Katolski Posoł – 26. junija 2022
W aktualnym wudaću nańdźeće mjez druhim tole:
Kak bu bójska wutroba za čłowjeka wotewrjena? Wotmołwu na tele prašenje podawa awtor w swojim zawodnym nastawku. Zdobom wón rozłožuje, kotra wutroba je přikład za wěriwych a k čemu chce wona jich posylnjeć.
Delegacija Drježdźansko-Mišnjanskeho biskopstwa a Swobodneho stata Sakskeje, mjez nimi biskop Heinrich Timmerevers a ministerski prezident Michael Kretschmer, přebywaše w Romje a Vatikanje. Na zetkanju z bamžom Franciskusom pak so biskop njewobdźěli.
Drježdźansko-Mišnjanski biskop Heinrich Timmerevers je so z listom k předźěłanju padow seksualneje namocy a runočasnje z namołwu k sobuskutkowanju w přiradźe potrjechenych na wosady, zhromadźenstwa a zarjadnišća w swojej diecezy wobroćił. Tutón je w cyłku w Katolskim Posole wozjewjeny.
Po dwulětnym přetorhnjenju koronoweje pandemije dla poda so 32 serbskich samostejacych zaso na zhromadny cyłodnjowski wulět. Tón wjedźeše jich lětsa do kónčiny z jeno 1,8 procentami katolikow. W bazilice swjećeše z nimi serbski kapłan Božu mšu
Pasionske hry z njewočakowanym wobsahom dožiwi čitarka Katolskeho Posoła w Awstriskej. Rozprawjejo wo tym so wona praša, hač běše Judašowa přerada Chrystusa trěbna, zo by tón na zakładźe toho swoje žiwjenje zwoprował a skónčnje swět přez swoje zrowastanjenje wumóžił.
Wo wosebitym darje za wosadny jubilej pisa awtorka w swojim poslednim přinošku składnostnje 250. róčnicy załoženja Wotrowskeje wosady, kotruž woswjeća wot štwórtka do njedźele, 23. do 26. junija. Mjez druhim předstaji wona nowostki w Božim domje kaž tež barbny koncept.
Kak móhli serbsku narodnu drastu młodej generaciji spřistupnić? Tele prašenje pohnu sobudźěłaćerjow Budyskeho Serbskeho muzeja, raz přez płót k susodam pohladać. Jako inspiracija słužeše słowakski fotowy projekt.
K čemu čłowjek čas nałožuje, wo tym móžeš w Katolskim Posole před 100 lětami čitać. Ale tež přeprošenje na zhromadźiznu Towarstwa Cyrila a Metoda kaž tež powěsć wo měšniskej swjećiznje Serba w Münsteru namaka awtorka tuteje rubriki w junijskich wudaćach časopisa z lěta 1922.
W klóštrje Marijinej hwězdźe w Pančicach-Kukowje wotmě so wospjet klóšterski a swójbny swjedźeń, kotryž měješe tež serbske elementy. Z něhdźe 2.000 wopytowarjemi pak je zarjadowanje tójšto mjenje ludźi wopytało hač do koronoweje pandemije.
Smochčanske kubłanišćo swjateho Bena a Serbski ludowy ansambl přeprošujetej pjatk a sobotu, 1. a 2. julija, na Smochčanski hudźbny swjedźeń pod hesłom „Čěskej nocy“. Na woběmaj wječoromaj wustupitej mjez druhim čěska folklorna band Cimbálová hudźba Jiřiho Janouška a wirtuozna folklorno-klasiska huslerka Markéta Janouškova.
Pod hesłom WERT.VOLL.LEBEN přeprošujetej Drježdźansko-Mišnjanskeho biskopstwo a Rada katolikow wšitkich wěriwych a zajimcow na prěni diecezanski wobswětowy dźeń. Wón wotměje so sobotu, 9. julija, wot 10 hodź. na centralnej deponiji w Cröbernje pola Lipska.
Serbska protyka
