Katolski Posoł – 24. měrca 2024
Wo kwintesency křesćanstwa pisa serbski duchowny w swojim zawodnym nastawku. Zdobom wón tež na to pokaza, čehodla je wona křesćanam kaž špihel.
Katolska a ewangelska cyrkej w Sakskej stej so hladajo na lětuše wólbne lěto na zhromadnu iniciatiwu dojednałoj. Wosady, gremije a skupiny na wšelakich runinach su tohorunja přeprošene, so same aktiwnje na tym wobdźělić.
Wo symbolu bołmončki pisa awtor w dalšim dźělu swojeje póstneje serije. Mjez druhim wón wuswětla, čehodla móže pomhać, hdyž křesćenjo swoje nutřkowne nastajenje hladajo na wony dźeń a slědowace dny změnja.
W kapałce na kromje serbskeje wsy pokaza so srjedź měrca njerozjasnjomny fenomen. Drježdźansko-Mišnjanske biskopstwo a administrator wosady pak ke kedźbliwosći namołwjatej.
Pod hesłom „Štož syješ, to žněješ“ putnikowachu młode swójby ze serbskich wosadow do Róžanta. W swojim prědowanju skedźbni serbski duchowny na zakładźe jednoreho wobraza, što je za zbožownu swójbu trěbne.
Na wšelakich stacijach móžachu so wobdźělnicy nócneho modlenja serbskeje dekanatneje młodźiny w Baćonju z temu „Fan abo follower?“ rozestajeć. W ćišinje abo w formje chwalospěwa móžachu zdobom swoje naležnosće Bohu dowěrić.
Cyrkwinsko-stawizniska konferenca w Budyskim Serbskim domje je wulki wothłós žnjała. Na njej wěnowachu so serbscy, němscy, awstriscy a čěscy referenća mjez druhim hranicy a kultury přesahowacym wuměnjenskim procesam.
Přehlad Božich słužbow wot bołmončki hač do jutrowneje póndźele w serbskich wosadach je tule zestajany. Wón předleži w serbskej a němskej rěči.
Křižowy puć modli so dekanatna młodźina bołmončku, 24. měrca, w 14.00 hodź. w Šunowje a Konjecach. Započatk je w kapałce na klóšterskim kuble w Šunowje. Młodostni jednotliwych wosadow njech přinjesu swój młodźinski baner sobu. Trěbna digitalna knižka za křižowy puć budźe wot štwórtka, 21. měrca, na internetowej stronje dekanatneho dušepastyrstwa młodźiny k dispoziciji.
Wulkeho zajima dla je spirituelna zwukowa instalacija „Lubowany“ w Rakečanskej ewangelskej cyrkwi dlěje přistupna, a to hač do njedźele, 14. měrca. Boži dom je wšědnje wot 9.00 do 20.00 hodź. wotewrjeny.
Smochčanske kubłanišćo swjateho Bena přeprošuje na dny k praktiskej žiwjenskej pomocy a swójskim nazhonjenjam pod hesłom „Kak to jeno rozrisam? Systemiske nastajenje k wujasnjenju wosobinskich naležnosćow“. Kurs wotměje so stajnje wot pjatka do njedźele, 5. do 7. apryla, kaž tež 25. do 27. oktobra.
W lětušej jutrownej wustajeńcy Budyskeho Serbskeho muzeja, kotraž budźe wot njedźele, 17. měrca, hač do njedźele, 5. meje přistupna, wěnuja so zaso nałožkam a tradicijam Serbow wot zeleneho štwórtka hač k jutrońčce.
Zdobom zhonja zajimcy w muzeju wjace ke kmótřiskim daram ze serbskim hrónčkom.
Dekanatne dušepastyrstwo za dźěći přeprošuje šulerki a šulerjow 5. do 8. lětnika w lětnich prózdninach na jězbu do Lückendorfa w Žitawskich horach. Wona wotměje so wot póndźele do pjatka, 8. do 12. julija. Přizjewjenja přijimuja hač do njedźele, 31. měrca, online.
Serbska protyka
