Katolski Posoł – 14. januara 2024
Wo dožiwjenju ze studentskeho časa a knize profesora, kotryž sta so pozdźišo z bamžom, pisa serbski duchowny w swojim zawodnym nastawku. Hladajo na ewangelij tuteje njedźele pisa wón zdobom w tym zwisku wo tragice wěry, ale tež, što wěriwych wjaza.
Sakski statny minister Oliver Schenk je w Chrósćicach zastupjerjam Towarstwa Cyrila a Metoda kaž tež jednej z jeho sekcijow wopismo přepodał. Z tym móže so mjezynarodne zarjadowanje klětu prěni króć we Łužicy wotměć.
Zhorjelski biskop Wolfgang Ipolt je noweho Kulowskeho wosadneho fararja pomjenował. Tón naslěduje fararja dr. Wolfganga Křesáka, kotryž je so loni chorosće dla tohole farskeho městna wzdał. Zdobom budźe wot srjedź lěta dalši duchowny w Kulowje skutkować.
W Budyšinje zahajichu katolscy a ewangelscy serbscy wosadni nowe lěto ze zhromadnej hodowničku. Mjez druhim pokazachu dźěći hodownu hru, kotruž běchu hižo patoržicu na swójbnej Božej nocy předstajili.
Zwjazkowy prezident Frank-Walter Steinmeier je zhromadnje ze swojej mandźelskej Elku Büdenbender 50 wosobinow na hrodźe Bellevue w Berlinje na nowolětne přijeće witał. Mjez nimi běše tež Serb.
Dypkownje k swjedźenjej Třoch kralow dóńdźechu tući tež do Božeho narodka pod hołym njebjom w Radworju. Zhotowił běše figury rězbar z Wjelećina.
Serbske a mjezynarodne zynki zaklinčachu na hodownym koncerće chóra Meja w Radworju. Tón běchu wšelake generacije hudźo a spěwajo wuhotowali.
Towarstwo Cyrila a Metoda přihotuje změnu swojich wustawkow. Wo nich ma so na hłownej zhromadźiznje w februarje diskutować. K přirunowanju su paralelnje dotalne, kónc lěta 1998 wobzamknjene wustawki z nowym namjetom wozjewjene.
W Chrósćicach wubědźowaše so pjeć mustwow wo pokal Towarstwa Cyrila a Metoda. Hladajo na snadnu ličbu wobdźělnikow ma turněr zdobom někoho namołwjeć.
Bamž Franciskus je 30 žurnalistow z Němskeje na awdiency přijał, mjez nimi dweju serbskeju. Po krótkej narěči móžeše kóždy wobdźělnik skrótka wosobinsce z hłowu katolskeje cyrkwje porěčeć.
Hodowny koncert Chróšćanskeho cyrkwinskeho chóra wotmě so prěni króć w ponowjenym Božim domje. Mjez druhim so na nim pokaza, kelko talentow tamniša wosada ma.
Na mjeztym 12. kulturnu zymu přeprošuje Monika Gerdesowa do swojeje putniskeje hospody w Chrósćicach. Hač do februara poskićuje wona wšelake zarjadowanja za dźěći a dorosćenych w serbskej a němskej rěči.
W putniskej hospodźe w Hirschfeldźe budu wot prěnjeje adwentneje njedźele, 3. decembra, hač do swjedźenja Předstajenja Knjeza, pjatk,
2. februara, zaso Bože narodki
wustajene. Cyłkownje poskića 27 wodźenjow po wustajeńcy.
Dekanatne dušepastyrstwo za dźěći přeprošuje šulerki a šulerjow 5. do 8. lětnika w lětnich prózdninach na jězbu do Lückendorfa w Žitawskich horach. Wona wotměje so wot póndźele do pjatka, 8. do 12. julija. Přizjewjenja přijimuja hač do njedźele, 31. měrca, online.
Seminary k přihotej na sakrament mandźelstwa wotměja so klětu stajnje pjatk a sobotu, 16. a 17. februara, 26. a 27. apryla kaž tež 29. a 30. nowembra w Smochčanskim kubłanišću swjateho Bena. Přizjewjenja přijimuja hač do srjedy, 17. januara.
Serbska protyka
