Katolski Posoł – 19. januara 2025
W swojim zawodnym nastawku pisa serbski duchowny mjez druhim wo tym, kak Bóh z ludźimi komunikuje. Při tym pokaza zdobom na karmelitanskeho rjadnika, kiž poskićuje zhromadne eksercicije za wěriwych a njewěriwych, ale tež na hoberske twarjenje z NDRskeho časa w Berlinje, kotrež dósta ironiske přimjeno „St. Walter“.
Ze swjatočnym nyšporom bu w Róžeńće Swjate lěto za serbske wosady zahajene. W srjedźišću steji kopija křižoweje ikony, před kotrejž je so znaty swjaty hižo w 12. lětstotku modlił.
Swój wid na swětowu a cyrkwinsku politiku, ale tež cyle wosobinske dohlady do swojeho žiwjenja a myslenja podawa bamž Franciskus w swojej awtobiografiji. Wona je we wjace hač 80 krajach runočasnje wušła.
Młodźi wuměnkarjo Radworskeje wosady běchu sej na swojim prěnim zetkanju tohole lěta do wuchoda Sakskeje wulećeli. Tam wopytachu klóšter kaž tež putnisku hospodu.
Njezlemjeny angažement w słužbje Chrystusoweho naslědnistwa wučinja powołanje serbskeho duchowneho, dekana a kanonika. Tele dny dokónči wón swoje 60. žiwjenske lěto.
Abatisa cistercienskeho klóštra w Marijinym dole swoje zastojnstwo złoži. Wosom lět je wona konwent nawjedowała.
W swojim přinošku wěnuje so awtor twórbje ukrainskeho wuměłca. Wona je dźěl wustajeńcy Budyskeho Serbskeho muzeja „Wěčne pućowanje. Barba a słowo w twórbje ukrainskeho wuměłca Andrija Sharana“, kotraž je hišće hač do njedźele, 16. měrca, přistupna.
W Budyskim Ludowym nakładnistwje Domowina (LND) ma składnostnje 800. róčnicy prěnjeho naspomnjenja Chróšćanskeje wosady nowa kniha wuńć. Mjez mnohimi fotami stej tež wobrazaj, na kotrymajž su šulerjo Chróšćanskeje šule lěta 1937 widźeć. LND prosy wo pomoc, mjena zwobraznjenych wosobow zwěsćić.
Wo pomolowanym křižu a wosebitym lěće pisataj Hańžka a Feliks na stronje za dźěći. Zdobom zhonja młodźi čitarjo mnoho zajimawostkow kołowokoło wopisaneho lěta.
Pod hesłom „Domizna – z mnohimi prašenjemi“ přeprošuje Smochčanske kubłanišćo swjateho Bena na dny rozpominanja z filmom, kotrež wotměja so wot pjatka, 31. januara, do njedźele, 2. februara. Přizjewjenja přijimuja hač do pjatka, 24. januara.
Dwurěčna putniska jězba do Medźugorja wotměje so wot soboty, 26. apryla, hač do soboty, 3. meje. Zajimcy měli so hač do pjatka, 31. januara, pola Andreje Brandner přizjewić, pak telefonisce pod čisłom (01 71) 7 42 33 81 pak z mailku na adresu medjugorje2025-april@gmx.de.
Składnostnje 100. posmjertnin serbskeho tachanta Jakuba Skale přeprošujetej Towarstwo Cyrila a Metoda z.t. a Maćica Serbska wěriwych na wopomnjenski nyšpor do Budyskeje tachantskeje cyrkwje. Tón budźe njedźelu, 19. januara, w 14.00 hodź. Přizamknjetej so spominanje při jeho rowje na Mikławšku a zhromadna swačina na tachantskej farje.
Pišćelowy nyšpor z mjezynarodnje
koncertowacym dorostowym serbskim organistom Johannesom Krahlom budźe njedźelu, 19. januara, w 17.00 hodź. w Chróšćanskej
wosadnej cyrkwi. Zastup je darmotny, při durjach budźe zběrka. Organist pochadźa z Dobranec a skutkuje tučasnje w Lipsku a Greifswaldźe. Wšitcy zajimcy su přeprošeni.
Na putnisku jězbu do Lourdesa a La Salette wot pjatka do njedźele, 16. do 25. meje, přeprošuje Šěrachowski pućowanski běrow A-Teams. Wobdźělnicy wopytaja mjez druhim tež Monaco a Avignon. Dalše informacije a přizjewjenja dóstanu zajimcy pola Matthiasa Hadanka w Hórkach pod telefonowym čisłom (01 63) 7 33 82 05 abo w interneće pod www.ateams.de.
Ambulantna hospicna słužba Hornjołužiskeho zwjazka Carity
z.t. w Kamjencu poskićuje lětsa zaso kurs k čestnohamtskemu
přewodźenju ćežkochorych a mrějacych. Štóž chcył
wukubłanje absolwować, měł so pola hospicneje słužby
Carity w Kamjencu přizjewić.
Drježdźansko-Mišnjanske biskopstwo přeprošuje wěriwych we wobłuku Swjateho lěta na diecezanske putnikowanje z biskopom Heinrichom Timmereversom do Roma. Wone wotměje so wot soboty do soboty, 11. do 18. oktobra 2025.
Spirituelnu zwukowu instalaciju wo psalmje 23 móža wopytowarjo po lěće 2021 znowa w Rakečanskej ewangelskej cyrkwi dožiwić. Wona je hač do njedźele, 2. februara, přistupna. Psalm wo dobrym pastyrju předstajeja w modernym wobdźěłanju a ze swětłowymi efektami. Wopytowarjo smědźa so, na hudźbu słuchajo, po cyrkwi pohibować. Boži dom je wšědnje wot 9.00 do 20.00 hodź. přistupny.
Serbska protyka
