwi ze wšitkich serbskich wosadow swjećachu tam zhromadnje putnisku Božu mšu. Mnozy běchu so pěši na hnadowne městno podali.
W Smječkecach su wobydlerjo a přistajeni Domu swjateho Jana kaž tež hosćo mejski nyšpor swjećili. Hižo do toho powalichu swoju meju a wuzwolichu mejsku kralownu a mejskeho krala.
Wo kralowskim porje a wysokim swjedźenju, kotraž cyrkej spočatk junija swjeći, powědataj Hańžka a Feliks. W memoryju móža so dźěći tohorunja bliže z nim zaběrać. Hru móža na dwoje wašnje hrać.
Prěnja kolesowarska tura pod hesłom „Klóšterski kraj – serbski raj“ pod nawodom Tadeja Šimana powjedźe sobotu, 10. junija, na Wotrow do južneho dźěla klóšterskich kónčin. Započatk něhdźe 25 kilometrow dołheje tury je w 10 hodź. na parkowanišću w Hornim Wujězdźe. Njech sej kóždy něšto k jědźi a k piću sobu přinjese. Po móžnosći měli so zajimcy do toho přizjewić – pak w interneće na stronje www.sorbisches-museum.de pak telefonisce w Budyskim Serbskim muzeju pod čisłom (0 35 91) 2 70 87 00.
Lětuše putnikowanje serbskeje dekanatneje młodźiny do Róžanta budźe njedźelu, 4. junija. Młodostni njech so dojednaja, hač chcedźa so jako wosadna młodźina sami do Róžanta podać abo hač přiwozmu poskitk zhromadneho putnikowanja z Worklec. Wšitcy, kiž chcedźa wottam putnikować, zetkaja so w 9.00 hodź. w tamnišej kapałce. Wotchad procesiona je w 9.15 hodź. Boža mša w Róžeńće budźe w 10.30 hodź. Po kemšach so młodostni w procesionje do Worklec nawróća. Ći, kotřiž su so za Swětowe zetkanje młodźiny w Lissabonje přizjewili, wostanu w Róžeńće. Za nich přizamknje so tam předzetkanje. Młodostni njech přinjesu sej swój młodźinski baner sobu.
K modlenju a na Bože mšě před kopiju postawy sławneje Fatimskeje putniskeje madony su wěriwi w juniju w Drježdźansko-Mišnjanskim, Zhorjelskim a Litoměřickim biskopstwje přeprošeni. Mjez druhim budźe postawa w putniskej cyrkwi w Róžeńće, w cyrkwi Marije donjebjeswzaća w Kulowje kaž tež w klóšterskej cyrkwi klarisow w Budyšinje.
Worklečanske młodźinske dušepastyrstwo přewjedźe klětu zaso za zajimcow kurs JULEICA. Wón wobsteji z dweju dźělow a wotměje so stajnje wot pjatka do njedźele, 2. do 4. februara, kaž tež wot 26. do 28. apryla, w Smochćicach. Přizjewjenja přijimuja hižo nětko online.
„Kedźbu pasle! Kak prawicarscy ekstremisća a reichsbürgerojo demokratiju podrywaja“ rěka hesło zarjadowanja, na kotrež su wšitcy zajimcy, wosebje politisce angažowani, wobydlerjo, zastupjerjo gmejnskich radow kaž tež lokalnych organizacijow a institucijow přeprošeni. Wone wotměje so srjedu, 14. junija, wot 19.00 do 21.00 hodź. w Jakubetzowym wustawje w Kulowje.
Na putnikowanje z kolesom přeprošuje Smochčanske kubłanišćo swjateho Bena wšitkich zajimcow wot njedźele, 24. septembra, do njedźele, 1. oktobra. Nawod změjetaj farar Thomas Cech ze Žitawy a Alojs Rječka z Łužnicy.
We Worklečanskim Don Boskowym domje poskića dalekubłanje na polu prewencije před seksualizowanej namocu. Přizjewjenja přijimuja hač do póndźele, 5. junija.
Wšelake hódančka a dalše zaběry za dźěći su tule přistupne.
Serbska protyka
