Katolski Posoł – 14. apryla 2024
Wo kontakće, za kotryž njetrjebaš wjele słowow abo scyła žane, pisa awtor w swojim zawodnym nastawku. Mjez druhim wón wujasnja, što město toho dosaha, a poda někotre přikłady, kak móžeš kontakt k Bohu nawjazać.
Pod hesłom „Chryst z mortwych stanył je“ běchu šulerjo 1. a 2. lětnika w jutrownych prózdninach na zhromadny dźeń do Worklec přeprošeni. Na najwšelakoriše wašnje zaběrachu so wobdźělnicy z najwažnišim swjedźenjom za křesćanow.
Wo swojim prěnim swjatym woprawjenju pisa šulerka z Radworja. Mjez druhim wona naspomnja, čehodla je wosadny duchowny na swjatočnu Božu mšu tykačku, kabl a kapsnu lampu sobu přinjesł.
Wo stejacym časniku njedawno zemrěteho duchowneho pisa awtor w swojim přinošku. Wón je nětko wosebite městno přišoł.
W dźěłarni swjateho Michała w Pančicach-Kukowje zahajichu spočatk apryla nowy projekt pod hesłom „LOVe“, kotryž přewjedu wospjet zhromadnje z pólskim wokrjesom. Wón wobsteji z třoch pakćikow a ma so hač do lěta 2027 realizować.
Wokoło młodych jutrow zetkachu so serbske ewangelske a konfesiji zwjazowace swójby lětsa znowa w Hainewaldźe. Na kromje Žitawskich horow zaběrachu so tónraz z temu „měr a pokoj“.
Wulkej křesćanskej cyrkwi w Sakskej planujetej w kubłanskim dźěle přichodnje wuske zhromadne dźěło. Zdobom změje Katolska akademija Drježdźansko-Mišnjanskeho biskopstwa wot 1. junija nowu komisarisku nawodnicu.
W přihoće na prěnje swjate woprawjenje běchu dźěći w Ralbicach mjez druhim wo bibliskich stawiznach rozmyslowali. Wo tym pisa šulerka, kotraž je we wosadźe lětsa prěni raz k blidu Božemu přistupiła.
W Kulowskej wosadźe bu před połdra lětom wonječesćeny swjaty křiž znowa poswjećeny. Na nyšporje wobdźěli so nimo wobsedźerjow křiža syła dalšich wěriwych.
Znaty Drježdźanski hólči chór wuhotuje njedźelu, 21. apryla, w 14.00 hodź. nyšpor w Ralbičanskej cyrkwi. Wón wustupi tam prěni raz.
„Pišćele wotewrjene“ rěka akciski dźeń, kotryž budźe sobotu, 20. apryla. Po wšěm Drježdźansko-Mišnjanskim biskopstwje budu tón dźeń pišćele mnohich Božich domow přistupne, mjez druhim w Budyskej tachantskej cyrkwi. Wot 14.00 do 17.00 hodź. změja zajimowani składnosć, sej instrument wobhladać, kotrež tachantski kantor Kamil Maksymilian Kulawik předstaji.
W Kulowskej wosadnej cyrkwi maja hač do wutory, 23. apryla, wustajeńcu wo eucharistiskich dźiwach pod hesłom „Eucharistija je mój puć do njebjes“. Wona złožuje so na zběrku zbóžneho Carla Acutisa z Italskeje, kotryž je jako patron młodostnych a šulerjow jedyn z najbóle česćowanych swjatych swojeho ródneho kraja.
Serbska protyka
