Katolski Posoł – 3. decembra 2023
Čas, kotryž so z tutej njedźelu započnje, njeje časowje wobmjezowany. Wo tym pisa serbski duchowny w swojim zawodnym nastawku. Zdobom pokaza wón na sgrafito, kotryž ma lětsa kulojtu róčnicu wobstaća.
W Berlinje je Centralny komitej katolikow Němskeje swoju plenarnu zhromadźiznu wotměł. Mjez druhim su wobdźělnicy k wšelakim towaršnostnopolitiskim temam stejišćo zabrali.
Jenički milenijowy pomnik, kotryž bu w Swjatym lěće 2000 w Němskej postajeny, je zaso poswjećeny. Wón bu spočatk februara wonječesćeny a w oktobrje zwuporjedźany.
Blisko katolskeje cyrkwje w Gerje bu kopolak za přećiwnika nacionalsocialistiskeho režima a katolskeho měšnika Aloysa Scholzeho wonječesćeny. Tón měješe tež serbske korjenje.
Pomocnej skutkaj Cyrkej w nuzy a Open doors stej w Drježdźanach „Wječor swědkow“ wuhotowałoj. Na nim wopominachu wěriwi přesćěhanych křesćanow po wšěm swěće.
Njewšědny wječor dožiwichu zajimcy w Serbskim seminarje w Praze. Po wjace hač sto lětach je jón zaso wysoki dostojnik katolskeje cyrkwje wopytał.
Swjaty, kotrehož cyrkej spočatk decembra wopomina, steji w srjedźišću dalšeho dźěla serije „Wěra praktisce“. Mjez druhim serbski duchowny pisa, čehodla njeje wón jeničce swjaty z wobrazowych knihow za dźěći.
Dwurěčny ekumeniski nyšpor w Tuchorskim lěsu pola Hornjeho Wujězda swjećachu lětsa z překwapjenku a nowymaj mjezwočomaj. Po tym běchu sej přitomni přezjedni, zo měła so tradicija na historiskim městnje dale wjesć.
Powołanju křesćana wěnowachu so wobdźělnicy zhromadnje ze swojim referentom na młodźinskej wuznawanskej njedźeli Chrysta Krala w Chrósćicach. Prěni raz běchu tele zarjadowanje sami přihotowali a přewjedli.
Wo wosebitych hesłach za kóždu adwentnu njedźelu a njewšědnej barbje w dohodownym času pisataj Hańžka a Feliks. Zdobom móža so dźěći na zabawne wašnje z pomocu memoryja z adwentnym časom zaběrać.
Na mjeztym 12. kulturnu zymu přeprošuje Monika Gerdesowa do swojeje putniskeje hospody w Chrósćach. Hač do klětušeho februara poskićuje wona wšelake zarjadowanja za dźěći a dorosćenych w serbskej a němskej rěči.
W putniskej hospodźe w Hirschfeldźe budu wot prěnjeje adwentneje njedźele, 3. decembra, hač do swjedźenja Předstajenja Knjeza, pjatk,
2. februara, zaso Bože narodki
wustajene. Cyłkownje poskića 27 wodźenjow po wustajeńcy.
Dekanatne dušepastyrstwo dźěći přeprošuje šulerjow 4. do
6. lětnika na kreatiwnu dźěłarničku, kotraž wotměje sobotu, 16. decembra, w Don Boskowym domje we Worklecach.
Zajimcy móža wolić, hač wobdźěla so wot 9.00 do 11.30 hodź. abo wot 12.30 do 15.00 hodź. Přizjewjenja su online hač do póndźele, 11. decembra, móžne.
„Žiwy być kaž w paradizu?!“ rěka hesło kubłanskeho dnja, na kotryž přeprošuje dekanatne dušepastyrstwo wšitkich młodostnych a młodych dorosćenych w starobje wot 18 do 30 lět. Wón wotměje so sobotu, 6. januara 2024, w Ewangelskim centrumje za dźěći a młodźinu TiK w Budyšinje. Přizjewjenja přijimuja hač do wutory, 12. decembra.
Dekanatne dušepastyrstwo za dźěći přeprošuje šulerki a šulerjow 5. do 8. lětnika klětu w lětnich prózdninach na jězbu do Lückendorfa w Žitawskich horach. Wona wotměje so wot póndźele do pjatka, 8. do 12. julija 2024. Přizjewjenja přijimuja hač do njedźele, 31. měrca 2024, online.
Seminary k přihotej na sakrament mandźelstwa wotměja so klětu stajnje pjatk a sobotu, 16. a 17. februara, 26. a 27. apryla kaž tež 29. a 30. nowembra w Smochčanskim kubłanišću swjateho Bena. Přizjewjenja přijimuja hač do srjedy, 17. januara.
Worklečanske młodźinske dušepastyrstwo přewjedźe klětu zaso za zajimcow kurs JULEICA. Wukubłanje wobsteji z dweju dźělow a wotměje so stajnje wot pjatka do njedzele z přenocowanjom w Smochćicach. Prěni termin budźe hižo wot 19. do 21. januara, a nic kaž dotal wozjewjene spočatk februara. Druhi dźěl sćěhuje wot 26. do 28. apryla.
Serbska protyka
