Katolski Posoł – 31. julija 2022

W aktualnym wudaću nańdźeće mjez druhim tole:

Zamóže modlenje čłowjeka přeměnić? Wo tym rozmysluje awtor w swojim zawodnym nastawku. Při tym poćahuje so wón na swjedźeń, kotryž swjeći cyrkej spočatk awgusta.

Zetkanja a rozmołwy z indigenymi wobydlerjemi stejachu w srjedźišću japoštołskeje jězby bamža Franciskusa do Kanady. Zahajił běše wón ju z wuraznej próstwu wo wodaće.

Za jednu z wobdźělnicow nabožneho tydźenja w Ralbicach běše to „najrjeńši minjenych lět“. Zaběrajo so z přirodu hromadźachu dźěći mjez druhim smjeće a přemyslowachu wo tym, za čo měli so Bohu dźakować. Zdobom čitarjo zhonja, čehodla je spomóžne, hdyž ma wosadny farar za čas nabožneho tydźenja narodniny.

Towarstwo Cyrila a Metoda organizowaše zhromadnje ze Serbskim šulskim towarstwom rěčne prózdninske lěhwo w Pólskej. Na nim wobdźěli so 45 šulerjow Budyskeho Serbskeho gymnazija a wšelakich serbskich wyšich šulow. Mjez druhim pućowachu po Wysokich Tatrach a wopytachu sanktuarij, kotryž da bamž Jan Pawoł II. natwarić.

W Pančicach-Kukowje wobdźěli so 66 dźěći na tamnišich nabožnych prózdninskich dnjach. Za wosom z lětušich prěnjowoprawjenskich dźěći pak běše to zdobom wosebity tydźeń.
Za słužbu, kotruž chcedźa w přichodnych lětach wukonjeć, přijimachu žohnowanje duchowneho.

Wjace hač tysac wopytowarjow dožiwi w klóštrje Marijina hwězda w Pančicach-Kukowje lětušu Nóc tysac swěčkow. Z motiwami swěčkow pokazachu mjez druhim na wšelake lětuše róčnicy a zarjadowanja. Program, kotryž měješe tež mały serbski podźěl, zakónči so z wohnjowej show.

Wo wšelakich drohoćinkach pisaše Katolski Posoł před 100 lětami. Zdobom zwěsći awtorka rubriki, zo hrajachu pjenjezy tež tehdy hižo njesnadnu rólu.

Z połnej paru a lóštom podachu so dźěći w prěnim prózdninskim tydźenju do nabožneho tydźenja we Wotrowje. Mjez druhim wobdźělichu so na dźěćacym putnikowanju w Róžeńće, zhotowichu sej sami limonadu a wulećachu sej do dožiwjenskeho parka.

49 šulerjow štwórteho lětnika je so do prózdnin z biskopskej Marije Montessorijowej zakładnej šulu w Budyšinje rozžohnowało. Na Božej słužbje přijachu woni nimo wuswědčenjow tež žohnowanje za swój dalši žiwjenski puć.

Na katolskej žurnalistiskej šuli ifp w Mnichowje zahaji so klětu nalěto nowy lětnik žurnalistiskeho wukubłanja paralelnje k studijej. Wone traje tři lěta, w kotrychž nawuknu zajimcy zakłady žurnalizma. Požadanja přijimuja hač do 20. septembra.

Serbske ewangelske towarstwo a Maćijec swójba z Hrubjelčic přeprošujetej wšitkich Serbow a dalšich zajimcow na lětnje pućowanje a serbski swjedźeń. Wonej wotmějetej so sobotu, 3. septembra, wot 14.00 hodź.

Smochčanske kubłanišćo swjateho Bena přeprošuje wot srjedy do njedźele, 31. awgusta do 4. septembra, na putnikowanje z kolesom. Mjez druhim wopytaja wobdźělnicy Zhorjelc, Kulow a Worklecy. Přizjewjenja přijimuja hač do srjedy, 10. awgusta, online.

Składnostnje 150. narodnin biskopa Christiana Schreibera přeproša Smochčanske kubłanišćo swjateho Bena, Berlinska arcydieceza kaž tež tamniša Katolska akademija wšitkich zajimcow na seminar k jeho žiwjenju a skutkowanju. Tutón wotměje so wot štwórtka do pjatka, 1. a 2. septembra w Schmochćicach. Přizjewjenja za zarjadowanje přijimuja so hač do póndźele, 15. awgusta.

Dekanatne dušepastyrstwo młodźiny přeprošuje młodostnych ze wšěch serbskich wosadow na zhromadny wulět do Błótow, a to njedźelu, 11. septembra. Přizjewjenja přijimuja so hač do póndźele, 29. awgusta.

W Kulowje zhladuje tamniše Arcybratstwo swjateho róžowca lětsa na 350. róčnicu swojeho załoženja. Składnostnje tutoho jubileja ma wustajeńca nastać, za kotruž móža wěriwi wosebite róžowcy abo napisane wosobinske nazhonjenja z modlenjom róžowca na tamnišej farje wotedać.

Serbska protyka

Katolski Posoł – 31. julija 2022

W aktualnym wudaću nańdźeće mjez druhim tole:

popularne wudaća

…

zašłe wudaća

dalše informacije