Katolski Posoł – 27. oktobra 2024
Wo prašenju w ewangeliju tuteje njedźele, kiž staja Jězus kóždemu křesćanej, pisa awtor w swojim zawodnym nastawku. Zdobom pozbudźa wón k zwólniwosći a dowěrje, so hłosej Božemu wotewrěć a so wot njeho wjesć dać.
Ze swojej lětušej akciju w měsacu swětoweho misionstwa skedźbnja biskopski pomocny skutk Missio na pacifiski kupowy swět sewjerowuchodnje Awstralskeje. Zběrka za to budźe tutu njedźelu, 27. oktobra.
Wjacori katolscy Serbja buchu z Mytom Domowiny, z tym za dorost a z Čestnym znamješkom Domowiny počesćeni. Mjez nimi je tež młoda hudźbna skupina.
Zhromadne wojowanje za zwoprawdźenje swojich přećow a žadosćow kaž tež znowarjadowanje žiwjenje steja w srjedźišću noweje serbskeje komorneje hry. Wona bu nětko w Radworju premjernje předstajena. Dalše předstajenja budźa tohorunja na wšelakich wsach dwurěčnych gmejnow.
Překwapjenku dožiwichu wěriwi Wotrowskeje wosady na swojej kermušnej njedźeli. Zašo hač planowane móža tam wotnětka woporne swěčki na nowym městnje postajić.
Wón běše za Boha a za swój mały serbski narod žiwy kaž tež wurjadny znajer serbskeje rěče. Nětko bu Jurij Šěrak do wěčnosće wotwołany.
Mału drohoćinku nańdźe awtorka rubriki w jednym z oktoberskich wudaćow Katolskeho Posoła před sto lětami. Zdobom pisachu tam wo wšelakich podawkach swětoweje cyrkwje.
Z přećelstwom zaběrachu so wobdźělnicy zhromadneju dnjow w nazymskich prózdninach w Don Boskowym domje we Worklecach. Po katechezy móžachu so tohorunja na kreatiwne wašnje zaběrać.
Nowu wustajeńcu z wudźěłkami Mikławša Dyrlicha z Noweje Wjeski pod titulom „Wěrywuznaće w drjewje“ wotewrje Budyska Serbska kulturna informacija sobotu, 2. nowembra, w 15.00 hodź. w swojich rumnosćach na přizemju Serbskeho domu na Póstowym naměsće 2. K tomu zahraje dujerska kapała Horjany.
Na hudźbny nyšpor mjez druhim z twórbami serbskeju komponistow Jana Cyža a Ulricha Pogody su wěriwi do Baćońskeje cyrkwje Jězusoweje wutroby přeprošeni. Tón budźe njedźelu, 3. nowembra, w 14.00 hodź. Na pišćelach hraje ze wsy pochadźacy organist Tomaš Žur a na saksofonje Gerold Gnausch.
Zakónčacy koncert Budyskeje chóroweje akademije generacijow budźe sobotu, 9. nowembra, w 17.00 hodź. w Budyskej Marije-Marćinej cyrkwi. Na njej wobdźěli so 57 spěwarjow 16 do 79 lět, mjez nimi tójšto Serbow. Na koncerće zaklinča mjez druhim twórby Jana Pawoła Nagela a Wolfganga Amadeusa Mozarta. Cyłkowny nawod ma Friedemann Böhme. Zastup je darmotny.
Hornjołužiski zwjazk Carity pyta k najblišemu móžnemu terminej za swoju Dnjowu hladarnju „Při Krabatowym puću“ we Worklecach přidatnu wosobu za hladanje a wobstaranje. Požadanja přijimuje nawodnica dnjoweje hladarnje Jěwa-Marja Šnajderowa we Worklecach.
Na próstwu Towarstwa Cyrila a Metoda z.t. (TCM) poskićuje Norman Reitner z Drježdźanskeho biskopskeho ordinariata kurs k tomu, kak móžeš projekty derje planować a k tomu pjenjezy na wšelakore wašnje požadać. Dalekubłanje na polu sponsoring a foundraising wotměje so sobotu, 9. nowembra, wot 9.00 do 16.00 hodź. na „Radlubinje“ w Ralbicach. Zajimcy – nimo čłonow TCM su tež dalši přeprošeni – měli so online přizjewić.
Towarstwo Cyrila a Metoda z.t. (TCM) chce tež lětsa ze swojej nazymskej akciju „Łužica pomha“ diecezanskemu zwjazkej Carity w pólskim Ełku zaso pomhać. Tam wjesela so nade wšěm, štož w swójbje trjebaš, kaž su to drasta, črije, artikle hygieny a kosmetika za žony a dźěći, ale tež płokanski próšk, kuchinske graty abo pampersy za dźěći runje tak kaž za dorosćenych. Wotedać hodźa so dary sćěhowace dny pola Špitankec w Zejicach, Kamjenska dróha 10: po pjatkomaj, 8. a 15. nowembra, stajnje wot 15.00 do 18.00 hodź. kaž tež sobotu,
9. nowembra, wot 9.00 do 12.00 hodź. a sobotu, 16. nowembra, wot 9.00 do 11.00 hodź.
Klětu přeprošuje dušepastyrstwo młodźiny we Worklecach wospjet na seminaraj k přihotej na sakrament mandźelstwa. Wonej wotmějetej so stajnje pjatk a sobotu, 7. a 8. februara kaž tež 28. a 29. nowembra, w Smochčanskim kubłanišću swjateho Bena. Přizjewjenja přijimuje dekanatne dušepastyrstwo hač do srjedy, 8. januara, online.
Prěni dźěl přichodneho wukubłanja JuLeiCa, kotrež poskići Worklečanske dekanatne dušepastyrstwo za młodźinu, njebudźe kaž dotal připowědźene klětu w januarje, ale hakle wot pjatka do njedźele, 4. do 6. apryla, w Smochčanskim kubłanišću swjateho Bena. Druhi dźěl wotměje so, kaž planowane, wot 25. do 27. apryla na samsnym městnje. Přizjewjenja přijimuja hač do srjedy, 8. januara, online.
Drježdźansko-Mišnjanske biskopstwo přeprošuje wěriwych we wobłuku Swjateho lěta na diecezanske putnikowanje z biskopom Heinrichom Timmereversom do Roma. Wone wotměje so wot soboty do soboty, 11. do 18. oktobra 2025.
Serbska protyka
