Katolski Posoł – 24. julija 2022

W aktualnym wudaću nańdźeće mjez druhim tole:

Štó woprawdźe do toho wěri, zo so modlitwy wusłyša? Tole praša so awtor zawodneho nastawka. W swojich wuwjedźenjach poćahuje so wón na wuprajenje „Prošće a dóstanjeće“, kotrež jewi so na wjacorych městnach Noweho zakonja, a rozłoži, kak maja je křesćenjo zrozumić.

Štyri cistercienske klóštry tworja nowu kongregaciju. Z tym njepodsteji tež hižo klóšter Marijina hwězda w Pančicach-Kukowje direktnje generalnemu abtej w Romje. Vatikanski rjadniski dekasterij je tutomu noworjadowanju přihłosował.

Wosebitu Božu mšu dožiwichu tři holcy a dwaj hólcaj w Radworju. Na njej slubichu, zo chcedźa jako ministranća nadawki na Božich słužbach přewzać.

W Chróšćanskim Hórnikowym domje zetkachu so spěwarjo, dźiwadźelnicy a rejowarjo, kotřiž skutkuja w nowej spěwohrě „Z TOBU – Bohu swjećene lěto“ sobu, k prěnjej zhromadnej probje. Premjera budźe pjatk, 21. oktobra, we 18.00 hodź. w Chróšćanskej wjacezaměrowej hali „Jednota“.

Cyłe žiwjenje čłowjeka – wot kolebki hač do smjerće – je jeničke pućowanje, pisa awtor w swojim rozmyslowanju. Zdobom pokaza wón na winowatosće křesćana a přirunuje je ze směrnicami w nadróžnym wobchadźe.

W Kamjenej woswjećichu wobydlerjo wsy a dalši z Bronja a Radworja patronatny swjedźeń swojeje wjesneje kapałki. Ta je swjatej Marhaći poswjećena.

Něhdyši Zdźěrjanski hajnik běše spokojny a dźakliwy čłowjek. Próstwa jandźelej pěstonej bě přeco wěsty wobstatk jeho žiwjenja a lubosć k Božej stwórbje jeho powołanje. Nětko je Wjacław Kokla na prawdu Božu wotešoł.

Z mjezynarodnej hudźbu je něhdźe 600 ludźi w Róžeńće swoju wěru swjećiło. Nimo znatych pěsnjow a hudźbnikow słyšachu přitomni tež swědčeni wo wěrje dweju młodeju křesćanow z Irskeje a Němskeje.

Něhdźe 700 dźěći a młodostnych kaž tež jich přewodnicy wobdźělichu so na lětušim putnikowanju dźěći Drježdźansko-Mišnjanskeho biskopstwa do Róžanta. Mjez nimi běchu tež dźěći ze serbskich wosadow.

W swojich wjace hač sydom lětdźesatkach jako cistercienska w klóštrje Marijina hwězda hladaše wona mjez druhim kwětki w zahrodźe, klóšterski kěrchow, ale tež chorych. Znata běše zdobom za swój humor a swoje dźiwadźelniske kmanosće. W žohnowanej starobje je sotra Maria Ida Schicketanz nětko do wěčnosće wotešła.

Serbske ewangelske towarstwo a Maćijec swójba z Hrubjelčic přeprošujetej wšitkich Serbow a dalšich zajimcow na lětnje pućowanje a serbski swjedźeń. Wonej wotmějetej so sobotu, 3. septembra, wot 14.00 hodź.

Smochčanske kubłanišćo swjateho Bena přeprošuje wot srjedy do njedźele, 31. awgusta do 4. septembra, na putnikowanje z kolesom. Mjez druhim wopytaja wobdźělnicy Zhorjelc, Kulow a Worklecy. Přizjewjenja přijimuja hač do srjedy, 10. awgusta, online.

Składnostnje 150. narodnin biskopa Christiana Schreibera přeproša Smochčanske kubłanišćo swjateho Bena, Berlinska arcydieceza kaž tež tamniša Katolska akademija wšitkich zajimcow na seminar k jeho žiwjenju a skutkowanju. Tutón wotměje so wot štwórtka do pjatka, 1. a 2. septembra w Schmochćicach. Přizjewjenja za zarjadowanje přijimuja so hač do póndźele, 15. awgusta.

Dekanatne dušepastyrstwo młodźiny přeprošuje młodostnych ze wšěch serbskich wosadow na zhromadny wulět do Błótow, a to njedźelu, 11. septembra. Přizjewjenja přijimuja so hač do póndźele, 29. awgusta.

W Kulowje zhladuje tamniše Arcybratstwo swjateho róžowca lětsa na 350. róčnicu swojeho załoženja. Składnostnje tutoho jubileja ma wustajeńca nastać, za kotruž móža wěriwi wosebite róžowcy abo napisane wosobinske nazhonjenja z modlenjom róžowca na tamnišej farje wotedać.

Serbska protyka

Katolski Posoł – 24. julija 2022

W aktualnym wudaću nańdźeće mjez druhim tole:

popularne wudaća

…

zašłe wudaća

dalše informacije