Katolski Posoł – 15. septembra 2024
Wo dźěłowym graće křesćana pisa serbski duchowny w swojim zawodnym nastawku. Jedyn přirunuje wón ze slědom Jězusoweju nohow, ale tež ruku, kotraž chce wěriweho zepěrać a do wěčneho žiwjenja wjesć.
W Budyšinku su wobydlerjo wsy, hosćo a fachowcy na polu pčołarstwa wuznamneho ewangelskeho fararja a přirodospytnika počesćili. Mjez druhim zhonichu zajimawostki ze swojeho wobšěrneho skutkowanja a sadźichu lipu, kotraž je po nim pomjenowana.
Diecezanski archiw Drježdźansko-Mišnjanskeho biskopstwa w Budyšinje móže dalše historiske wopisma fachowje restawrować dać. Po tym zo běchu loni w pilotowym projekće koncept zapakowanja zdźěłali a prěnje wopisma restawrować dali, móža nětko z projektom pokročować.
Wěriwi ze serbskich wosadow su so lětsa znowa na swjedźenju Marije naroda do Róžanta podali – mnozy pěši w procesionach. Božu mšu swjećachu při lětnich temperaturach na putniskej łuce.
Tři wjerški dožiwichu wěriwi na prěnim nyšporje po lětnjej přestawce w Njebjelčicach. Na nim přijachu někotre dźěći a někotři młodostni wosebite požohnowanje.
Znamjo wěry k Božej česći a wuraz dźaka je serbski duchowny w Chrósćicach poswjećił. Napis ma nimo ducych na postrow dopominać a k tomu pohnuwać, jón časćišo wužiwać.
Na rjane dožiwjenja zhladuja někotři ministranća Chróšćanskeje wosady. Woni buchu na Božej mši ze swojeje aktiwneje słužby rozžohnowani.
Nadawki Budyskeho studija MDR předstaji tamniša nawodnica samostejacym ze serbskich wosadow w Smochćicach. Na přeprošenje Towarstwa Cyrila a Metoda zhromadźichu so woni tam k swojemu nazymskemu zetkanju.
Pod hesłom „Widźomna mnohotnosć“ móža sej zajimcy w Smochčanskej cyrkwi swjateho Bena wustajeńcu wo nabožinach w Sakskej wobhladać. Wona je hač do póndźele, 30. septembra, wšědnje wot 8.00 do 18.00 hodź. wotewrjena, za čas Božich mšow pak nic. Zastup je darmotny.
Wěriwi ze wšitkich serbskich wosadow su přeprošene, njedźelu, 6. oktobra, składnostnje róžowcoweje njedźele do Radworja přińć. Dwurěčna swjedźenska Boža mša, na kotrejž chcedźa Radworske Bratstwo swjateho róžowca wozrodźić, zahaji so w 9.30 hodź. Swjedźenski nyšpor a procesion z postawu swjateje Marije budźe w 14.00 hodź. Wěriwi, kotřiž chcedźa do Radworskeho Bratstwa swjateho róžowca zastupić, měli so na tamnišej farje abo pola fararja Bena Jakubaša přizjewić.
Chór 1. serbskeje kulturneje brigady wuhotuje tutu njedźelu, 15. septembra, w 17.00 hodź. nyšpor w formje duchowneho koncerta w Budyskej cyrkwi Našeje lubeje knjenje. Samsny koncert poskići chór njedźelu, 22. septembra, w 17.00 hodź. w Baćońskej cyrkwi.
Składnostnje 88. narodnin serbskeho spisowaćela Jurja Kocha přeprošujetej Budyske Ludowe nakładnistwo Domowina a Hórčanske wjesne towarstwo „Při skale“ na knižnu premjeru jeho noweje publikacije „Hana z Hórkow“. Wona budźe tutu njedźelu, 15. septembra, w 17.30 hodź. na Smolic statoku w Hórkach.
Dekanatne dušepastyrstwo za dźěći přeprošuje šulerki a šulerjow 1. a 2. lětnika na zhromadny dźeń pod hesłom „Jězus mój přećel“, kotryž wotměje so w nazymskich prózdninach w Don Boskowym domje we Worklecach. Wupytać móža sej, hač so štwórtk, 10. oktobra abo 17. oktobra, wot 9.00 do 15.00 hodź. wobdźěla. Přizjewić měli so zajimcy hač do pjatka, 4. oktobra, online.
Towarstwo Cyrila a Metoda z.t. (TCM), Sportowa jednotka 1922 Radwor kaž tež tamniši młodźinski klub přeprošuja sportowcow wšěch starobnych skupin wot šěsć lět na běh wo pokal zbóžneho Alojsa do Radworja. Tutón wotměje so štwórtk, 3. oktobra. Zajimcy měli so online přizjewić.
Orchester Serbskeho ludoweho ansambla (SLA) wuhotuje zhromadnje ze spěwnymi solistami a z organistom Tomašom Žurom „Portretowy koncert za Ulricha Pogodu & Tomaša Žura“. Wón je tutu njedźelu, 22. septembra, w 16.00 hodź. w Kulowskej cyrkwi Marije donjebjeswzaća.
Drježdźansko-Mišnjanske biskopstwo přeprošuje wěriwych we wobłuku Swjateho lěta na diecezanske putnikowanje z biskopom Heinrichom Timmereversom do Roma. Wone wotměje so wot soboty do soboty, 11. do 18. oktobra 2025.
Serbska protyka
