Katolski Posoł – 20. oktobra 2024
Wo městnje, kotrež je křesćanej wěste, pisa awtor zawodneho nastawka. Při tym złožuje so na ewangelij tuteje njedźele a mjez druhim wuwjedźe, štó ani tam swoju wosobu do srjedźišca njestaja.
Znaty Lipšćanski moler zhotowi nowy wołtarny wobraz za benediktinski klóšter w zapadnej Sakskej. Tamniša putniska cyrkej je prěnja bamžowska bazilika wuchodneje Němskeje zwonka Berlina.
Radworscy ministranća su sej ze swojim wosadnym fararjom w nazymskich prózdninach do susodneho słowjanskeho kraja wulećeli. Mjez druhim pućowachu tam na znatu horu.
Jako přihot na jubilej prěnjeho naspomnjenja před 800 lětami putnikowachu wěriwi serbskeje wosady do Roma. Tam swjećachu mjez druhim Bože mšě na wosebitych městnach a pobychu při rowach prěnich martrarjow.
Twórby serbskeju komponistow Jurja Pilka a Bjarnata Krawca steja w srjedźišću 1. sinfoniskeho koncerta Budyskeho Serbskeho ludoweho ansambla. Tón budźe tutu njedźelu, 20. oktobra, w 17.00 hodź. na tamnišej žurli.
Drježdźanski orchester Sinfonietta a tři wosadne chóry tamnišeje wosady swjateje Hilžbjety předstaja sobotu, 2. nowembra, w 17.00 hodź. w Drježdźanskej cyrkwi Jězusoweje wutroby a njedźelu, 3. nowembra, w 16.00 hodź. w Kulowskej cyrkwi Marije donjebjeswzaća „Rekwiem c-moll“ italskeho komponista Luigija Cherubinija. Dirigować budźetaj ćělesa regionalny kantor Stephan Thamm a Manuel Rotter.
Wo problematice samotnosće budźe psychologa Raphael Schütz z Braniborskeje Techniskeje uniwersity w Choćebuzu štwórtk, 24. oktobra, we 18.30 hodź. w Šěrachowskej wosadnicy, Am Kirchberg 4, přednošować. Tež potrjechena wosoba wo swojich nazhonjenjach porěči. Hornjołužiske telefonowe dušepastyrstwo jako zarjadowar přeprošuje k tomu zajimcow, potrjechenych a přiwuznych, zo bychu wjace wo temje zhonili, kotraž je w towaršnosći husto tabuizowana.
Dekanatne dušepastyrstwo
přeprošuje wšitke dźěći,
kotrež so na prěnje swjate
woprawjenje přihotuja,
na zhromadny dźeń srjedu,
20. nowembra, wot 9.00 do
15.00 hodź. do Njebjelčic.
Započatk je z Božej mšu
w cyrkwi. Zajimcy njech so
hač do póndźele, 21. oktobra,
online přizjewja.
Klětu přeprošuje dušepastyrstwo młodźiny we Worklecach wospjet na seminaraj k přihotej na sakrament mandźelstwa. Wonej wotmějetej so stajnje pjatk a sobotu, 7. a 8. februara kaž tež 28. a 29. nowembra, w Smochčanskim kubłanišću swjateho Bena. Přizjewjenja přijimuje dekanatne dušepastyrstwo hač do srjedy, 8. januara, online.
Prěni dźěl přichodneho wukubłanja JuLeiCa, kotrež poskići Worklečanske dekanatne dušepastyrstwo za młodźinu, njebudźe kaž dotal připowědźene klětu w januarje, ale hakle wot pjatka do njedźele, 4. do 6. apryla, w Smochčanskim kubłanišću swjateho Bena. Druhi dźěl wotměje so, kaž planowane, wot 25. do 27. apryla na samsnym městnje. Přizjewjenja přijimuja hač do srjedy, 8. januara, online.
Dwě wosadźe w Pólskej, kotrejž stej wot powodźenja jara sylnje potrjechenej, chce Towarstwo Cyrila a Metoda z.t. (TCM) ze swojej akciju „Łužica pomha“ podpěrać. Kontakt k nim nawjaza wone přez swojeho kruteho partnera w susodnym kraju, prelata dr. Dariusza Kruczyńskeho. Štóž chcył wot powodźenja domapytanu ludnosć podpěrać, njech přepokaza pjenjezy na konto TCM: Cyrill-Methodius-Verein e.V., IBAN: DE 65 7509 0300 0008 2823 66, hesło: „wulka woda“. Štóž sej darowansku kwitowanku přeje, měł swoju adresu podać, pak telefonisce pod čisłom (0 35 91) 55 02 10 pak z mailku na TCM@Posol.de.
Na próstwu Towarstwa Cyrila a Metoda z.t. (TCM) poskićuje Norman Reitner z Drježdźanskeho biskopskeho ordinariata kurs k tomu, kak móžeš projekty derje planować a k tomu pjenjezy na wšelakore wašnje požadać. Dalekubłanje na polu sponsoring a foundraising wotměje so sobotu, 9. nowembra, wot 9.00 do 16.00 hodź. na „Radlubinje“ w Ralbicach. Zajimcy – nimo čłonow TCM su tež dalši přeprošeni – měli so online přizjewić.
Towarstwo Cyrila a Metoda z.t. (TCM) chce tež lětsa ze swojej nazymskej akciju „Łužica pomha“ diecezanskemu zwjazkej Carity w pólskim Ełku zaso pomhać. Tam wjesela so nade wšěm, štož w swójbje trjebaš, kaž su to drasta, črije, artikle hygieny a kosmetika za žony a dźěći, ale tež płokanski próšk, kuchinske graty abo pampersy za dźěći runje tak kaž za dorosćenych. Wotedać hodźa so dary pjatk a sobotu, 8. a 9. nowembra, kaž tež pjatk a sobotu, 15. a 16. nowembra. Dokładnišo so to sčasom wozjewi.
Drježdźansko-Mišnjanske biskopstwo přeprošuje wěriwych we wobłuku Swjateho lěta na diecezanske putnikowanje z biskopom Heinrichom Timmereversom do Roma. Wone wotměje so wot soboty do soboty, 11. do 18. oktobra 2025.
Serbska protyka
