Katolski Posoł – 19. měrca 2023
Mužomaj, kotrajž staj Jězusej na rozdźělne wašnje słužiłoj, wěnuje so awtor w swojim zawodnym nastawku. Jeju cyrkej w tychle dnjach wopomina.
W Frankfurće nad Mohanom wotmě so poslednja plenarna zhromadźizna Synodalneho puća. Na nim su wobdźělnicy reformowe teksty wobzamknyli a pačenje wotwobarali.
W čim so wopyt jatych započnje, wo tym pisa awtor w dalšim dźělu swojeje póstneje serije k sydom skutkam ćělneje miłosće. Při tym předstaji wón wosobu, kotraž njeje we Łužicy njeznata.
Na swój dźesaćlětny pontifikat zhladowaše tele dny bamž Franciskus. W interviewje wón mjez druhim zwurazni, kak widźi cyrkej za dwaj lětdźesatkaj.
Katolskim Serbam, kotřiž skutkowachu a skutkuja jako misionarojo na wšelakich kontinentach, wěnuje so awtorka w swojim přinošku. Tema pak njeje hišće dowuslědźena.
„Žiwjenje w słyšenju“ steješe w srjedźišću třećeho póstneho seminara w Smochćicach. Referentka nawjeduje Drježdźanski wustaw diakonisow, kotryž słuša k najstaršim w Němskej.
Z pomocu kumštneje inteligency móža zajimcy wotnětka znateho italskeho swjateho zeznać. Mjez druhim wupraji so tón tež temje, kotruž cyrkej w Němskej zaběra.
Kotry woznam ma wobchadne znamješko z módrym kašćikom a wulkim běłym pismikom „P“ za póstny čas, wo tym pisataj Hańžka a Feliks. A pytaja-li dźěći hišće zaběru za nalětnje dny, namakaja na samsnej stronje dwaj pokiwaj.
Pod hesłom „Wujednaj so!“ su šulerki a šulerjo wot 6. do 8. lětnika sobotu, 1. apryla, wot 9.00 do 13.30 hodź. na zhromadny dźeń do Don Boskoweho domu we Worklecach přeprošeni. Přizjewjenja přijimuja hač do póndźele, 27. měrca.
„… přez lěto, přez žiwjenje – rituale jako pomoc w žiwjenskich přechodach“ rěka hesło zarjadowanja, kotrež wotměje so sobotu, 22. apryla, w Smochčanskim kubłanišću swjateho Bena. Mjez druhim změja zajimcy po přeću składnosć, sej sami ritual za sebje abo za wosebitu žiwjensku situaciju wutworić.
W Budyskim Serbskim muzeju maja hač do 24. apryla jutrownu wustajeńcu. Wona wěnuje so mjez druhim dwěmaj róčnicomaj. Wustajene su tež twórby njewěriweho wuměłca wo Jězusowym křižowym puću a wo swjatej Mariji.
Zajimcy, kotřiž chcyli katolsku nabožinu wuwučować, móža lětsa nazymu wotpowědne wukubłanje zahajić a so přez studij wučerstwa za to kwalifikować. Dalše informacije dóstanu we wotrjedźe za šule a wysoke šule biskopskeho ordinariata w Drježdźanach.
K dnjam rozpominanja a nutřkowneho přihota na martrowny tydźeń přeprošuja sotry klóštra Marijineje hwězdy wot pjatka, 31. měrca, do njedźele, 2. apryla. Ličba wobdźělnikow je na dwanaće wosobow wobmjezowana.
„Křesćanske orientacije na prašenja našeho časa“ rěka hesło lětušeho Ekumeniskeho póstneho seminara w Smochčanskim kubłanišću swjateho Bena. Tutón zakónči so z filmowym wječorkom póndźelu, 20. měrca.
Serbska protyka
