Katolski Posoł – 13. oktobra 2024
Bamž Franciskus je sej tydźenja njedźelu při připołdnišim modlenju „hnydomny přiměr na wšěch frontach“ w Bliskim wuchodźe žadał. Samsny dźeń wječor je so nowy paćer w tutej naležnosći modlił.
Tuchwilu wotměwa so rozsudźaca faza katolskeje swětoweje synody. Jimaca Boža słužba zbudźi při tym wočakowanja za reformowy projekt.
Za Rottenburgsko-Stuttgartsku diecezu je bamž noweho biskopa pomjenował. Tón běše před něšto lětami z hosćom w Serbach.
Vatikan planuje nowy dokument nastupajo žony w cyrkwi. To wozjewi prefekt dikasterija za wučbu wěry, ale dwěluje zdobom, zo hižo na aktualnej synodźe wo tym pozitiwnje rozsudźa.
Z konkretneje modlitwy chcedźa wěriwi duchownu móc čerpać. K tomu su w Radworju stare zhromadźenstwo wozrodźili.
W Blunju su so mnozy za dokumentaciju zajimowali, kotruž je młoda Serbowka z Helmutom Kurjom interviewy wjedła. Wón běše braška w swojim regionje.
Spontanje přistupichu so Drježdźanscy kapałnicy hišće raz k bamžej, jako wón po awdiency samlutki na to čakaše, zo jeho na zahajensku Božu mšu swětoweje synody dowjezu. Do toho spožči wón katolskemu hólčemu chórej oficialnu awdiencu.
Wo myto wojować – předewšěm wo wěčne –, běše namołwa na krótkim nyšporje na spočatku třećeho běha wo pokal zbóžneho Alojsa w Radworju. Najmłódši mjez wjace hač 130 wobdźělnikami su so hakle 2021 narodźili, najstarši je 60ćiny hižo dokónčił.
Wo cyrkej Našeje lubeje knjenje róžowcoweje w emiraće Katar pisa Serbowka. Wona rysuje mały kraj při Arabskim golfje z třomi milionami wobydlerjemi a islamom jako statnej nabožinu, ale tež z 250.000 křesćananami.
Dekanatne dušepastyrstwo
přeprošuje wšitke dźěći,
kotrež so na prěnje swjate
woprawjenje přihotuja,
na zhromadny dźeń srjedu,
20. nowembra, wot 9.00 do
15.00 hodź. do Njebjelčic.
Započatk je z Božej mšu
w cyrkwi. Zajimcy njech so
hač do póndźele, 21. oktobra,
online přizjewja.
Klětu přeprošuje dušepastyrstwo młodźiny we Worklecach wospjet na seminaraj k přihotej na sakrament mandźelstwa. Wonej wotmějetej so stajnje pjatk a sobotu, 7. a 8. februara kaž tež 28. a 29. nowembra, w Smochčanskim kubłanišću swjateho Bena. Přizjewjenja přijimuje dekanatne dušepastyrstwo hač do srjedy, 8. januara, online.
Prěni dźěl přichodneho wukubłanja JuLeiCa, kotrež poskići Worklečanske dekanatne dušepastyrstwo za młodźinu, njebudźe kaž dotal připowědźene klětu w januarje, ale hakle wot pjatka do njedźele, 4. do 6. apryla, w Smochčanskim kubłanišću swjateho Bena. Druhi dźěl wotměje so, kaž planowane, wot 25. do 27. apryla na samsnym městnje. Přizjewjenja přijimuja hač do srjedy, 8. januara, online.
Dwě wosadźe w Pólskej, kotrejž stej wot powodźenja jara sylnje potrjechenej, chce Towarstwo Cyrila a Metoda z.t. (TCM) ze swojej akciju „Łužica pomha“ podpěrać. Kontakt k nim nawjaza wone přez swojeho kruteho partnera w susodnym kraju, prelata dr. Dariusza Kruczyńskeho. Štóž chcył wot powodźenja domapytanu ludnosć podpěrać, njech přepokaza pjenjezy na konto TCM: Cyrill-Methodius-Verein e.V., IBAN: DE 65 7509 0300 0008 2823 66, hesło: „wulka woda“. Štóž sej darowansku kwitowanku přeje, měł swoju adresu podać, pak telefonisce pod čisłom (0 35 91) 55 02 10 pak z mailku na TCM@Posol.de.
Twórby serbskeju komponistow Jurja Pilka a Bjarnata Krawca steja w srjedźišću 1. sinfoniskeho koncerta Budyskeho Serbskeho ludoweho ansambla. Tón budźe njedźelu, 20. oktobra, w 17.00 hodź. na tamnišej žurli.
Na próstwu Towarstwa Cyrila a Metoda z.t. (TCM) poskićuje Norman Reitner z Drježdźanskeho biskopskeho ordinariata kurs k tomu, kak móžeš projekty derje planować a k tomu pjenjezy na wšelakore wašnje požadać. Dalekubłanje na polu sponsoring a foundraising wotměje so sobotu, 9. nowembra, wot 9.00 do 16.00 hodź. na „Radlubinje“ w Ralbicach. Zajimcy – nimo čłonow TCM su tež dalši přeprošeni – měli so online přizjewić.
Towarstwo Cyrila a Metoda z.t. (TCM) chce tež lětsa ze swojej nazymskej akciju „Łužica pomha“ diecezanskemu zwjazkej Carity w pólskim Ełku zaso pomhać. Tam wjesela so nade wšěm, štož w swójbje trjebaš, kaž su to drasta, črije, artikle hygieny a kosmetika za žony a dźěći, ale tež płokanski próšk, kuchinske graty abo pampersy za dźěći runje tak kaž za dorosćenych. Wotedać hodźa so dary pjatk a sobotu, 8. a 9. nowembra, kaž tež pjatk a sobotu, 15. a 16. nowembra. Dokładnišo so to sčasom wozjewi.
Drježdźansko-Mišnjanske biskopstwo přeprošuje wěriwych we wobłuku Swjateho lěta na diecezanske putnikowanje z biskopom Heinrichom Timmereversom do Roma. Wone wotměje so wot soboty do soboty, 11. do 18. oktobra 2025.
Serbska protyka
