Katolski Posoł – 15. decembra 2024
Pomjenowanju třećeje adwentneje njedźele – „Gaudete“ (Wjeselće so) – wěnuje so awtor w swojim zawodnym nastawku. Mjez druhim wón rozłoži, kak je to najebać wšelakich wužadanjow móžno.
We wobłuku adwentneho koncerta Drježdźanskich kapałnikow w Smochčanskim kubłanišću swjateho Bena je Drježdźansko-Mišnjanski biskop Heinrich Timmerevers rektora Sebastiana Kieslicha ze zastojnstwa rektora rozžohnował. Z jeho wotchadom dom něšto wažne zhubi.
Drježdźanski komorny chór Ad libitum je w klóšterskej cyrkwi w Pančicach-Kukowje koncert pod hesłom „Adwent“ wuhotował. Ćěleso wobsteji ze spěwarjow, kotřiž maja wot dźěćatstwa nazhonjenja w chórowym spěwanju.
W Baćońskej cyrkwi su druhu adwentnu njedźelu mnozy duši měr a pokoj popřeli. Woni sćěhowachu koncert znateho Drježdźanskeho chóra.
Lětuši beneficny koncert, na kotrymž zběrachu wospjet pjenježne dary na dobro Towarstwa Cyrila a Metoda, wotmě so prěni króć na nowym městnje. Tež klětuši termin je hižo jasny.
Na swoje 25lětne wobstaće zhladowaše Kruh přećelow klóštra Marijineje hwězdy w Pančicach-Kukowje. Zdobom wuhódnoćichu sobustawojo nachilace so lěto.
Nowowuzwolena zapósłanča, kotraž je Alojsa Mikławška w Sakskim krajnym sejmje naslědowała, přednošowaše samostejacym ze serbskich wosadow wo swojim skutkowanju. Zdobom wopyta jich na swojim lětušim poslednim zetkanju wosebity hósć.
Wo žiwjenskich pućach rozmyslowachu młodostni na nyšporje w Njebjelčicach. Tam běchu so k swojej lětušej adwentničce zešli.
Pěstowarnja w dwurěčnej wsy je znowa akciju hodownych pakćikow towarstwa ze sydłom w Smjerdźacej podpěrała. Te je organizator spočatk decembra w kubłanišću wotewzał.
Adwentne wjeselo w zhromadnosći dožiwichu seniorojo serbskeje gmejny a wosady. Mjez druhim bě jich předšulska skupina pěstowarnje z pisanym adwentnym
programom zawjeseliła.
Worklečanske dekanatne dušepastyrstwo za młodźinu je z jednotliwymi młodostnymi wšelake impulsy spřihotowało, kotrež zaběraja so z prašenjemi wěry. K třećej adwentnej njedźeli předstaja studentku teologije Tini Brüning a pokazaja na aktualne wudaće podcasta „Mit Herz und Haltung“ kaž tež film „The Chosen“.
Na pišćelowy koncert z cyrkwinskohudźbnym direktorom Friedemannom Böhme su wšitcy zajimcy do Chróšćanskeje wosadneje cyrkwje přeprošeni. Tón budźe tutu njedźelu, 15. decembra, w 17.00 hodź. Zastup je zadarmo, kolekta budźe za ponowjenje pišćelow.
Třeći adwentny koncert Čěskeje telewizije wotměje so tutu njedźelu, 15. decembra, w 17.30 hodź. w klóšterskej cyrkwi Marije donjebjeswzaća w Oseku. Zastup je darmotny, přiwšěm pak měli zajimcy zastupne lisćiki rezerwować. Koncert přenjesu tohorunja jako livestream.
Pod hudźbnym nawodom Kathariny Dickopf wuhotuje orchester Budyskeho Serbskeho ludoweho ansambla štwórtu adwentnu njedźelu, 22. decembra, w 17.00 hodź. adwentny koncert w Radworskim hosćencu „Meja“. Zaklinča mjez druhim orchestrowe twórby serbskeju komponistow Helmuta Fryče a Jana Rawpa.
