Katolski Posoł – 29. septembra 2024
Wo jeničkim měritku za křesćanow pisa duchowny w swojim zawodnym nastawku. Mjez druhim wón rozłoži, što je při tym rozsudne.
Vatikan je česćowanje swjateje Marije w Medźugorju oficialnje připóznawał. K tomu je wotpowědny dokument wozjewił, w kotrymž to na zwjazowace wašnje rjaduje.
Wobydlerjo, sobudźěłaćerjo a hosćo su patronatny swjedźeń Chróšćanskeho Domu swjateje Ludmile woswjećili. Božu mšu we wosadnej cyrkwi pak je tež dalša generacija sobu wuhotowała.
W Brěžkach je sej mać a wudowa wutrobne přeće spjelniła. Dźeń za to běše sej wona wědomje wuzwoliła.
Wjace hač połdra lětstotka podpěruje Bonifacijowy skutk mjeztym katolikow w diasporje. Tež we Łužicy móžachu so z jeho pomocu w běhu lětdźesatkow wšelake projekty zwoprawdźić.
Dźiwadłowa skupina Kulowskeho Bratrowstwa je na swojim lětušim wulěće wróćo zhladowała a ideje za přichod zběrała. Zdobom je wjelelětneho hrajerja na „dźiwadźelniski wuměnk“ rozžohnowała.
W kopaće połnej Baćońskej cyrkwi je chór 1. serbskeje kulturneje brigady nyšpor wuhotował. Jednu z pěsnjow zanjesechu wotměnjejo z přitomnymi.
Što ma Kulowski handler z róžowcom činić? Wo tym pisa serbski duchowny w swojim přinošku hladajo na planowane wozrodźenje Bratstwa swjateho róžowca w Radworju.
Wo aktiwitach wšelakich towarstwow pisaše Katolski Posoł před 100 lětami. Ale tež dožiwjenje mnicha, kotryž běše pozdźišo na putniskim městnje Filipovje w dźensnišej sewjernej Čěskej skutkował, je awtorka rubriki našła.
Dwě wosadźe w Pólskej, kotrejž stej wot powodźenja jara sylnje potrjechenej, chce Towarstwo Cyrila a Metoda z.t. (TCM) ze swojej akciju „Łužica pomha“ podpěrać. Kontakt k nim nawjaza wone přez swojeho kruteho partnera w susodnym kraju, prelata dr. Dariusza Kruczyńskeho. Štóž chcył wot powodźenja domapytanu ludnosć podpěrać, njech přepokaza pjenjezy na konto TCM: Cyrill-Methodius-Verein e.V., IBAN: DE 65 7509 0300 0008 2823 66, hesło: „wulka woda“. Štóž sej darowansku kwitowanku přeje, měł swoju adresu podać, pak telefonisce pod čisłom (0 35 91) 55 02 10 pak z mailku na TCM@Posol.de.
Wěriwi ze wšitkich serbskich wosadow su přeprošene, njedźelu, 6. oktobra, składnostnje róžowcoweje njedźele do Radworja přińć. Dwurěčna swjedźenska Boža mša, na kotrejž chcedźa Radworske Bratstwo swjateho róžowca wozrodźić, zahaji so w 9.30 hodź. Swjedźenski nyšpor a procesion z postawu swjateje Marije budźe w 14.00 hodź. Wěriwi, kiž chcedźa do Radworskeho Bratstwa swjateho róžowca zastupić, měli formular wupjelnić a na farje wotedać.
Na próstwu Towarstwa Cyrila a Metoda z.t. (TCM) poskićuje Norman Reitner z Drježdźanskeho biskopskeho ordinariata kurs k tomu, kak móžeš projekty derje planować a k tomu pjenjezy na wšelakore wašnje požadać. Dalekubłanje na polu sponsoring a foundraising wotměje so sobotu, 9. nowembra, wot 9.00 do 16.00 hodź. na „Radlubinje“ w Ralbicach. Zajimcy – nimo čłonow TCM su tež dalši přeprošeni – měli so online přizjewić.
Towarstwo Cyrila a Metoda z.t. (TCM) chce tež lětsa ze swojej nazymskej akciju „Łužica pomha“ diecezanskemu zwjazkej Carity w pólskim Ełku zaso pomhać. Tam wjesela so nade wšěm, štož w swójbje trjebaš, kaž su to drasta, črije, artikle hygieny a kosmetika za žony a dźěći, ale tež płokanski próšk, kuchinske graty abo pampersy za dźěći runje tak kaž za dorosćenych. Wotedać hodźa so dary pjatk a sobotu, 8. a 9. nowembra, kaž tež pjatk a sobotu, 15. a 16. nowembra. Dokładnišo so to sčasom wozjewi.
Towarstwo Cyrila a Metoda z.t. (TCM), Sportowa jednotka 1922 Radwor kaž tež tamniši młodźinski klub přeprošuja sportowcow wšěch starobnych skupin wot šěsć lět na běh wo pokal zbóžneho Alojsa do Radworja. Tutón wotměje so štwórtk, 3. oktobra. Zajimcy měli so online přizjewić.
Drježdźansko-Mišnjanske biskopstwo přeprošuje wěriwych we wobłuku Swjateho lěta na diecezanske putnikowanje z biskopom Heinrichom Timmereversom do Roma. Wone wotměje so wot soboty do soboty, 11. do 18. oktobra 2025.
Serbska protyka
