Katolski Posoł – 21. meje 2023
Na kotre wašnje křesćenjo cyrkej wobnowić a swět zahibać móža, wo tym pisa awtor w swojim zawodnym nastawku. Zdobom wón na to pokaza, koho měli do swojeho žiwjenja zastupić dać.
Na wosebite putnikowanje běchu stari a chori ludźo tež lětsa zaso do Róžanta přeprošeni. W serbski duchowny jich pozbudźi, tež w ćežach swědkojo radosće być.
W Budyskej cyrkwi Našeje lubeje knjenje je dźewjeć dźěći prěni raz sakrament swjateho woprawjenja přijało. Swjedźensku Božu mšu móžachu z jónkrótneje perspektiwy sobu swjećić.
Čiła zhromadnosć knježeše mjez prěnjowoprawjenskimi dźěćimi Chróšćanskeje wosady hižo wokoło přihotow. Woni pak njepřistupichu lětsa we wosadnej cyrkwi prěni raz k blidu Božemu.
Swój nalětni koncert je chór Lipa na zahrodźe Zežiwjenskeho a zeloweho centruma w klóštrje Marijinej hwězdźe w Pančicach-Kukowje wuhotował. Z ćělesom wustupištej zdobom dorostowy chór a dźěćaca band.
Nowu wosebitu wustajeńcu wěnuje Budyski Serbski muzej kónčinje katolskich Serbow. Wona je hač do njedźele, 22. oktobra, přistupna.
W Radworju přija 52 młodostnych a jedyn dorosćeny sakrament swjateho firmowanja. Nimo holcow, kotrež buchu firmowane, a firmowanskich kmótrow běchu so tež mnohe dalše holcy a žony narodnu drastu woblekli.
Putniske městno w sewjernej Čěskej z kolesom je sej awtorka z Chrósćić wotkryła. W swojim přinošku wona mjez druhim wo tym pisa, što ma to z dnjom maćerjow zhromadneho.
K modlenju a na Bože mšě před kopiju postawy sławneje Fatimskeje putniskeje madony su wěriwi w juniju w Drježdźansko-Mišnjanskim, Zhorjelskim a Litoměřickim biskopstwje přeprošeni. Mjez druhim budźe postawa w putniskej cyrkwi w Róžeńće, w cyrkwi Marije donjebjeswzaća w Kulowje kaž tež w klóšterskej cyrkwi klarisow w Budyšinje.
Worklečanske młodźinske dušepastyrstwo přewjedźe klětu zaso za zajimcow kurs JULEICA. Wón wobsteji z dweju dźělow a wotměje so stajnje wot pjatka do njedźele, 2. do 4. februara, kaž tež wot 26. do 28. apryla, w Smochćicach. Přizjewjenja přijimuja hižo nětko online.
Pod hesłom „Žona – druha strona čłowjestwa“ přeprošuje Smochčanske kubłanišćo swjateho Bena na dny rozpominanja z filmom, kotrež wotměja so wot srjedy do njedźele, 21. do 25. junija. Přizjewjenja přijimuja hač do štwórtka, 1. junija.
„Kedźbu pasle! Kak prawicarscy ekstremisća a reichsbürgerojo demokratiju podrywaja“ rěka hesło zarjadowanja, na kotrež su wšitcy zajimcy, wosebje politisce angažowani, wobydlerjo, zastupjerjo gmejnskich radow kaž tež lokalnych organizacijow a institucijow přeprošeni. Wone wotměje so srjedu, 14. junija, wot 19.00 do 21.00 hodź. w Jakubetzowym wustawje w Kulowje.
Na putnikowanje z kolesom přeprošuje Smochčanske kubłanišćo swjateho Bena wšitkich zajimcow wot njedźele, 24. septembra, do njedźele, 1. oktobra. Nawod změjetaj farar Thomas Cech ze Žitawy a Alojs Rječka z Łužnicy.
Čłowječej noze stejitej w srjedźišću zarjadowanja za nanow a jich dźěći, kotrež wotměje so wot pjatka do njedźele, 16. do 18. junija, w Smochčanskim kubłanišću swjateho Bena. Přizjewjenja přijimuja w Smochćicach.
We Worklečanskim Don Boskowym domje poskića dalekubłanje na polu prewencije před seksualizowanej namocu. Přizjewjenja přijimuja hač do póndźele, 5. junija.
Wšelake hódančka a dalše zaběry za dźěći su tule přistupne.
Katolska wosada Marije kralowny róžowca w Radworju pyta za swój dźěćacy dom „Alojs Andricki“ k 1. junijej kubłarku abo kubłarja. Požadanja přijimuja hač do srjedy, 31. meje.
Serbska protyka