Chór Lipa wuhotuje sobotu, 28. hodownika, w 17.00 hodź. swój tradicionelny nyšpor w swětle swěčkow w Róžeńčanskej swjatnicy. Zastup je darmotny. Zběrka po koncerće je lětsa za dźěćacu hospicnu słužbu, kotruž Zhorjelska Křesćanska hospicna słužba organizuje, postajena. Wšitcy su wutrobnje přeprošeni.
Chór Meja přeprošuje wšitkich zajimcow na swój nowolětny koncert, kotryž budźe sobotu, 4. januara, we 18.00 hodź. w Radworskim hosćencu „Meja“. Zabawny program składnostnje 130. róčnicy załoženja spěwneho ćělesa je Jurjej Winarjej wěnowany a je po jeho twórbje „Pilnje dźěłaj – wjes’le spěwaj“ pomjenowany. Přizamknu so reje z DJjom Frankom Wjeselu.
Tradicionalny hodowny koncert Chróšćanskeho cyrkwinskeho chóra budźe njedźelu, 5. januara, w 14.00 hodź. Wšitcy su přeprošeni.
Žiwjenju swjateho Franca Assisiskeho, předstajenemu na sćěnach křižneje chódby něhdyšeho klóštra a nětčišeho kubłanskeho, konferencneho a putniskeho centruma w sewjernej Čěskej, wěnujetaj so awtoraj w nowej publikaciji „SANCTE FRANCISCE ORA PRO NOBIS – Život světce na lunetách hejnického kláštera / Das Leben des Heiligen in den Lünetten des Haindorfer Klosters“. W redakciji Katolskeho Posoła někotre eksemplary předleža, hdźež móža sej zajimcy knihu za 16,00 eurow kupić.
W putniskej hospodźe w Hirschfeldźe su hač do swjedźenja Předstajenja Knjeza, pjatk, 2. februara, zaso Bože narodki wustajene. Mjez tajkimi, kiž słušeja hižo ke krutemu inwentarej, maja tam tež lětsa zaso nowe.
Katolski dźěćacy dom w Budyšinje,
kotryž je w nošerstwje Budyskeje tachantskeje wosady swjateho Pětra, pyta tak spěšnje kaž móžno kubłarja abo socialneho pedagogu. Wuměnjenje mjez druhim je, zo identifikuje so wosoba z pedagogiku Marije Montessori a křesćanskej wučbu.
Spirituelnu zwukowu instalaciju wo psalmje 23 móža wopytowarjo po lěće 2021 znowa w Rakečanskej ewangelskej cyrkwi dožiwić. Wona je hač do njedźele, 2. februara, přistupna. Psalm wo dobrym pastyrju předstajeja w modernym wobdźěłanju a ze swětłowymi efektami. Wopytowarjo smědźa so, na hudźbu słuchajo, po cyrkwi pohibować. Boži dom je wšědnje wot 9.00 do 20.00 hodź. přistupny.
Comic wo influenceru Božim, kotryž ma so bórze swjatoprajić, předleži wotnětka tež w serbskej rěči. Kniha z krutej wjazbu je na wšitkich katolskich farach na předań a płaći 15,00 eurow.
Klětu přeprošuje dušepastyrstwo młodźiny we Worklecach wospjet na seminaraj k přihotej na sakrament mandźelstwa. Wonej wotmějetej so stajnje pjatk a sobotu, 7. a 8. februara kaž tež 28. a 29. nowembra, w Smochčanskim kubłanišću swjateho Bena. Přizjewjenja přijimuje dekanatne dušepastyrstwo hač do srjedy, 8. januara, online.
Worklečanske młodźinske dušepastyrstwo přewjedźe klětu zaso kurs JULEICA. Wukubłanje wobsteji z dweju dźělow a wotměje so stajnje wot pjatka do njedźele, 4. do 6. apryla, kaž tež wot 25. do 27. apryla, w Smochčanskim kubłanišću swjateho Bena, tam z přenocowanjom. Kompletne wukubłanje je darmotne.
Serbska protyka
