Katolski Posoł – 4. februara 2024
Wo žórle, z kotrehož je Jězus móc za swoje nadawki čerpał, pisa serbski duchowny w swojim zawodnym nastawku. Wón k tomu pozbudźuje, zo měł sej kóždy za to chwile brać, najebać mnohich wšědnych nadawkow.
Nowa nawodnica Katolskeho běrowa w Sakskej je kónc januara Domowinu wopytała. Mjez druhim dorozumi so z předsydu na intensiwniše zhromadne dźěło.
W Smochčanskim kubłanišću swjateho Bena wobdźěli so 16 młodostnych a młodych dorosćenych na prěnim dźělu dalšeho serbskeho wukubłanja JuLeiCa. Na mnohostronske wašnje staj jimaj serbska młodźinska referentka kaž tež jeje kolega z Mišnja wšelake wobsahi spřistupniłoj.
Twarske dźěła na Drježdźanskim Domje propsta Beiera postupuja. Při wuhotowanju domu a jednotliwych běrowowych rumnosćow ma funkcionalnosć w srjedźišću stać.
Wo swjatej a jeje woznamje za wosebite znamjo arcybiskopow pisataj Hańžka a Feliks. Zdobom je na dźěćacej stronje kniha předstajena, w kotrejž njenańdu mali kucharjo jeničce zajimawe recepty, ale tež tójšto zajimaweho ze žiwjenja w bibliskim času zhonja. Jako přikład je jedyn z receptow podaty.
Mnozy ludźo, mjez nimi tež Serbja, su w Budyšinje za čłowjeskosć a demokratiju demonstrowali. Mjez rěčnikami běchu tež zastupjerjo cyrkwinskich zarjadnišćow a skupin kaž tež Serbow.
Město z baletnej rejwarku sta so z Čěskeje pochadźaca žona z cisterciensku. Nětko je wona w klóštrje Marijinej hwězdźe swoju slěbornu profes swjećiła.
Na podijowej diskusiji w Drježdźanach, na kotrejž wobdźěli so tež něhdyša němska ministerka, je Hildesheimski biskop mjez druhim na Serbow pokazał. Zdobom bu na zarjadowanju direktor Katolskeje akademije Drježdźansko-Mišnjanskeho biskopstwa rozžohnowany.
Na wopomnjenskim dnju zbóžneho Alojsa Andrickeho sobotu, 3. februara, swjeći biskop Heinrich Timmerevers w Drježdźanskej katedrali pontifikalne kemše. Započatk je we 18.00 hodź. Wěriwi móža Božu mšu tež w livestreamje sobu swjećić.
Dekanatne dušepastyrstwo za dźěći zarjaduje za šulerjow 4. a 5. lětnika zhromadny dźeń w póstnym času pod hesłom „Z Jězusom po puću“. Tón wotměje so sobotu, 24. februara, we Worklečanskim Don Boskowym domje.
Hornjołužiski zwjazk Carity pyta k najblišemu móžnemu terminej za swoju dnjowu hladarnju we Worklecach přidatnu hladansku wosobu. Wobmjezowane dźěłowe zrěčenje je na minimalnje 20 hodźin wupisane, zwyšenje hodźin a podlěšenje zrěčenja pak je móžne.
Sekcija wěda a skutk Towarstwa Cyrila a Metoda z.t. (TCM) přewjedźe wot soboty do srjedy, 21. do 25. septembra, wulět do Ruhpoldinga. Zajimcy měli so hač do štwórtka, 29. februara, w redakciji Katolskeho Posoła přizjewić.
Nowu spirituelnu zwukowu instalaciju k temje „Lubowany“ móža wopytowarjo wot njedźele, 4. februara, w Rakečanskej ewangelskej cyrkwi dožiwić. Wuwił a zwoprawdźił je ju znowa komponist Norbert Binder z podpěru tamnišeho Pawołskeho chóra. Swětłowe efekty hudźbu wizuelnje podkładu.
W Smochčanskim kubłanišću swjateho Bena wotměje so tež lětsa Ekumeniski póstny seminar. Wón steji tónraz pod hesłom „Nadal dosć městna – W kotrej měrje je cyrkej za towaršnosć trěbna?“ a zahaji so póndźelu, 26. februara.
Ambulantna hospicna słužba Hornjołužiskeho zwjazka Carity z.t. w Kamjencu poskićuje lětsa zaso kurs k čestnohamtskemu přewodźenju ćežkochorych a mrějacych. K tomu trěbnu wědu posrědkuje w zakładnym kursu, kotryž wotměje so wot 20. měrca hač do 4. meje trójce srjedu kaž tež štyri króć sobotu.
Towarstwo Cyrila a Metoda přihotuje změnu swojich wustawkow. Wo nich ma so na hłownej zhromadźiznje pjatk, 9. februara, w Baćonju diskutować. K přirunowanju su paralelnje dotalne, kónc lěta 1998 wobzamknjene wustawki z nowym namjetom wozjewjene.
Dekanatne dušepastyrstwo za dźěći přeprošuje šulerki a šulerjow 5. do 8. lětnika w lětnich prózdninach na jězbu do Lückendorfa w Žitawskich horach. Wona wotměje so wot póndźele do pjatka, 8. do 12. julija. Přizjewjenja přijimuja hač do njedźele, 31. měrca, online.
Serbska protyka
