Katolski Posoł – 17. decembra 2023
Wo ludźe, kotryž so rozhladuje, pisa serbski duchowny w swojim zawodnym nastawku. Zakład jeho rozmyslowanjow twori modlitwa, kotruž so měšnik na Božej mši přednjese.
Wuměłča z Biskopic je w klóšterskej cyrkwi w Pančicach-Kukowje ze zwukowym koncertom wopytowarjam wokomiki zamyslenja wobradźiła. Wašnje, kak je zynki wuwabiła, je mnohich překwapiło.
Na wobšěrnu dźěławosć nachilaceho so lěta je Kulowske Bratrowstwo na swojej hłownej a wólbnej zhromadźiznje zhladowało. Zdobom wuzwolichu čłonojo nowe předsydstwo.
Drježdźanscy kapałnicy su w Smochčanskim kubłanišću swjateho Bena adwentny koncert wuhotowali. Jich chórowy direktor, zdobom katedralny kapałny mišter, móže sej za znaty hólči chór tež decentralne proby předstajeć.
Seniorojo Njebjelčanskeje gmejny a wosady běchu na zhromadnu adwentničku přeprošeni. Wobrubili su ju šulerjo serbskeje zakładneje šule.
Pod hesłom „Serbski adwent“ wuhotowaše serbska spěwna skupina zhromadnje z dorostowym orchestrom Drježdźanskeho konserwatorija Heinricha Schütza dohodowny swójbny koncert w sakskej stolicy. Nastała běše ideja loni na małych hodownych wikach.
Na mjeztym 12. kulturnu zymu přeprošuje Monika Gerdesowa do swojeje putniskeje hospody w Chrósćicach. Hač do klětušeho februara poskićuje wona wšelake zarjadowanja za dźěći a dorosćenych w serbskej a němskej rěči.
W putniskej hospodźe w Hirschfeldźe budu wot prěnjeje adwentneje njedźele, 3. decembra, hač do swjedźenja Předstajenja Knjeza, pjatk,
2. februara, zaso Bože narodki
wustajene. Cyłkownje poskića 27 wodźenjow po wustajeńcy.
„Žiwy być kaž w paradizu?!“ rěka hesło kubłanskeho dnja, na kotryž přeprošuje dekanatne dušepastyrstwo wšitkich młodostnych a młodych dorosćenych w starobje wot 18 do 30 lět. Wón wotměje so sobotu, 6. januara 2024, w Ewangelskim centrumje za dźěći a młodźinu TiK w Budyšinje. Přizjewjenja přijimuja hač do wutory, 19. decembra.
Dekanatne dušepastyrstwo za dźěći přeprošuje šulerki a šulerjow 5. do 8. lětnika klětu w lětnich prózdninach na jězbu do Lückendorfa w Žitawskich horach. Wona wotměje so wot póndźele do pjatka, 8. do 12. julija 2024. Přizjewjenja přijimuja hač do njedźele, 31. měrca 2024, online.
Seminary k přihotej na sakrament mandźelstwa wotměja so klětu stajnje pjatk a sobotu, 16. a 17. februara, 26. a 27. apryla kaž tež 29. a 30. nowembra w Smochčanskim kubłanišću swjateho Bena. Přizjewjenja přijimuja hač do srjedy, 17. januara.
Worklečanske młodźinske dušepastyrstwo přewjedźe klětu zaso za zajimcow kurs JULEICA. Wukubłanje wobsteji z dweju dźělow a wotměje so stajnje wot pjatka do njedzele z přenocowanjom w Smochćicach. Přizjewjenja přijimuja hač do wutory, 19. decembra.
Serbska protyka
