Katolski Posoł – 17. julija 2022
W aktualnym wudaću nańdźeće mjez druhim tole:
Rada katolikow a Drježdźansko-Mišnjanske biskopstwo stej na prěni biskopstwowy wobswětowy dźeń na wotpadkowu deponiju do Cröbernja blisko Lipska přeprosyłoj. Mjez druhim zwurazni přednošowar z Mnichowa, što maja wotpadki z teologiskim slědźenjom činić a što měł kóždy jednotliwc regulować.
Wo zakładach wuspěšneho mustwa zhonichu ministranća ze serbskich wosadow na Božej mši w Pěskecach. Praktisce nazhonić móžachu to hnydom po tym při hrach we wobłuku swojeho lětušeho koparskeho turněra.
W Kulowje zhladuje tamniše Arcybratstwo swjateho róžowca lětsa na 350. róčnicu swojeho załoženja. Składnostnje tutoho jubileja ma wustajeńca nastać, za kotruž móža wěriwi wosebite róžowcy abo napisane wosobinske nazhonjenja z modlenjom róžowca na tamnišej farje wotedać.
Katolske a Ewangelske kubłanje dorosćenych Sakskeje woswjećištej w Smochčanskim
kubłanišću swjateho Bena swoje 30lětne wobstaće. Tež kubłanski dom Drježdźansko-Mišnjanskeho biskopstwa sam zhladowaše na tym dnju na jenaku dobu swojeho wobstaća.
Wosebity hobby pěstuje generalny wikar Osnabrückskeho biskopstwa na zahrodźe tamnišeho měšniskeho seminara. Tutej zaběrje wěnuje wón nětko tež knihu a ćehnje w njej paralele k cyrkwi. Awtor přinoška je sej ju předčitał a ju bliže předstaja.
Komu ministranća při wołtarju słuža a kotry nadawk maja wšitcy křesćenjo, to zhonichu wěriwi na Božej mši w Chrósćicach. Na njej rozžohnowachu ministrantkow a ministrantow 8. a 9. lětnika.
Serbska protyka
