Katolski Posoł – 4. awgusta 2024
Zadźerženje, kotrež Jězusa boleše, wopisuje awtor zawodneho nastawka. Wón pak tež na to pokaza, što měli činić, štož swjaty Pawoł z tym wopisuje, zo ma so to čłowjek woblec.
Bamžej Franciskusej so hesło lětušeho mjezynarodneho putnikowanje ministrantow „Z Tobu“ wosebje lubi. Přiwšěm wón je hladajo na swjate woprawjenje přeměni. Na putnikowanju wobdźěli so mjez 50.000 wobdźělnikami tež skupina Serbow.
Pomoc k tomu, kak měli křesćenjo na populistiske abo ekstremne pozicije reagować, skića Rada katolikow w Drježdźansko-Mišnjanskim biskopstwje. Ta da so jako flajer do wšěch wosadow, je pak tež tule přistupna.
Francoscy biskopja začuwaja dźěl zazběha olympiskich hrow w Parisu jako hanjenje. Němski jezuit jich při tym argumentatiwnje podpěruje.
Telewizijny sćelak ZDF je eksperiment přewjedł: Žid, muslim, katolikowka, hinduistka, buddhist a njewěriwa bydlachu tydźeń zhromadnje. Sćelak chcyše widźeć, hač je swět móžny, w kotrymž su wšitke nabožiny w měrje mjez sobu žiwe. Na nim je so katolska Serbowka wobdźěliła.
Pod hesłom „Kopolaki čłowjeskeje eksistency – pjenjezy, seks a móc“ běše so 45 młodostnych na pěše putnikowanje do Krupki nastajiło. Po puću woni na jednotliwych stacijach wo křesćanskej wučbje a wosobinskim wobchadźenjom z tematiku rozmyslowachu.
Wosobinske dopóznaća měješe wobdźělnica na putnikowanju do Krupki w skupinje dorosćenych. Jedne běše so jej wosebje zašćěpiło.
Wo wažnej skupinje na nabožnych tydźenjach we wšěch wosadach pisa serbska mać. Jej wona něšto jasnje wupraji.
Na kemšach za serbskich pedagogow je farar Michał Anders swjateho z Italskeje jako přikład předstajił. Zahajił wšak je wón ze žortom, z čehož přeńdźe na to, što je zakładna šula žiwjenja.
Pod titulom „Štó(ž) wěri? Kak křesćanska je sakska politika?“ přeprošujetaj społnomócnjenaj ewangelskeje a katolskeje cyrkwje pola Swobodneho stata Sakskeje, ordinariatna radźićelka dr. Daniela Pscheida-Überreiter (Katolski běrow Sakska) a wyši cyrkwinski rada Christoph Seele (Ewangelski běrow Sakska), na wječorne zarjadowanje do Budyšina. W srjedźišću stać budu wutoru, 6. awgusta, w 19.00 hodź. w Budyskej ewangelskej wosadnicy Při měšćanskim nasypje 12 wuslědki přepruwowanja wólbnych programow znatych stron za wólby Sakskeho krajneho sejma 2024. Tón wječor chcedźa na nje z perspektiwy křesćanskich zakładnych hódnotow zhladować. Analyzu je Paderbornska Teologiska fakulta pod nawodom profesora dr. Petera Schallenberga zhotowiła Link na nju je deleka podaty. Profesor Schallenberg budźe wšitke tři wječory – nimo w Budyšinje přewjedu tajkej w Lipsku a Schwarzenbergu – přewodźeć. Z impulsowym přednoškom wón analyzu předstaji. Tomu přizamknje so podijowa rozmołwa. Při tym budu zastupjerjo najwšelakorišich cyrkwinskich wobłukow wo swójskich nazhonjenjach diskutować, mjez nimi Andreas Ošika, jednaćel Serbskeho šulskeho towarstwa z.t.
Pod hesłom „Što tam spěwa, lěta, šumi?“ přeprošuje sekcija Swójba Towarstwa Cyrila a Metoda z.t. (TCM) w kooperaciji z Dekanatnym dušepastyrstwom za dźěći na zhromadny dźeń za šulerjow wot 4. do 6. lětnika w Njeswačanskim hrodźe. Tón budźe sobotu, 10. awgusta, wot 10.00 do 14.00 hodź.
Pod hesłom „Kreuz und quer“ su młodostni na diecezanske zetkanje młodźiny do Wechselburga přeprošeni. Wone budźe pjatk a sobotu, 13. a 14. septembra, w tamnišim klóštrje. Serbscy wobdźělnicy móža sej tam zhromadnje dojěć. Přizjewić móža so hač do soboty, 24. awgusta, online.
Wulět dekanatneje młodźiny budźe sobotu, 24. awgusta. Přeprošeni su młodostni wot přichodneho 9. lětnika kaž tež młodźi dorosćeni. Přizjewjenja přijimuja hač do srjedy, 7. awgusta, online.
Drježdźansko-Mišnjanske biskopstwo přeprošuje wěriwych we wobłuku Swjateho lěta na diecezanske putnikowanje z biskopom Heinrichom Timmereversom do Roma. Wone wotměje so wot soboty do soboty, 11. do 18. oktobra 2025.
Serbska protyka
