Katolski Posoł – 2. měrca 2025
Korjenjomaj křesćanskeho jubilejneho lěta wěnuje so serbski duchowny w swojim zawodnym nastawku. Wón pisa pak tež wo tym, što ma wone ze židowskim jubilejnym lětom zhromadneho.
Ke kulowatemu jubilejej hornjołužiskeho města budźe w tamnišej katolskej cyrkwi wosebita instalacija zwukow a swěcy přistupna. Wona zaběra so z aktualnej temu, złožuje pak so runočasnje na biblisku stawiznu.
We Worklečanskim Don Boskowym domje zaběrachu so dźěći w zymskich prózdninach z pjatym počasom. Po katechezy su jón tež zhromadnje swjećili.
Lětuše serbske póstne prědowanja steja pod hesłom „Nadźija – njepřesłapja“. Přehlad jednotliwych prědarjow a jich temow je w Katolskim Posole kaž tež tule wozjewjeny.
W Radworskej wosadźe přewjedu na spočatku póstneho časa mision. Wón steji pod hesłom „Wěriš abo pytaš hišće?“. Nadrobny program je w Katolskim Posole kaž tež tule wozjewjeny.
W swojim přinošku pohnuwa serbski duchowny, wo nowu rozmołwnu kulturu so prócować. Mjez druhim wón wuwjedźe, hdźe so za čłowjeka zamołwitosć a respekt tamnej wosobje napřećo započnjetej.
Na cyłodnjowske ćiche modlenje před Najswjećišim su wěriwi do kapałki Domu swjateje Ludmile w Chrósćicach přeprošeni. Wone zahaji so pjatk, 7. měrca, w 17.00 hodź. a zakónči so sobotu, 8. měrca, we 18.00 hodź. z krótkim nyšporom. Kapałka budźe wšón čas tepjena.
Pod hesłom „Sing to the Lord a new song“ (Spěwajće Knjezej nowy spěw) přeprošuja Drježdźanscy kapałnicy prěni raz na wurisanje komponowanja. Prapremjera dobyćerskeho krucha budźe njedźelu, 26. oktobra, w Drježdźanskej katedrali na Božej mši, kotruž Deutschlandfunk přenjese. Zapodać ma so kompozicija Božeje mšě hač do njedźele, 1. junija.
Mužojo, kotřiž chcedźa teologiju studować a so z měšnikom stać, móža so wot nazymy we wobłuku studija na to přihotować. Za to měli so w přichodnych tydźenjach přizjewić.
Bamž Franciskus je wšitkich młodostnych na tydźeń młodźiny do Roma přeprosył. Tón ma so w formaće swětoweho zetkanja młodźiny wotměć, to rěka zwiski nawjazać a so zhromadnje modlić. Młodostni su přeprošeni so na putnikowanju z biskopom Heinrichom Timmereversom wot póndźele do póndźele, 29. julija do 4. awgusta, wobdźělić.
Planowany kurs JULEICA w aprylu w Smochčanskim kubłanišću swjateho Bena budźe dwurěčny. Za njón su hišće městna swobodne. Wukubłanje wobsteji z dweju dźělow, je darmotne a wotměje so stajnje wot pjatka do njedźele, 4. do 6. apryla, kaž tež wot 25. do 27. apryla. Přizjewjenja přijimuja online.
Pod hesłom „Chcu ći spěwać
a hrać“ wotměje so wot pjatka
do soboty, 14. do 16. měrca,
wosebite dalekubłanje
na polu cyrkwinskeje hudźby
w Smochčanskim kubłanišću
swjateho Bena. Pod nawodom
tachantskeho kapałneho
mištra Christiana Bonatha
skića dny bohaty kursowy
program za spěwarjow, instrumentalistow
a chórowych na wodow.
„Wobchad z palnymi murjemi – wotmjezowanje a mjeza“ rěka hesło lětušeho Ekumeniskeho póstneho seminara w Smochčanskim kubłanišću swjateho Bena. Planowane su wospjet štyri zarjadowanja po štyrjoch póndźelach. Na prěnim zaběra so Frank Richter póndźelu, 10. měrca, z temu z towaršnostneho wida. Wšitcy zajimcy su wutrobnje přeprošeni.
Ambulantna hospicna słužba Hornjołužiskeho zwjazka Carity
z.t. w Kamjencu poskićuje lětsa zaso kurs k čestnohamtskemu
přewodźenju ćežkochorych a mrějacych. Štóž chcył
wukubłanje absolwować, měł so pola hospicneje słužby
Carity w Kamjencu přizjewić.
Serbska protyka
