Katolski Posoł – 20. awgusta 2023
Wo měritku za křesćanow pisa serbski duchowny w swojim zawodnym nastawku. Zdobom wón zwěsća, zo zaběraja ludźi dźensa samsne prašenja kaž w času, w kotrymž ewangelij tuteje njedźele jedna.
W połnje wobsadźenym Krupčanskim Božim domje swjećachu serbscy putnicy a dalši wěriwi z Łužicy Božu mšu. Kemše, kotruž su wjacori serbscy duchowni sobu swjećili, mała młodźinska šola wobrubi.
W čěskej Raspenavje swjećachu wěriwi do swjedźenja Marije donjebjeswzaća patronatnu Božu mšu w tamnišej cyrkwi. Mjez nimi běchu tež Serbja a mnohe młode swójby z dźěćimi.
Wěriwych k Bohu wjesć je so duchowny w Kulowje prócował. Na patronatnym swjedźenju wosady, Marije donjebjeswzaća, je so wón nětko z wosadnymi rozžohnował.
Swětowe zetkanje młodźiny w Portugalskej je tež mjez serbskimi młodostnymi hłuboki zaćišć zawostajiło. Po redakciskim kóncu zašłeho wudaća Katolskeho Posoła, njedźelu, 13. awgusta, dóńdźechu do redakcije dalše měnjenja wo nim, kotrež su na młodźinskej stronje jako dodawk wozjewjene.
Nowa nawodnica Katolskeho běrowa Sakskeje budźe wot 1. oktobra dr. Daniela Pscheida-Überreiter. Dotal běše wona za fachowy wobłuk diecezanske dušepastyrstwo młodźiny a zdobom za wobłuk dźěći a swójba zamołwita. Diakon dr. Daniel Frank, kotryž je zastojnstwo minjene šěsć lět wukonjał, budźe wot samsneho měsaca jako hłownopowołanski diakon w Drježdźanach skutkować.
Serbska dekanatna młodźina je tež lětsa na zhromadny wulět přeprošena. Tón budźe njedźelu, 3. septembra. Přizjewjenja přijimuja hač do srjedy, 23. awgusta, online.
Spočatk awgusta we Wulkich Rědorjecach wotpalenu ewangelsku měšćansku cyrkej chcedźa zaso natwarić. Tamniša wosada zběra dale dary.
Smochčanski kubłanski dom swjateho Bena poskići wot srjedy do pjatka, 13. do 15. septembra, seminar, w kotrymž móža ludźo na stres, wysoke wužadanja abo žiwjenske krizy wotpowědnu podpěru z pomocu reziliency dóstać. Přizjewjenja su hač do srjedy, 23. awgusta, móžne.
Dekanatne dušepastyrstwo młodźiny we Worklecach přeprošuje wšitkich młodostnych wot 8. lětnika kaž tež młodych dorosćenych na seksualnopedagogisku dźěłarničku WaageMut®. Wona wotměje so sobotu, 9. septembra, na „Radlubinje“ w Ralbicach. Přizjewjenja su hač do srjedy, 23. awgusta, móžne.
Na putnikowanje z kolesom přeprošuje Smochčanske kubłanišćo swjateho Bena wšitkich zajimcow wot njedźele, 24. septembra, do njedźele, 1. oktobra. Nawod změjetaj farar Thomas Cech ze Žitawy a Alojs Rječka z Łužnicy.
Serbska protyka
