Katolski Posoł – 18. junija 2023
Wot koho měł sej křesćan zas a zaso směr pokazać dać, wo tym pisa awtor w swojim zawodnym nastawku. Zdobom wón zwurazni, čehodla su nowe puće trěbne.
W Slepom wotmě so 77. serbski ewangelski cyrkwinski dźeń. Kemše wobrubištej projektowy chór a spěwna skupina „Kólesko“ pod nawodom Geralda Schöneho.
Pastoralne směrnicy za sakrament mandźelstwa předleža wotnětka tež w němskej rěči. Wone móža cyrkwi na městnje při tym pomhać, swoje dušepastyrstwo přihota na mandźelstwo pohłubšić.
W přitomnosći mnohich wjesnjanow a hosći poswjeći farar Měrćin Deleńk zwóńcu ze zwonom při kapałce serbskeje wsy. Rano, připołdnju a wječor chcedźa nětko zwonjo k modlenju Jandźelknjeza přeprošeć.
Z pomocu memoryja su hortowe dźěći w Ralbicach wo Božim ćěle rozmyslowali. Z wobrazow a krótkich tekstow zhotowichu sej tohorunja plakat.
W Budyskim Ludowym nakładnistwje Domowina je dwurěčna kniha „Čej’ da sy? – Einblicke in die sorbische katholische Welt“ wušła. Wona nawjazuje na wosebitu wustajeńcu w Serbskim muzeju, ale je swójska publikacija.
W Budyskim Serbskim muzeju wotmě so wječork z diskusiju wo katolskim serbskim miljeju w zašłosći, přitomnosći a přichodźe. Tomu poda ludowědnik dr. Měrćin Wałda wobšěrnu analyzu.
Na kongresu Europasion w čěskich Hořicach wobdźěli so tež serbska skupina. Mjez druhim předstajichu hosćićeljo wjace hač 36 skupinam z dwanaće krajow tamnišu pasionsku hru.
Wón běše prědar z ćěłom a dušu. Po krótkej ćežkej chorosći bu pater Joachim Wernersbach na předwječoru Božeho ćěła do wěčnosće wotwołany.
Mnohe lěta je Kulowski duchowny tež w Božim domje serbskeje wosady njedźelniše kemše swjećił. Nětko je prelat Karl-Heinz Morawietz w žohnowanej starobje na prawdu Božu wotešoł.
Cistercienski klóšter Marijina hwězda w Pančicach-Kukowje zhladuje lětsa na 775. róčnicu swojeho załoženja. W interviewje powěda abatisa Gabriela Hesse mjez druhim wo wšelakich wužadanjach spočatk 3. lěttysaca po Chrystusu.
Smochčanske kubłanišćo swjateho Bena a Serbski ludowy ansambl přeprošujetej pjatk 30. junija, a sobotu, 1. julija, na Smochčanski hudźbny swjedźeń pod hesłom „Pólskej nocy“. Na woběmaj wječoromaj wustupja orchester, chór a balet Serbskeho ludoweho ansambla zhromadnje z pólskej folklornej brassband Bubliczki.
Na putnikowanje z kolesom přeprošuje Smochčanske kubłanišćo swjateho Bena wšitkich zajimcow wot njedźele, 24. septembra, do njedźele, 1. oktobra. Nawod změjetaj farar Thomas Cech ze Žitawy a Alojs Rječka z Łužnicy.
Serbska protyka
