Katolski Posoł – 25. awgusta 2024
Wo křesćanskim puću a tym, kak prašacym a sprawnje pytacym wotmołwjeć, rozmysluje serbski duchowny w swojim zawodnym nastawku. Mjez druhim wón rozłoži, štó je prěni zaměr a zmysł žiwjenja a čehodla je zwjazanosć z Bohom spomóžna.
W čěskej Raspenavje dožiwichu wěriwi patronatnu Božu mšu Marije donjebjeswzaća. Mjez kemšerjemi běše tež mnoho Serbow.
W Ralbicach buchu na Božej mši nowi młodostni přiwzaći. Jako znamjo přisłušnosće wosadnej młodźinje dóstachu wot fararja Šćěpana Delana křesćanski symbol, kotryž běchu třo wosadni zhotowili.
Miłočanski Křesćansko-socialny kubłanski skutk z.t. je tež lětsa zhromadnje z abatisu Gabrielu Hesse a konwentom cistercienskow klóštra Marijina hwězda na zelowu njedźelu přeprosył. Na zakónčacym nyšporje móžachu sej přitomni wospjet zelowe kwěćele žohnować dać.
„Stare nowosće“ nańdźe awtorka w Katolskim Posole před 100 lětami. Mjez druhim wěnowachu so tehdy přenjesenju Božich mšow w radiju kaž tež zjězdej na čěskim putniskim městnje Velehradźe.
Bratstwo swjateho Bosćana je na informaciski přednošk wo Drježdźanskim towarstwje Sonnenstrahl e.V. přeprosyło. Jeho jednaćel předstaji čłonam bratstwa a dalšim zajimcam nadawki a dźěławosć towarstwa.
Na swojim lětušim wulěće poda so Radworski swójbny kružk do Wotrowa. Tam zhonichu tójšto zajimaweho wo stawiznach cyrkwje a hrodźišća.
W maćernym domje šulskich sotrow Našeje lubeje knjenje w Auerbachu w Hornjej Falcy zadrasća srjedu, 28. awgusta, dwě nowicce, mjez nimi Serbowku Wiktoriju Bejmic ze Sulšec pola Kulowa. Swjatočna Boža mša, kotruž woswjeći Bambergski arcybiskop Herwig Gössl, zahaji so w 10.00 hodź. Sćelak KTV ju live přenjese.
Towarstwo Cyrila a Metoda z.t. (TCM) přeprošuje Serbow w starobje něhdźe 35 do 55 lět na zhromadne dny do Prahi. Jězba wotměje so wot póndźele 30. decembra, do srjedy, 1. januara. Silwester chcedźa z čěskimi přećelemi Serbow w Serbskim seminarje swjećić. Přizjewjenja přijimuje Daniela Handrikowa, čłonka předsydstwa TCM, hač do pjatka, 30. awgusta.
Smochčanske kubłanišćo swjateho Bena a załožba Carity w Drježdźansko-Mišnjanskim biskopstwje přeprošujetej we wobłuku rjadu „Smochčanske jewišćo“ na beneficny koncert ze serbskej spěwarku Helenu Hejduškec do tamnišeho domu. Tón budźe njedźelu, 25. awgusta, w 16.00 hodź.
Přichodny seminar k přihotej na sakrament mandźelstwa budźe
pjatk a sobotu, 29. a 30. nowembra, w Smochčanskim kubłanišću swjateho Bena. Přizjewjenja přijimuje Dekanatne dušepastyrstwo młodźiny we Worklecach hač do srjedy, 28. awgusta, online.
Drježdźansko-Mišnjanske biskopstwo přeprošuje wěriwych we wobłuku Swjateho lěta na diecezanske putnikowanje z biskopom Heinrichom Timmereversom do Roma. Wone wotměje so wot soboty do soboty, 11. do 18. oktobra 2025.
Serbska protyka
