Katolski Posoł – 28. apryla 2024
Ze znatymi płodami a jich zdónkom přirunuje serbski duchowny (nje)zwjazanosć wěriweho z Jězusom. Mjez druhim wón wuswětla, što so – tež w čłowječim žiwjenju – měnja, što wostanje a kak móžeš zwjazanosć hajić.
Boži dom Budyskich katolskich serbskich wěriwych ma so znutřka a zwonka wobarbić. Wo jeje tuchwilnym stawje je so tež jedyn ze sakskich statnych ministrow tele dny wobhonił.
Hudźbny nyšpor w Ralbicach běše mnohim přitomnym pozitiwny signal. Wuhotował běše jón dlěje hač tři lětstotki wobstejacy katolski hólči chór.
Wo jeje dožiwjenjach w chórje z 500 wosobami pisa šulerka z Ralbičanskeje wosady. Zhromadnje z přećelku a jeje bratrom běše so wona wot lońšeho lěća na wosebitym hudźbnym projekće wobdźěliła, kotryž je so nětko z koncertom w Drježdźanach zakónčił.
Wo dalokich pućowanjach serbskeho duchowneho, kotryž w Drježdźanach skutkowaše, rozprawješe Katolski Posoł před 100 lětami. Ale tež wo starosćach na polu šulstwa tehdy pisachu, kaž awtorka rubriki zwěsća.
Pod patronatom swojeho biskopa su so na lětušej 72hodźinskej akciji Zwjazka katolskeje młodźiny Němskeje (BDKJ) tež młodostni z Kulowskeje wosady wobdźělili. Mjez nimi běchu štyrjo Serbja.
We Worklečanskim Don Boskowym domje poskićuja dalekubłanje na polu prewencije před seksualizowanej namocu. Přizjewjenja přijimuja online.
Lětuši 103. zjězd katolikow wotměje so wot srjedy 29. meje, do njedźele, 2. junija, w Erfurće – runje wokoło swjedźenja Božeho ćěła. Towarstwo Cyrila a Metoda z.t. (TCM) poskićuje wěriwym ze serbskich wosadow sobotu, 1. junija, busowu jězbu do Erfurta. Přinošk za jězbu wučinja 35 eurow na wosobu. Zajimcy měli so w redakciji Katolskeho Posoła přizjewić.
Chróšćanska wosada so tuchwilu na swoju 800. róčnicu prěnjeho naspomnjenja klětu přihotuje. K jubilejej ma w meji 2025 w Budyskim Ludowym nakładnistwje Domowina (LND) kniha wuńć. LND prosy wšitkich, kotřiž maja dotal njeznate historiske fota ze žiwjenja w Chrósćicach a wokolnych wsach – wosebje fota hač do Druheje swětoweje wójny a z NDRskeho časa –, so přizjewić.
Na literarno-hudźbne zarjadowanje Budyskeho Serbskeho ludoweho
ansambla (SLA) su wšitcy zajimcy tutu njedźelu, 28. apryla,
w 17.00 hodź. do Radworskeho hosćenca „Meja“ přeprošeni. Basnica Róža Domašcyna čita swoje teksty z pu blikacije „Prjedy hač
woteńdźeš“ w serbskej rěči. K tomu pokazaja wobrazy poslednich
nošerkow narodneje drasty. Smyčkowy orchester SLA z hudźbu
Měrćina Weclicha a dalšich serbskich komponistow zarjadowanje
wobrubi.
We Wósporku je hišće hač do soboty, 11. meje, dožiwjenska wustajeńca wo bibliji přistupna. Pod hesłom „Qumran, Luther a biblija: Wot klinoweho pisma k nanobibliji, Jezajowa róla a mnoho dalšeho. Najwjetša mobilna bibliska wustajeńca Europy“ pokazuja w přehladce mjez druhim wosebite wudaća Swjateho pisma kaž tež zajimawostki k jeje stawiznam. Wustajeńca je wšědnje wot 14.00 do 18.00 hodź. wotewrjena, njedźelu hižo wot 11.00 hodź.
Wěriwi z Němskeje, Pólskeje a Čěskeje su sobotu, 11. meje, na putnikowanje wujednanja do čěskich Hejnic prošeni. Boža mša w hnadownej cyrkwi zahaji so w 10.30 hodź.
Na dźěłarničce k pjelsćowanju črijow su wšitcy zajimcy do Smochčanskeho kubłanišća swjateho Bena přeprošeni. Kurs za započatkarjow so wot štwórtka, 30.meje, do njedźele, 2. junija, wotměje, dalši dźěl za pokročenych pak wot štwórtka do njedźele, 20. do 23. junija. Přizjewjenja přijimuja hač do póndźele, 6. meje.
Smochčanske kubłanišćo swjateho Bena přeprošuje wšitkich zajimcow na seminar pod hesłom „Mocy rostlinow – dźiwje zela, hojenske rostliny a drohotne esency“. Tón wotměje so wot pjatka do njedźele, 7. do 9. junija. Přizjewjenja su hač do pjatka, 17. meje móžne.
Serbska protyka
