Katolski Posoł – 24. septembra 2023
Wo dobrej powěsći w ewangeliju tuteje njedźele pisa awtor w swojim zawodnym nastawku. Zdobom wón rozłoži, čehodla štó kotru mzdu dóstanje.
Diecezanski archiw Drježdźansko-Mišnjanskeho biskopstwa w Budyšinje dóstanje we wobłuku pilotoweho projekta spěchowanske pjenjezy, zo by swój drohotny historiski wobstatk wopismow zawěsćił. Mjez dokumentami su tež wuznamne bamžowske a kejžorske wopisma.
Serbski nałožk steji w srjedźišću noweje Serbskeje Protyki za lěto 2024. W praktiskej rubrice wěnuje so młody awtor a student mediciny hojenju a lěkarstwu.
Młodźinski dekanatny kružk pyta zwólniwych, kotřiž bychu sobu dźěłali a swoje ideje zaplesć dali. W interviewje rozłoži młodźinska referentka Lucija Škodźina mjez druhim hłowne nadawki a wuměnjenja, kotrež měli zajimcy spjelnić.
W bayerskim Waalu wotmě so zetkanje němskich skupin zjednoćenstwa Europasion. Pozadk běše 400lětna tradicija předstajenja pasionskich hrow na městnje.
Najnowše wudaće Ochranowskich hesłow za lěto 2024 je w Budyskim Ludowym nakładnistwje Domowina w serbskej rěči wušło. Zešiwk předleži jako zhromadne wudaće ze Serbskim ewangelskim towarstwom.
We Worklečanskej dnjowej hladarni swjećachu srjedź septembra domchowanku. Zhromadny nyšpor wuhotowachu jeje sobudźěłaćerjo.
Wo financielnych ćežach a druhich swětnych naležnosćach pisaše Katolski Posoł před sto lětami. Zdobom nańdźe awtorka nawěšk, kotryž běše po jeje posudku drje „chutnje měnjeny – ale njewotpohladnje spodźiwny žort wuskutkuje“.
Za dźěći předleži nowy nabožny spěwnik w serbskej rěči. Jeho wudaće běše jeničce z podpěru mnohich čestnohamtskich pomocnikow móžne.
Kak ma wohnjowa wobora ludźi wuchować, kotřiž njemóža hižo sami chodźić? To a něštožkuli druhe zwučowachu čłonojo wjacorych woborow njedawno w katolskej starowni.
Předstajenje hry „Mór a lubosć“ móža sej zajimcy wotnětka jako film wobhladać. Wón je w interneće přistupny.
Worklečanske młodźinske dušepastyrstwo přewjedźe tež klětu zaso za zajimcow kurs JULEICA. Wukubłanje wobsteji z dweju dźělow a wotměje so stajnje wot pjatka do njedźele, 2. do 4. februara, kaž tež wot 26. do 28. apryla, w Smochćicach, tam z přenocowanjom. Zajimcy měli so nimo toho na kursu prěnjeje pomocy wobdźělić. Tón budźe sobotu, 2. měrca, we Worklečanskim Don Boskowym domje. Přizjewjenja přijimuja online.
We wobłuku koncertoweje jězby přeprošuje wokalowy ansambl TonArt z Münstera na tři koncerty w Hornjej Łužicy. Mjez druhim předstaji němski oratorij „Wěra, nadźija, lubosć“ serbskeho komponista Feliksa Brojera z Budyšina. Předstajenja su sobotu, 30. septembra, w 17.00 hodź. w klóšterskej cyrkwi w Pančicach-Kukowje, njedźelu, 1. oktobra, w 17.00 hodź. w ewangelskej cyrkwi we Wjazońcy a póndźelu, 2. oktobra, w 19.00 hodź. w Budyskej Marije Marćinej cyrkwi.
Serbska protyka
