Katolski Posoł – 29. januara 2023
W aktualnym wudaću nańdźeće mjez druhim tole:
Wo mudrym rozsudźe pisa awtor w swojim zawodnym nastawku. Z pomocu stawizny wón rysuje, wo kotry rozsud so jedna a što ma wón z ewangelijom tuteje njedźele zhromadneho.
Vatikan je wutworjenje Synodalneje rady w Němskej wotpokazał. Předsyda Němskeje biskopskeje konferency, biskop Georg Bätzing, pak nochce so planow wzdać.
Němski zwjazkowy sejm měł po woli Rady katolikow Drježdźansko-Mišnjanskeho biskopstwa prawniske postajenje nastupajo wotehnaće wobchować. To wuchadźa z pisma dźewjeć křesćanskim zapósłancam demokratiskich stron w zwjazkowym sejmje ze Sakskeje a wuchodneje Durinskeje.
Što měli próstwje wo zastupnistwo swjateho Bosćana dodać, rozłoži serbski duchowny w swojim prědowanju na swjedźenju woneho swjateho w Chrósćicach. Po nyšporje z procesionom rozprawješe pólski duchowny wo aktiwitach Carity swojeje diecezy za Ukrainu.
Drježdźansko-Mišnjanske a Zhorjelske biskopstwo dóstanjetej wot Bonifacijoweho skutka lětsa dohromady něhdźe 840.000 eurow. Wone maja so mjez druhim za twarske projekty a nabožne kubłanje dźěći a młodostnych nałožować.
Drohota je słowo, kotrež so w Katolskim Posole před sto lětami přeco zaso jewi. Mjez druhim podawa awtorka rubriki někotre přikłady a pisa, čehodla pokazuja kulturne drohoćinki na hišće wobšěrniši problem.
Jako hódny pokład za wosadu, za dźensnišu generaciju, ale tež za potomnikow wobhladuje awtorka publikaciju wo 250. róčnicy załoženja serbskeje wosady a poswjećenja tamnišeho Božeho domu. Kniha je nimale wupředata, někotre jednotliwe wudaća su hišće w Chróšćanskim farskim běrowje kaž tež w Budyskej Smolerjec kniharni na předań.
Na wopomnjenskim dnju a 80. posmjertninach zbóžneho martrarja Alojsa Andrickeho, pjatk, 3. februara, su we 18.30 hodź. swjedźenske kemše w ródnym Radworju. Hižo we 18 hodź. budźe biskop Heinrich Timmerevers w Drježdźanskej katedrali pontifikalne kemše swjećić. Wone wusyłaja so w interneće.
Štó rozsudźi wo smjerći čłowjeka? Tele prašenje steji w srjedźišću inscenacije „GOTT“ bestselleroweho awtora Ferdinanda von Schiracha. Na iniciatiwu Katolskeje akademije Drježdźansko-Mišnjanskeho biskopstwa a Sakskeje krajneje centrale za politiske kubłanje předstaja Würzburgske dźiwadło kruch tež mjez druhim w Drježdźanach a we Łutach.
Dom Měrćina Nowaka-Njechorńskeho w Njechornju móža zajimcy wotnětka tež digitalnje wopytać. Wodźenje bu na nastork Budyskeje župy „Jan Arnošt Smoler” natočene.
Ambulantna hospicna słužba Hornjołužiskeho zwjazka Carity z.t. w Kamjencu poskićuje lětsa zaso kurs k čestnohamtskemu přewodźenju ćežkochorych a mrějacych. Štóž chcył wukubłanje absolwować, měł so pola hospicneje słužby Carity w Kamjencu přizjewić.
Pod hesłom „Pój, wjesel so!“ přeprošuje Dekanatne dušepastyrstwo za dźěći šulerjow 1. a 2. lětnika na zhromadny dźeń do Don Boskoweho domu we Worklecach, kotryž wotměje so wutoru, 14. februara. Zajimcy měli so hač do njedźele, 5. februara, online přizjewić.
Serbska protyka
