Katolski Posoł – 21. apryla 2024
Wo wobchadźe pastyrjow ze swojim stadłom pisa serbski duchowny w swojim zawodnym nastawku. Mjez druhim wón na to pokazuje, što Jězus kóždemu, kiž někajku pastyrsku słužbu wukonja, před woči dźerži a k čemu wón z tym namołwja.
Drježdźansko-Mišnjanske biskopstwo je fenomen na postawje maćerje Božeje pola Wotrowa wědomostnje přepytować dało. Nětko wuslědki předleža.
W Kulowje je biskop Wolfgang Ipolt 43 młodostnych firmował. Do swojeho prědowanja je jednoho z nich kaž tež jeho kmótru sobu zapřijał.
Před 40 lětami nasta skerje připadnje jedne z najwuspěšnišich masowych zarjadowanjow katolskeje cyrkwje. Jeho symbolej pućowaštej w lěće 2004 tež po serbskich wosadach.
Biskop Heinrich Timmerevers je młodostnym w Chrósćicach sakrament swjateho firmowanja wudźělił. Wo přihotach na tónle dźeń a kak je jón dožiwiła, firmowana w swojim přinošku pisa.
Lětsa je tomu 75 lět, zo su w francoskim Taizéju prěni bratřa swoje wěčne sluby złožili. Ze spočatnje ewangelskeho sta so hakle něhdźe lětdźesatkaj pozdźišo ekumeniske bratrowske zhromadźenstwo.
Katolska cyrkej we wulkim wuchodoeuropskim kraju steju na rozpuću. W jednym z jeje mnohich biskopstwow skutkuje tež duchowny z Hornjeje Łužicy. Awtor přinoška je jeho při jeho dźěle přewodźał.
Na wosebity nyšpor běchu mnozy bikerojo do Ralbic přichwatali. W swojim krótkim prědowanju jich wosadny duchowny tež k něčemu namołwi.
Před dźesać lětami běchu w Kamjenskej chorowni paliatiwnu staciju wotewrěli. Kaž nowinska rěčnica domu pisa, wuwi so stacija w běhu lětdźesatka k stołpej medicinskeho zastaranja.
Znaty Drježdźanski hólči chór wuhotuje njedźelu, 21. apryla, w 14.00 hodź. nyšpor w Ralbičanskej cyrkwi. Wón wustupi tam prěni raz.
Hudźba a teksty wo lubosći a pokoju steja w srjedźišću beneficneho zarjadowanja, kotrež wotměje so tutu njedźelu, 21. apryla, w 17.00 hodź. w Budyskej tachantskej cyrkwi swjateho Pětra. Dary zarjadowanja přepodadźa za pomocny projekt Ekumeniskeho tachantskeho wobchoda w Ukrainje.
W Kulowskej wosadnej cyrkwi maja hač do wutory, 23. apryla, wustajeńcu wo eucharistiskich dźiwach pod hesłom „Eucharistija je mój puć do njebjes“. Wona złožuje so na zběrku zbóžneho Carla Acutisa z Italskeje, kotryž je jako patron młodostnych a šulerjow jedyn z najbóle česćowanych swjatych swojeho ródneho kraja.
Wěriwi z Němskeje, Pólskeje a Čěskeje su sobotu, 11. meje, na putnikowanje wujednanja do čěskich Hejnic prošeni. Boža mša w hnadownej cyrkwi zahaji so w 10.30 hodź.
Na dźěłarničce k pjelsćowanju črijow su wšitcy zajimcy do Smochčanskeho kubłanišća swjateho Bena přeprošeni. Kurs za započatkarjow so wot štwórtka, 30.meje, do njedźele, 2. junija, wotměje, dalši dźěl za pokročenych pak wot štwórtka do njedźele, 20. do 23. junija. Přizjewjenja přijimuja hač do póndźele, 6. meje.
Smochčanske kubłanišćo swjateho Bena přeprošuje wšitkich zajimcow na seminar pod hesłom „Mocy rostlinow – dźiwje zela, hojenske rostliny a drohotne esency“. Tón wotměje so wot pjatka do njedźele, 7. do 9. junija. Přizjewjenja su hač do pjatka, 17. meje móžne.
Serbska protyka
