Katolski Posoł – 3. nowembra 2024
Prašenju za najwjetšej kaznju wěnuje so awtorka w swojim zawodnym nastawku. Wona k tomu pozbudźuje, so jeničce po njej njeměć, ale ju tež dale dawać.
Swětowa synoda katolskeje cyrkwje je zakónčena. Na njej su wobdźělnicy mnohe wobzamknjenja schwalili, kotrež maja k zakładnym reformam wjesć.
Swjaty křiž z wosebitej formu je Radworski farar Beno Jakubaš w Kamjenej poswjećił. Mandźelskaj běštaj jón jako dźak za dwójne wustrowjenje postajiłoj.
Z procesionom podachu so wěriwi z Pěskec na poswjećenje křiža. Tón wisa na njewšědnym městnje blisko wsy.
Z hudźbu chce žónski chór přitomnosć z dawnym časom zwjazać. We Wojerecach a w Bukecach přednjesechu spěwarki njedawno pěsnje z brunicowych kónčin.
Róža-Marja Pinkawina je w diasporje wuchodnje Budyšina katolsku wěru a serbsku rěč pěstowała a dale dawała. Nětko je wona na prawdu Božu wotešła.
Wosebity dar Kulowskich křižerjow poswjeći w Kulowje skutkowacy farar Norbert Christoph w tamnišej katolskej pěstowarni. Nyšpor k tomu běše dwurěčny.
Towarstwo swjateje Filomeny z.t. je chorowni w bosniskim měsće wjacore chorobne łoža a wotpowědne matracy sposrědkowało. Dariła bě je za tónle zaměr łužiska chorownja.
Worklečanska kapałka maćerje Božeje je hižo dołho mosćik do Wěčneho města a Vatikana. W čim so to zwuraznja, wopisuje chronikar wsy w swojim přinošku.
Rada katolikow Drježdźansko-Mišnjanskeho biskopstwa zeńdźe so w Smochčanskim kubłanišću swjateho Bena k swojej nazymskej plenarnej zhromadźiznje. Mjez druhim su wobdźělnicy wo róli křesćanow w politice a towaršnosći po wólbach krajneho sejma w Sakskej diskutowali.
Comic wo influenceru Božim, kotryž ma so bórze swjatoprajić, předleži wotnětka tež w serbskej rěči. Kniha z krutej wjazbu je na wšitkich katolskich farach na předań a płaći 15,00 eurow.
Na hudźbny nyšpor mjez druhim z twórbami serbskeju komponistow Jana Cyža a Ulricha Pogody su wěriwi do Baćońskeje cyrkwje Jězusoweje wutroby přeprošeni. Tón budźe tutu njedźelu, 3. nowembra, w 14.00 hodź. Na pišćelach hraje ze wsy pochadźacy organist Tomaš Žur a na saksofonje Gerold Gnausch.
Zakónčacy koncert Budyskeje chóroweje akademije generacijow budźe sobotu, 9. nowembra, w 17.00 hodź. w Budyskej Marije-Marćinej cyrkwi. Na njej wobdźěli so 57 spěwarjow 16 do 79 lět, mjez nimi tójšto Serbow. Na koncerće zaklinča mjez druhim twórby Jana Pawoła Nagela a Wolfganga Amadeusa Mozarta. Cyłkowny nawod ma Friedemann Böhme. Zastup je darmotny.
Sekcija Swójba Towarstwa Cyrila a Metoda z.t. přeprošuje wšitkich zajimcow na škotowy turněr, kotryž wotměje so wutoru, 19. nowembra, na předwječoru pokutneho dnja, we 18.30 hodź. w Jasčanskej „Bjesadźe“. Wuraznje su nimo muži tež žony přeprošene, wšojedne kotreje staroby. Za tych, kotřiž njemóža škot hrać, zarjaduje so zdobom turněr z kartowej hru rommé.
Hornjołužiski zwjazk Carity pyta k najblišemu móžnemu terminej za swoju Dnjowu hladarnju „Při Krabatowym puću“ we Worklecach přidatnu wosobu za hladanje a wobstaranje. Požadanja přijimuje nawodnica dnjoweje hladarnje Jěwa-Marja Šnajderowa we Worklecach.
Na próstwu Towarstwa Cyrila a Metoda z.t. (TCM) poskićuje Norman Reitner z Drježdźanskeho biskopskeho ordinariata kurs k tomu, kak móžeš projekty derje planować a k tomu pjenjezy na wšelakore wašnje požadać. Dalekubłanje na polu sponsoring a foundraising wotměje so sobotu, 9. nowembra, wot 9.00 do 16.00 hodź. na „Radlubinje“ w Ralbicach. Zajimcy – nimo čłonow TCM su tež dalši přeprošeni – měli so online přizjewić.
Towarstwo Cyrila a Metoda z.t. (TCM) chce tež lětsa ze swojej nazymskej akciju „Łužica pomha“ diecezanskemu zwjazkej Carity w pólskim Ełku zaso pomhać. Tam wjesela so nade wšěm, štož w swójbje trjebaš, kaž su to drasta, črije, artikle hygieny a kosmetika za žony a dźěći, ale tež płokanski próšk, kuchinske graty abo pampersy za dźěći runje tak kaž za dorosćenych. Wotedać hodźa so dary sćěhowace dny pola Špitankec w Zejicach, Kamjenska dróha 10: po pjatkomaj, 8. a 15. nowembra, stajnje wot 15.00 do 18.00 hodź. kaž tež sobotu,
9. nowembra, wot 9.00 do 12.00 hodź. a sobotu, 16. nowembra, wot 9.00 do 11.00 hodź.
Klětu přeprošuje dušepastyrstwo młodźiny we Worklecach wospjet na seminaraj k přihotej na sakrament mandźelstwa. Wonej wotmějetej so stajnje pjatk a sobotu, 7. a 8. februara kaž tež 28. a 29. nowembra, w Smochčanskim kubłanišću swjateho Bena. Přizjewjenja přijimuje dekanatne dušepastyrstwo hač do srjedy, 8. januara, online.
Prěni dźěl přichodneho wukubłanja JuLeiCa, kotrež poskići Worklečanske dekanatne dušepastyrstwo za młodźinu, njebudźe kaž dotal připowědźene klětu w januarje, ale hakle wot pjatka do njedźele, 4. do 6. apryla, w Smochčanskim kubłanišću swjateho Bena. Druhi dźěl wotměje so, kaž planowane, wot 25. do 27. apryla na samsnym městnje. Přizjewjenja přijimuja hač do srjedy, 8. januara, online.
Serbska protyka
