Katolski Posoł – 31. měrca 2024 – jutry
Wšitkim čitarjam, dopisowarjam, roznošowarjam a dobroćelam Katolskeho Posoła kaž tež wužiwarjam našeje internetoweje strony www.posol.de přejemy žohnowane a radostne jutry.
Redakcija
W aktualnym wudaću nańdźeće mjez druhim tole:
Z čim so křesćanej woči k potajnstwam wěry a žiwjenja wotewěratej, pisa awtor w swojim zawodnym nastawku. Zakład twori mólba, předstajaceho jednoho z pozdźišich japoštołow, kotraž je w Romskej cyrkwi Santa Maria del Popolo widźeć.
Rada katolikow Drježdźansko-Mišnjanskeho biskopstwa je so k swojej nalětnjej plenarnej zhromadźiznje zešła. Na njej su přitomni zazběhi w biskopstwje a zhromadne skutkowanje hłowno- a čestnohamtsce skutkowacych rozjimali.
Historiski Emmaus pyta awtor w seriji, kotraž bu w póstnym času zahajena. Při tym dóńdźe tež k njegeografiskemu dopóznaću.
Wo potajnosći, kotruž je Jězus z poslednjej wječerju załožił, rozmysluje serbski duchowny w swojim přinošku. W nim wón pokaza, što wona wěriwym wotwěra, ale tež, što měło dźensa wažnišu rólu hrać.
Něhdźe 11.000 stron Katolskeho Posoła je wona wot srjedź 1990tych lět čitała a jako prěnja čitarka redakciju na poslednje zmylki skedźbnjała. Jutrońčku dokónči Angela Rabowa z Pančic-Kukowa swoje 85. žiwjenske lěto.
Křižerskej drasće wěnuje so awtorka w swojim stawizniskim přinošku k jutram. Mjez druhim wona zwěsća, zo je so ta w běhu lětstotkow měnjała.
Jedna z najwjetšich a najwuznamnišich nabožnych zběrkow je hišće hač do septembra w Drježdźanach wustajena. Zdobom prezentuja ju prěni króć zwonka Praskeje katedrale swjateho Wita.
Na nastork serbskeho dźěćaceho časopisa Płomjo su so dźěći w Ralbičanskim horće do dźěła dali. Wone zhotowichu swójski křižerski procesion a jón samo wudospołnić dachu.
Z prašenjom „Běchu to dospołnje hinaše časy?“ zaběra so awtorka hladajo na měrcowske wudaća Katolskeho Posoła před 100 lětami. Mjez druhim pokaza wona na rozprawu, kak běchu so młodostni wěstemu zakazej w póstnym času wuwinyli.
Serbska dekanatna młodźina je so lětsa w Šunowje a Konjecach zhromadnje křižowy puć modliła. Na sydom stacijach běchu Jězusowe ćerpjenje z aktualnymi a wosobinskimi temami zwjazali.
Wo prěnjej swjatej spowědźi rozprawja šulerka 3. lětnika z Radworja. Mjez druhim wona přeradźa, što je so z cedlkami stało, na kotrychž běchu hrěchi napisali.
Wo jutrownymaj symbolomaj a jeju woznamje pisataj Hańžka a Feliks w swojim jutrownym postrowje. Zdobom su na dźěćacej stronje wšelake fasety dalšeho wažneho křesćanskeho symbola předstajene.
Wulkeho zajima dla je spirituelna zwukowa instalacija „Lubowany“ w Rakečanskej ewangelskej cyrkwi dlěje přistupna, a to hač do njedźele, 14. měrca. Boži dom je wšědnje wot 9.00 do 20.00 hodź. wotewrjeny.
W lětušej jutrownej wustajeńcy Budyskeho Serbskeho muzeja, kotraž budźe wot njedźele, 17. měrca, hač do njedźele, 5. meje přistupna, wěnuja so zaso nałožkam a tradicijam Serbow wot zeleneho štwórtka hač k jutrońčce.
Zdobom zhonja zajimcy w muzeju wjace ke kmótřiskim daram ze serbskim hrónčkom.
Dekanatne dušepastyrstwo za dźěći přeprošuje šulerki a šulerjow 5. do 8. lětnika w lětnich prózdninach na jězbu do Lückendorfa w Žitawskich horach. Wona wotměje so wot póndźele do pjatka, 8. do 12. julija. Přizjewjenja přijimuja hač do njedźele, 31. měrca, online.
