Katolski Posoł – 2. julija 2023
K marijanskemu swjedźenjej tuteje njedźele wěnuje so awtor w swojim zawodnym nastawku. Wón zwjaza jón z 13. přezlětnej njedźelu a rozmysluje wo třoch dypkach ewangelija tohole dnja.
Katolska cyrkej w Němskej zhubja dźeń a wjace sobustawow. Zdobom pak wuchadźa ze statistiki serbskich wosadow tež pozitiwny trend.
Jako duchowne pokłonjenje před swojim załožerjom mjenuje awtor lětni koncert serbskeho spěwneho ćělesa. Tež lětsa wosebity hósć w programje njepobrachowaše.
Wosebitu zhromadnosć dožiwichu serbscy ministranća w Pěskecach. Tam zetkachu so k swojemu kóždolětnemu koparskemu turněrej.
W Ralbicach koncertowaše mjezynarodnje agěrowacy chór. Wustup běše zdobom wuskutk wopyta japoštołskeho nunciusa 2019 w Delanach.
W přitomnosći mnohich hosći poswjeći Radworski wosadny farar Beno Jakubaš rumnosće „Serbskeho experiMINT-campusa“ w Radworju. Samsny dźeń běchu rumnosće oficialnje přepodali.
Hudźbnicy z dweju kontinentow běchu z hosćom w Róžeńće. Tam wotmě so mjeztym sedmy Gig-festiwal.
Pod a mjez lipami je serbski chór beneficny koncert wuhotował. Wunošk bě za ponowjenje pišćelow Božeho domu serbskeje wosady postajeny.
Katolski tydźenik Die Tagespost wěnuje w swojim wudaću štwórtk, 22. junija, wobšěrny přinošk Katolskemu Posołej. Pozadk je lětuša 160. róčnica załoženja serbskeho medija.
Wo wjeselu na bližace so prózdniny a rjanosći přirody pisataj Hańžka a Feliks. Zdobom móža so dźěći z pomocu kóstkoweje hry ze stworjenjom swěta zaběrać.
Dekanatne dušepastyrstwo młodźiny we Worklecach přeprošuje wšitkich młodostnych wot 8. lětnika kaž tež młodych dorosćenych na seksualnopedagogisku dźěłarničku WaageMut®. Wona wotměje so sobotu, 9. septembra, na „Radlubinje“ w Ralbicach. Přizjewjenja přijimuja hač do wutory, 8. awgusta.
Serbska dekanatna młodźina je tež lětsa na zhromadny wulět přeprošena. Tón budźe njedźelu, 3. septembra. Přizjewjenja přijimuja hač do wutory, 8. awgusta, online.
Budyski Serbski muzej změje w lětnich prózdninach wšelake poskitki za dźěći. Mjez druhim móža sej wone wobrazy z mozaika zhotowić abo so na šćežki wuměłcow po Budyšinje podać.
Na putnikowanje z kolesom přeprošuje Smochčanske kubłanišćo swjateho Bena wšitkich zajimcow wot njedźele, 24. septembra, do njedźele, 1. oktobra. Nawod změjetaj farar Thomas Cech ze Žitawy a Alojs Rječka z Łužnicy.
Serbska protyka
