![](https://www.posol.de/wp-content/uploads/2023/09/2023-09-24__INTERNET-predloha-titul__135__-850x580.jpg)
Katolski Posoł – 24. septembra 2023
Wo dobrej powěsći w ewangeliju tuteje njedźele pisa awtor w swojim zawodnym nastawku. Zdobom wón rozłoži, čehodla štó kotru mzdu dóstanje.
![](https://www.posol.de/wp-content/uploads/2023/09/01-6.jpg)
Diecezanski archiw Drježdźansko-Mišnjanskeho biskopstwa w Budyšinje dóstanje we wobłuku pilotoweho projekta spěchowanske pjenjezy, zo by swój drohotny historiski wobstatk wopismow zawěsćił. Mjez dokumentami su tež wuznamne bamžowske a kejžorske wopisma.
![](https://www.posol.de/wp-content/uploads/2023/09/02-4.jpg)
Serbski nałožk steji w srjedźišću noweje Serbskeje Protyki za lěto 2024. W praktiskej rubrice wěnuje so młody awtor a student mediciny hojenju a lěkarstwu.
![](https://www.posol.de/wp-content/uploads/2023/09/03-4.jpg)
Młodźinski dekanatny kružk pyta zwólniwych, kotřiž bychu sobu dźěłali a swoje ideje zaplesć dali. W interviewje rozłoži młodźinska referentka Lucija Škodźina mjez druhim hłowne nadawki a wuměnjenja, kotrež měli zajimcy spjelnić.
![](https://www.posol.de/wp-content/uploads/2023/09/04-4.jpg)
W bayerskim Waalu wotmě so zetkanje němskich skupin zjednoćenstwa Europasion. Pozadk běše 400lětna tradicija předstajenja pasionskich hrow na městnje.
![](https://www.posol.de/wp-content/uploads/2023/09/05-4.jpg)
Najnowše wudaće Ochranowskich hesłow za lěto 2024 je w Budyskim Ludowym nakładnistwje Domowina w serbskej rěči wušło. Zešiwk předleži jako zhromadne wudaće ze Serbskim ewangelskim towarstwom.
![](https://www.posol.de/wp-content/uploads/2023/09/06-3.jpg)
We Worklečanskej dnjowej hladarni swjećachu srjedź septembra domchowanku. Zhromadny nyšpor wuhotowachu jeje sobudźěłaćerjo.
![](https://www.posol.de/wp-content/uploads/2023/09/07-3.jpg)
Wo financielnych ćežach a druhich swětnych naležnosćach pisaše Katolski Posoł před sto lětami. Zdobom nańdźe awtorka nawěšk, kotryž běše po jeje posudku drje „chutnje měnjeny – ale njewotpohladnje spodźiwny žort wuskutkuje“.
![](https://www.posol.de/wp-content/uploads/2023/09/08-3.jpg)
Za dźěći předleži nowy nabožny spěwnik w serbskej rěči. Jeho wudaće běše jeničce z podpěru mnohich čestnohamtskich pomocnikow móžne.
![](https://www.posol.de/wp-content/uploads/2023/09/09-3.jpg)
Kak ma wohnjowa wobora ludźi wuchować, kotřiž njemóža hižo sami chodźić? To a něštožkuli druhe zwučowachu čłonojo wjacorych woborow njedawno w katolskej starowni.
![](https://www.posol.de/wp-content/uploads/2023/09/10-1.jpg)
Předstajenje hry „Mór a lubosć“ móža sej zajimcy wotnětka jako film wobhladać. Wón je w interneće přistupny.
![](https://www.posol.de/wp-content/uploads/2023/09/10.jpg)
Worklečanske młodźinske dušepastyrstwo přewjedźe tež klětu zaso za zajimcow kurs JULEICA. Wukubłanje wobsteji z dweju dźělow a wotměje so stajnje wot pjatka do njedźele, 2. do 4. februara, kaž tež wot 26. do 28. apryla, w Smochćicach, tam z přenocowanjom. Zajimcy měli so nimo toho na kursu prěnjeje pomocy wobdźělić. Tón budźe sobotu, 2. měrca, we Worklečanskim Don Boskowym domje. Přizjewjenja přijimuja online.
![](https://www.posol.de/wp-content/uploads/2023/09/JULEICA_.jpg)
We wobłuku koncertoweje jězby přeprošuje wokalowy ansambl TonArt z Münstera na tři koncerty w Hornjej Łužicy. Mjez druhim předstaji němski oratorij „Wěra, nadźija, lubosć“ serbskeho komponista Feliksa Brojera z Budyšina. Předstajenja su sobotu, 30. septembra, w 17.00 hodź. w klóšterskej cyrkwi w Pančicach-Kukowje, njedźelu, 1. oktobra, w 17.00 hodź. w ewangelskej cyrkwi we Wjazońcy a póndźelu, 2. oktobra, w 19.00 hodź. w Budyskej Marije Marćinej cyrkwi.
![](https://www.posol.de/wp-content/uploads/2023/09/11-2.jpg)
Serbska protyka
![](https://www.posol.de/wp-content/uploads/2022/06/protyka_logo_hsb.png)