Katolski Posoł – 28. awgusta 2022
Hdźe je moje městno jako křesćan w swěće? Tole praša so awtor w swojim zawodnym nastawku. Při tym rozmysluje wo ewangeliju tuteje njedźele w zwisku z wosobinskim dožiwjenjom.
W Zhorjelcu su so njeznaći do cyrkwje Našeje knjenje zadobyli a ju sylnje wobškodźili. Boži dom z třomi łódźemi a najdrobnišim kamjenjećesarskim dźěłom na portalu a w nutřkownym rumje słuša k hłownym twórbam pózdnjogotiskeje architektury Hornjeje Łužicy.
W klóštrje Marijinej hwězdźe w Pančicach-Kukowje wotmě so nyšpor z požohnowanjom zelow. Katolski duchowny, kotryž Božu słužbu zhromadnje z ewangelskim fararjom swjećeše, wuzběhny, zo „słuša kóždy čłowjek k Bohu“.
Lědma něchtó drje wě, zo móže so Róžant pomału na podobny jubilej kaž Wotrowska wosada přihotować. W swojim přinošku podawa awtor dohlad do stawiznow hnadowneho městna a wěnuje so při tym historiskim žórłam.
Wo zjězdźe čěskosłowakskeho zjednoćenstwa „Orel“ je Katolski Posoł w swojich awgustowskich wudaćach před sto lětami nadrobnje rozprawjał. Tole zwěsća awtorka w najnowšim přinošku swojeje rubriki. Ale tež wo dalšich zwiskach z Łužicy k susodnemu słowjanskemu krajej časopis tehdy pisachu.
Jědnaty raz poda so Serbowka lětsa na pěše putnikowanje z Waršawy na Jasnu Horu do Częstochowy. W swojej skupinje kładźechu nawodaj wažnosć na to, zo je serbšćina tež přez wótřerěčak słyšeć.
Prózdninska jězba, kotruž organizowaše Worklečanske dekanatne dušepastyrstwo za dźěći, wjedźeše młodych wobdźělnikow a jich přewodźerjow lětsa do Žitawkich horin. Tam su mjez druhim zhromadnje pućowali, krosnowali a paslili.
„Bóh chce k wšitkim ludam přińć“, přiwoła biskop Heinrich Timmerevers kolpingam Drježdźansko-Mišnjanskeje diecezy na putniskich kemšach w Róžeńće. Mjez přitomnymi běše tež kolpingowa swójba z Čěskeje. Z putnikowanjom wopominachu zdobom załoženje swojeho diecezanskeho zwjazka před sto lětami.
Hnydom dwójce změje historiska hra „Mór a lubosć“ w septembru w Chrósćicach premjeru. Wjace hač 130 wosobow předstaji žiwjenje před 600 lětami.
Farar dr. Daniel Dzikiewicz w litawskich Wojdatach wjeseli so, zo móže so nowa wosadnica njedźelu, 28. awgusta, poswjećić. Jeje wutwar su katolscy Serbja přez Towarstwo Cyrila a Metoda z.t. z wjace hač 30.000 eurami podpěrali. Wón přeproša wšěch, kotřiž njemóža so na městnje wobdźělić, to online činić.
Kemše z małym serbskim podźělom móža zajimcy tule widźeć:
Serbske ewangelske towarstwo a Maćijec swójba z Hrubjelčic přeprošujetej wšitkich Serbow a dalšich zajimcow na lětnje pućowanje a serbski swjedźeń. Wonej wotmějetej so sobotu, 3. septembra, wot 14.00 hodź.
Kulowska katolska wosada Marije donjebjeswzaća pyta wosobu, kotraž by po móžnosći hnydom hłownohamtsce městno cyrkwinskeho hudźbnika přewzała. Zajimcy měli so pola fararja dr. Wolfganga Křesáka přizjewić.
Kubłanske dny serbskeje młodźiny wotměja so wot pjatka do njedźele, 23. do 25. septembra. w Schmiedebergskim Winfriedowym domje. Zajimcy měli so hač do póndźele, 5. septembra, online přizjewić.
Dekanatne dušepastyrstwo młodźiny přeprošuje młodostnych ze wšěch serbskich wosadow na zhromadny wulět do Błótow, a to njedźelu, 11. septembra. Přizjewjenja přijimuja so hač do póndźele, 29. awgusta.
Smochčanske kubłanišćo swjateho Bena přeprošuje wot pjatka do njedźele, 14. do 16. oktobra, na tworjacy kurs „Bibliske powědace figury“. Při tym dźe wo bibliske powědace figury, kotrež mnohostronske gesty zwuraznjeja a kotrež hodźa so lochce do druheje postawy přetworić. Přeprošeni su ludźo kóždeježkuli staroby.
Na katolskej žurnalistiskej šuli ifp w Mnichowje zahaji so klětu nalěto nowy kurs žurnalistiskeho wukubłanja paralelnje k studijej. Wón traje tři lěta, w kotrychž nawuknu zajimcy zakłady žurnalizma. Požadanja přijimuja hač do 20. septembra.
Wšitcy, kotřiž chcedźa swoju wěru pohłubšić a wjace wo třoch bójskich wosobach – Wótcu, Synu a Duchu Swjatym – wuslědźić, su wot pjatka do njedźele, 2. do 4. septembra, do Smochčanskeho kubłanišća swjateho Bena přeprošeni. W zarjadowanju z titlom „BASICS – teologija skónčnje zrozumliwa: Wuznaće wěry – Bóh Wótc, Syn a Duch Swjaty“ budu so krótke impulsowe referaty z dźěłarničkami a modlenjom wotměnjeć.
W Kulowje zhladuje tamniše Arcybratstwo swjateho róžowca lětsa na 350. róčnicu swojeho załoženja. Składnostnje tutoho jubileja ma wustajeńca nastać, za kotruž móža wěriwi wosebite róžowcy abo napisane wosobinske nazhonjenja z modlenjom róžowca na tamnišej farje wotedać.
Serbska protyka
