Katolski Posoł – 2. apryla 2023
Što ma nadawk cyrkwje z bołmončku činić, wo tym pisa awtor w swojim zawodnym nastawku. Zdobom pohnuwa wón k prašenjomaj, kotrymajž měli so wšitcy křesćenjo na tym dnju wěnować.
Z Franzom-Josefom Bodu je prěni raz katolski biskop w Němskej w zwisku ze skandalom znjewužiwanja małolětnych wotstupił. Bamž Franciskus je demisiju najdlěje amtěrowaceho katolskeho biskopa kraja přiwzał.
Z čim započnješ cuzych hospodować? Wo tym rozmysluje awtor w předposlednim dźělu swojeje póstneje serije k sydom skutkam ćělneje miłosće.
Dźiwadło w dźiwadle dožiwichu přihladowarjo w Sulšecach. Tam měješe nowa inscenacija Kulowskeho Bratrowstwa swoju premjeru.
Hudźbny swjedźeń w Smochćicach wěnuje so lětsa zaso kulturje jednoho ze susodnych krajow Němskeje. Za to móžeštaj zarjadowarjej tež jara woblubowanu hudźbnu skupinu wuzwoleneho kraja zdobyć.
Čorna wowca mjez japoštołami abo jenož tragiska figura? Z tutym prašenjom wěnuje so awtor jednomu z dwanaće japoštołow.
„Po puću bolosće a wěry“ rěka baseń čěskeho basnika a přećela Serbow Milana Hrabala. Ju čitaja wulki pjatk, 7. apryla, w 15.30 hodź. w čěskim Jiřetínje pod Jedlovou njedaloko Varnsdorfa, hdyž rozpominaja křižowy puć. Su- li Serbja přitomni, přednjesu tekst tohorunja w serbskej rěči.
Prózdny ramik přewodźeše swójby serbskich wosadow pasionsku njedźelu na Božej mši w Róžeńće. Wone běchu ze wšelakich směrow na hnadowne městno putnikowali.
Prěnje intensiwne zetkanje po dołhim času dožiwichu ministranća dweju serbskeju wosadow. W tematiskich poskitkach zaběrachu so z aspektami swojeje słužby.
Wo wěstej hasy, do kotrejež hdys a hdys zajědźeš, pisataj Hańžka a Feliks. Zdobom nadeńdu dźěći na stronje hódančko, kotrež zjima wšitke dotal předstajene wobchadne znamješka.
Křižowy puć modli so serbska dekanatna młodźina bołmončku, 2. apryla, w Pěskecach. Započatk je w 14.00 hodź. při kapałce.
Klětu nazymu zahaja na Fachowej akademiji za wosadnu pastoralku w Magdeburgu nowy wukubłanski kurs za muži, kotřiž chcyli so ze stajnym diakonom w ciwilnym powołanju stać. Požadanja přijimuja hač do soboty, 30. apryla.
„… přez lěto, přez žiwjenje – rituale jako pomoc w žiwjenskich přechodach“ rěka hesło zarjadowanja, kotrež wotměje so sobotu, 22. apryla, w Smochčanskim kubłanišću swjateho Bena. Mjez druhim změja zajimcy po přeću składnosć, sej sami ritual za sebje abo za wosebitu žiwjensku situaciju wutworić.
W Budyskim Serbskim muzeju maja hač do 24. apryla jutrownu wustajeńcu. Wona wěnuje so mjez druhim dwěmaj róčnicomaj. Wustajene su tež twórby njewěriweho wuměłca wo Jězusowym křižowym puću a wo swjatej Mariji.
Zajimcy, kotřiž chcyli katolsku nabožinu wuwučować, móža lětsa nazymu wotpowědne wukubłanje zahajić a so přez studij wučerstwa za to kwalifikować. Dalše informacije dóstanu we wotrjedźe za šule a wysoke šule biskopskeho ordinariata w Drježdźanach.
Serbska protyka
