Katolski Posoł – 3. septembra 2023
Hdy měli křesćenjo jako Chrystusowi wučomnicy haj rjec, wo tym pisa duchowny w swojim zawodnym nastawku. Zdobom wón rozłoži, što wěra lubi, wostanješ-li kruty we njej, ale tež wutrajny w nadźiji a sćěhuješ-li jeho ze swojim křižom.
Swójbny kružk Radworskeje wosady organizuje jónu wob lěto pućowanje za swójby a dalšich zajimcow. Lětsa dojědźechu sej wobdźělnicy do susodneho biskopstwa, hdźež je wosada ze serbskim podźělom.
W Chrósćicach je skupina wosadnych ministrantow rozrostła. Na nyšporje přiwzachu tam tójšto nowych holcow a hólcow. Woni wotnětka słužbu při wołtarju wukonjeja.
Nowa kniha dokumentuje hru „Mór a lubosć“, kotraž bu loni wjackróć w Chrósćicach předstajena, kaž tež swjatočnosće k 600lětnemu wobstaću tamnišeho Bratstwa swjateho Bosćana w lěće 2020. Wulki dźěl dwurěčneje publikacije wučinjeja wobrazowe impresije.
Wo pisanym meniju a jandźelach pěstonach pisataj Hańžka a Feliks. Zdobom zhonja dźěći někotružkuli zajimawostku k jandźelam kaž tež třom arcyjandźelam, kotrež cyrkej w septembrje wopomina.
Wołtarne blido, kotrež wužiwaja tuchwilu w Chróšćanskim Hórnikowym domje na Božich słužbach, steješe něhdy na wuznamnym městnje. Stawiznam blida wěnuje so awtor w swojim přinošku.
Serbske ewangelske towarstwo z.t. je tež lětsa zaso zhromadnje z Maćijec swójbu na dworowy swjedźeń z lětnym pućowanjom a ekumeniskim nyšporom přeprosyło. Na Božej słužbje pokaza prědar na wažnosć wjesołych myslow.
Dowěra do Boha a lubosć swójbnych stej jej móc dariłoj. Po sćerpnje znjesenej chorosći bu Wórša Hojerowa nětko 56lětna do wěčnosće wotwołana.
Pod hesłom „Dźak Ći, Božo“ su dźěći 1. a 2. lětnika sobotu, 30. septembra, do Don Boskoweho domu we Worklecach přeprošeni. Přizjewjenja přijimuja hač do njedźele, 24. septembra, online.
Katolska domowa hudźba při Budyskej tachantskej cyrkwi swjateho Pětra zahaji w zymskim semestrje chórowy spěwny kubłanski projekt za dźěći a młodostnych w šulskej starobje. Přizjewjenja přijimuja hač do njedźele, 24. septembra.
Dekanatne dušepastyrstwo młodźiny we Worklecach přeprošuje wšitkich młodostnych wot 8. lětnika kaž tež młodych dorosćenych na seksualnopedagogisku dźěłarničku WaageMut®. Wona wotměje so sobotu, 9. septembra, na „Radlubinje“ w Ralbicach. Přizjewjenja su hač do wutory, 5. septembra, móžne.
Serbska protyka
