Katolski Posoł – 30. junija 2024
W swojim zawodnym nastawku rozmysluje awtor mjez druhim wo tym, na čo Jězus při wozjewjenju dobreho poselstwa twarił njeje. Poćahujo so na ewangelij tuteje njedźele wón zdobom rozłoži, što zakład twori a z čim móže kóždy křesćan tomu přinošować.
Dźěći a jich přewodźerjo wšěch serbskich wosadow su w prěnim prózdninskim tydźenju do Róžanta putnikowali, zo bychu zhromadnje Božu mšu swjećili a při zabawje po tym zhromadnosć hajili. W srjedźišću steještaj swjataj, z kotrymajž zaběraja so lětsa we wobłuku nabožnych prózdninskich dnjow.
Hinak hač wobdźělnicy druhich serbskich wosadow njepřewjedźechu serbske dźěći Budyskeje wosady swój nabožny tydźeń na farje. Wone přebywachu cyły tydźeń w přirodźe na hrodźišću.
W Berlinje wuswjeći arcybiskop Heiner Koch z Kulowa pochadźaceho jezuita na měšnika. Wjacerěčna primicna Boža mša w Kulowje měješe tež serbski podźěl.
Klóšterski a swójbny swjedźeń w Pančicach-Kukowje je mnoho hosći přiwabił. Zdobom swjećachu tam jansku kermušu. Zahajili běchu ju z dwurěčnymi swjedźenskimi kemšemi, kotrež swjećeše lětsa Zhorjelski biskop Wolfgang Ipolt.
Ze swójbnym swjedźenjom zakónčichu chowancy a kubłarjo Katolskeho serbskeho dźěćaceho doma „Alojs Andricki“ w Radworju minjene pěstowarske a šulske lěto. Za zabawu mějachu mjez druhim wšelake stacije přihotowane.
Na „Hudźbne pućowanje po Łužicy“ je Radworski chór Meja připosłucharjow sobu wzał. Na tamnišej farskej zahrodźe wuhotowaše wón swój tradicionelny lětni koncert. Jako hósć wustupi tónraz spěwne ćěleso z Delnjeje Łužicy.
Wo starosćach nastupajo měšniski dorost w domiznje pisaše Katolski Posoł před sto lětami. Zdobom rozprawješe wo poswjećenju pohrjebnišća w něhdyšej samostatnej serbskej wosadźe, kaž awtorka rubriki zwěsća.
W Chrósćicach swjećachu wobydlerjo a přistajeni Smječkečanskeho Domu swjateho Jana dwurěčnu patronatnu Božu mšu. Do wotběha Božeje mšě běchu někotři z nich sobu zapřijeći.
Lětsa je tomu 30 lět, zo přeńdźe Smječkečanski Dom swjateho Jana do noweho nošerstwa. W swojim přinošku poda něhdyši nawoda mjez druhim swoje mysle k wobrazej w zachodźe domu.
Lětuši Gig-festiwal budźe wot pjatka do njedźele, 5. do 7. julija, w Róžeńće. Mjez druhim chcedźa tam sobotu, 6. julija, w 14.00 hodź. na putniskej łuce wulki róžowcowy rjećaz z powětrowych balonkow zhotowić a so po tym tónle paćer modlić.
Pod hesłom „Što tam spěwa, lěta, šumi?“ přeprošuje sekcija Swójba Towarstwa Cyrila a Metoda z.t. (TCM) w kooperaciji z Dekanatnym dušepastyrstwom za dźěći na zhromadny dźeń za šulerjow wot 4. do 6. lětnika w Njeswačanskim hrodźe. Tón budźe sobotu, 10. awgusta, wot 10.00 do 14.00 hodź.
Wosebity pišćelowy koncert wuhotuje serbski organist a komponist Feliks Brojer njedźelu, 30. junija, w 16.00 hodź. w klóšterskej cyrkwi w Pančicach-Kukowje. Zaklinča jeničce kompozicije młodeho cyrkwinskeho hudźbnika.
Na swjedźensku Božu mšu składnostnje patronata tamnišeje putniskeje cyrkwje Marije wopytanja su wěriwi njedźelu, 30. junija, do čěskich Hejnic přeprošeni. Kemše započnu so w 10.00 hodź.
Kubłanske dny serbskeje młodźiny wotměja so wot pjatka do njedźele, 27. do 29. septembra, w ponowjenym Schmiedebergskim Winfriedowym domje. Wobdźělnicy změja składnosć po přirodźe pućować, so zhromadnje modlić a spěwać kaž tež duchownje so posylnjeć. Zajimcy měli so hač do póndźele, 29. julija, online přizjewić.
Pod hesłom „Kreuz und quer“ su młodostni na diecezanske zetkanje młodźiny do Wechselburga přeprošeni. Wone budźe pjatk a sobotu, 13. a 14. septembra, w tamnišim klóštrje. Serbscy wobdźělnicy móža sej tam zhromadnje dojěć. Přizjewić móža so hač do soboty, 24. awgusta, online.
Wulět dekanatneje młodźiny budźe sobotu, 24. awgusta. Přeprošeni su młodostni wot přichodneho 9. lětnika kaž tež młodźi dorosćeni. Přizjewjenja přijimuja hač do srjedy, 7. awgusta, online.
Přichodna literarna kofejownja w Budyskim ekumeniskim tachantskim wobchodźe budźe pjatk, 5. julija, we 18.30 hodź. Křesćan Krawc čita ze swojeho němskorěčneho romana „Der Wassermannräuber“. Zastup je darmotny, wo dary proša.
Drježdźansko-Mišnjanske biskopstwo přeprošuje wěriwych we wobłuku Swjateho lěta na diecezanske putnikowanje z biskopom Heinrichom Timmereversom do Roma. Wone wotměje so wot soboty do soboty, 11. do 18. oktobra 2025.
Chróšćanska wosada so tuchwilu na swoju 800. róčnicu prěnjeho naspomnjenja klětu přihotuje. K jubilejej ma w meji 2025 w Budyskim Ludowym nakładnistwje Domowina (LND) kniha wuńć. LND prosy wšitkich, kotřiž maja dotal njeznate historiske fota ze žiwjenja w Chrósćicach a wokolnych wsach – wosebje fota hač do Druheje swětoweje wójny a z NDRskeho časa –, so přizjewić.
Serbska protyka
