Katolski Posoł – 27. awgusta 2023
Wo wuznaću a krutej skale pisa serbski duchowny w swojim zawodnym nastawku. Zdobom wón wuswětla, što matej wonej z podawkom zhromadneho, kotryž wotmě so njedawno w serbskej wsy.
Wuraz dźaka a wjesela za spomóžne lěta skutkowanja běše předstajenje oratorija w Budyskej „Krónje“. Zdobom je so při tym we Łužicy znaty cyrkwinski hudźbny direktor ze serbskim spěwnym ćělesom rozžohnował.
Wšelake hudźbne projekty je dotalny wuměłski nawoda 1. serbskeje kulturneje brigady tež z Towarstwom Cyrila a Metoda z.t. přewodźał a zwoprawdźił. Na to pokaza předsyda towarstwa Cyril Hančik w swojich dźaknych słowach, kotrež su w Katolskim Posole wozjewjene.
„Serbska narodna drasta:
Wjace hač šat“ rěka němskorěčna
dokumentacija Budyskeju
filmowcow Pětra Symanka
a jeho bratra Stefana. Telewizijny sćelak MDR wusyłaše ju w swojim rjedźe „Der
Osten – Entdecke, wo du
lebst“.
Tójšto swjedźenjow mějachu w Serbach před 100 lětami. Tole zwěsći awtorka rubriki při listowanju w tehdyšich wudaćach Katolskeho Posoła. Ale tež wo časopisu samym a jeho wysokej płaćiznje tehdy pisachu.
Ansambl, kotryž słuša k najlěpšim interpretam wokalneje hudźby renesansy kaž tež baroka a kiž je po wšej Europje znaty, koncertowaše w serbskej wosadnej cyrkwi. Dochody wužiwaja za ponowjenje tamnišich pišćelow kaž tež za wupaleny Boži dom.
Što móže zelerstwo za wšědne žiwjenje być? Wo tym prědowaše ewangelski duchowny zelowu njedźelu na zahrodźe klóštra Marijineje hwězdy w Pančicach-Kukowje. Katolski duchowny, kotryž nyšpor sobu swjećeše, na nim tež zela žohnowaše.
Na swjatočnej Božej mši w cyrkwi klóštra Marijineje hwězdy dožiwichu kemšerjo premjeru z wosebitostku. Předstajeny hudźbny kruch je tamnišim cistercienskim sotram wěnowany.
„Młodźenco, praju ći: Stań!“ rěkaše hesło lětušeho putnikowanja młodźiny do Krupki. Na nje poda so lětsa wšelakich přičin dla jeničce mała skupinka.
Wona běše poslednja nošerka serbskeje katolskeje drasty w Chrósćicach. Nětko je Hana Brězanowa na prawdu Božu wotešła.
Katolska domowa hudźba při Budyskej tachantskej cyrkwi swjateho Pětra zahaji w zymskim semestrje chórowy spěwny kubłanski projekt za dźěći a młodostnych w šulskej starobje. Přizjewjenja přijimuja hač do njedźele, 24. septembra.
Na slědach Michała Hórnika móža sej zajimcy njedźelu, 3. septembra, Worklecy wotkryć. Na zabawne popołdnjo přeprošuje sekcija „Swójba“ Towarstwa Cyrila a Metoda z.t.
Pod hesłom „Zo byšće žiwjenje w połnosći měli“ su zajimcy na lětuši Dźeń Božeje stwórby přeprošeni. Wón wotměje so pjatk, 1. septembra, w Ochranowje.
Serbska dekanatna młodźina je tež lětsa na zhromadny wulět přeprošena. Tón budźe njedźelu, 3. septembra. Přizjewjenja přijimuja hač do wutory, 29. awgusta, online.
Dekanatne dušepastyrstwo młodźiny we Worklecach přeprošuje wšitkich młodostnych wot 8. lětnika kaž tež młodych dorosćenych na seksualnopedagogisku dźěłarničku WaageMut®. Wona wotměje so sobotu, 9. septembra, na „Radlubinje“ w Ralbicach. Přizjewjenja su hač do wutory, 29. awgusta, móžne.
Na putnikowanje z kolesom přeprošuje Smochčanske kubłanišćo swjateho Bena wšitkich zajimcow wot njedźele, 24. septembra, do njedźele, 1. oktobra. Nawod změjetaj farar Thomas Cech ze Žitawy a Alojs Rječka z Łužnicy.
Serbska protyka
