Katolski Posoł – 16. februara 2025
Wo přikładomaj za ponowjenje cyrkwje pisa serbski duchowny w swojim zawodnym nastawku. Mjez druhim wón wuwjedźe, za čo staj wopisanaj swjataj wažny zakład połožiłoj a za čo móhłoj ludźom dźensa rěčnikaj być.
Hłowna zhromadźizna Towarstwa Cyrila a Metoda wuzwoli po turnusu nowe předsydstwo. Jedyn čłon přisłuša jemu prěni raz.
Při naprašowanju zwěsćichu, zo eksistuje přeco hišće tójšto informaciskich deficitow nastupajo darowanje organow. Katolska cyrkej darowanje zasadnje podpěruje, skedźbnja pak tež na wuměnjenja.
W Smochčanskim kubłanišću swjateho Bena chcedźa po nowych pućach kročić. Mjez druhim chce nowa hotelowa managerka wosebity fokus na zesylnjenje regionalneho splećenja kłasć.
Serbski ewangelski měsačnik změje wot klětušeho nowu redaktorku. Wona pak njebudźe swoje dźěło kaž dotalna zamołwita z Łužicy wukonjeć.
Hańžka a Feliks zhladujetaj na nachilace so prěnje šulske połlěto wróćo a na to, štož staj wšitko dožiwiłoj. Zdobom zhonja dźěći mnoho zajimawostkow kołowokoło swjateju, kotrejuž sej tež Serbja jara česćuja.
Planowany kurs JULEICA w aprylu w Smochčanskim kubłanišću swjateho Bena budźe dwurěčny. Za njón su hišće městna swobodne. Wukubłanje wobsteji z dweju dźělow, je darmotne a wotměje so stajnje wot pjatka do njedźele, 4. do 6. apryla, kaž tež wot 25. do 27. apryla. Přizjewjenja přijimuja online.
Dźěłowe zjednoćenstwo za katolske kubłanje swójbow z.t. (AKF) poskićuje w póstnym času akciju „7 tydźenjow HAJ prajić“. Z tym přeprošuje pory, swoje partnerstwo wosrjedź wšědneho dnja wědomje skrućić. Tež sydomtydźenska wersija za swójby z dźěćimi w zakładnošulskej starobje eksistuje.
Pod hesłom „Chcu ći spěwać
a hrać“ wotměje so wot pjatka
do soboty, 14. do 16. měrca,
wosebite dalekubłanje
na polu cyrkwinskeje hudźby
w Smochčanskim kubłanišću
swjateho Bena. Pod nawodom
tachantskeho kapałneho
mištra Christiana Bonatha
skića dny bohaty kursowy
program za spěwarjow, instrumentalistow
a chórowych na wodow.
Sekcija wěda a skutk Towarstwa Cyrila a Metoda z.t. (TCM) přewjedźe wot póndźele, 29. septembra, do pjatka, 3. oktobra, wulět přez Helfta a Bad Frankenhausen do Heiligenstadta. Wottam poda so skupina na wšelake městna Eichsfelda kaž tež do Göttingena. Zajimcy měli so hač do pjatka, 28. februara, w redakciji Katolskeho Posoła přizjewić, telefonowe čisło (0 35 91) 55 02 10. Zdobom měli potom na konto TCM 200,00 eurow napłaćić.
„Wobchad z palnymi murjemi – wotmjezowanje a mjeza“ rěka hesło lětušeho Ekumeniskeho póstneho seminara w Smochčanskim kubłanišću swjateho Bena. Planowane su wospjet štyri zarjadowanja po štyrjoch póndźelach, kotrež wěnuja so temje ze towaršnostneho, sociologisko-cyrkwinskeho kaž tež bibliskeho wida.
Na poslednim zarjadowanju 13. kulturneje zymy w putniskej hospodźe Moniki Gerdesoweje w Chrósćicach přednošuje sobotu, 15. februara, w 19.45 hodź. Josef Heirich z Königsbrunna k putniskemu pućej w Awstriskej „Der Weg des Buches“. Hižo w 16.00 hodź. poskića hosćićelka serbske dźěćace kino. Wšitcy zajimcy su wutrobnje přeprošeni.
Na serbsku putnisku jězbu do Weserskich horin wot póndźele do štwórtka, 14. do 17. julija, přeprošuje Radworske Šmitec-Schwarzec busowe wozydłownistwo. Duchowny nawod změje farar Gabriš Nawka. Přizjewjenja přijimuja w Radworju, telefonowe čisło (03 59 35) 28 60.
Ambulantna hospicna słužba Hornjołužiskeho zwjazka Carity
z.t. w Kamjencu poskićuje lětsa zaso kurs k čestnohamtskemu
přewodźenju ćežkochorych a mrějacych. Štóž chcył
wukubłanje absolwować, měł so pola hospicneje słužby
Carity w Kamjencu přizjewić.
Serbska protyka
