Katolski Posoł – 18. awgusta 2024
Žadosći za zmysłapołnym žiwjenjom wěnuje so duchowny w swojim zawodnym nastawku. Wón rozłoži, štó zamóže ju na kotre wašnje spokojić.
Po nimale 100 lětach wopušća klarisy wěčneho modlenja Budyšin. Na rozžohnowanskich kemšach klóšterska cyrkej lědma dosahaše.
Wosebitu a wutrobnu zhromadnosć hajichu ewangelscy a katolscy Serbja blisko Budyšina. W Hrubjelčicach přewjedźechu znowa dworowy swjedźeń a swjećachu ekumenisku nutrnosć.
Serbske spěwne ćěleso je „Chór tydźenja“ němskeho nadregionalneho sćelaka. Něhdźe pjećmjeńšinski přinošk wopřija wurězki ze spěwow kaž tež to a tamne wo Serbach a chórje. Wusyłanje je jako podcast w interneće přistupne.
Wo lóštnych překwapjenkach w prózdninach pisataj Hańžka a Feliks na dźěćacej stronje. Ale tež z ptačkami w biblji móža so dźěći zaběrać.
W Njeswačidle su so dźěći z Božej stwórbu zaběrali. Při tym zhonichu tójšto zajimaweho wo ptačkach. Za nje móžachu sej zdobom kukawč natwarić.
Wo swojich dožiwjenjach na katolskim młodźinskim swjedźenju w Bosniskej-Hercegowinje pisa wobdźělnica w swojim přinošku na młodźinskej stronje. Mjez něhdźe 60.000 wobdźělnikami běchu třo Serbja.
„Hana z Hórkow“ rěka nowa serbska literarna twórba Jurja Kocha, kotraž je w Budyskim Ludowym nakładnistwje Domowina wušła. W knize wěnuje so awtor na wuměłske wašnje awtentiskim podawkam před wjace hač wosomdźesat lětami.
Towarstwo Cyrila a Metoda z.t. (TCM) přeprošuje Serbow w starobje něhdźe 35 do 55 lět na zhromadne dny do Prahi. Jězba wotměje so wot póndźele 30. decembra, do srjedy, 1. januara. Silwester chcedźa z čěskimi přećelemi Serbow w Serbskim seminarje swjećić. Přizjewjenja přijimuje Daniela Handrikowa, čłonka předsydstwa TCM, hač do pjatka, 30. awgusta.
Smochčanske kubłanišćo swjateho Bena a załožba Carity w Drježdźansko-Mišnjanskim biskopstwje přeprošujetej we wobłuku rjadu „Smochčanske jewišćo“ na beneficny koncert ze serbskej spěwarku Helenu Hejduškec do tamnišeho domu. Tón budźe njedźelu, 25. awgusta, w 16.00 hodź.
Na zhromadne dny z diplomowym teologu Sebastianom Mutku su wšitcy mužojo wot pjatka do njedźele, 6. do 8. septembra, do benediktinskeho klóštra we Wechselburgu přeprošeni. Přizjewjenja su online móžne.
Pod hesłom „Kreuz und quer“ su młodostni na diecezanske zetkanje młodźiny do Wechselburga přeprošeni. Wone budźe pjatk a sobotu, 13. a 14. septembra, w tamnišim klóštrje. Serbscy wobdźělnicy móža sej tam zhromadnje dojěć. Přizjewić móža so hač do soboty, 24. awgusta, online.
Přichodny seminar k přihotej na sakrament mandźelstwa budźe
pjatk a sobotu, 29. a 30. nowembra, w Smochčanskim kubłanišću swjateho Bena. Přizjewjenja přijimuje Dekanatne dušepastyrstwo młodźiny we Worklecach hač do srjedy, 28. awgusta, online.
Drježdźansko-Mišnjanske biskopstwo přeprošuje wěriwych we wobłuku Swjateho lěta na diecezanske putnikowanje z biskopom Heinrichom Timmereversom do Roma. Wone wotměje so wot soboty do soboty, 11. do 18. oktobra 2025.
Serbska protyka
