Katolski Posoł – 13. nowembra 2022
Kak je z wašej lubosću? Tole praša so awtor čitarjow w swojim zawodnym nastawku. Při tym pokaza wón na swjateho a jeho skutkowanje, kotrehož cyrkej tele dny z wosebitym nyšporom wopomina.
W srjedźišću jězby bamža Franciskusa do Bahraina steještej dialog z islamom a zesylnjenje křesćanow w regionje. Prěni króć na zetkanju zastupjerjow islama a swjateho wótca buchu při tym teksty z biblije a korana zhromadnje přednjesene.
Zetkanja wonkownych ministrow statow G7 dla bu w Měrowej žurli w Münsteru swjaty křiž wotewzaty. To wubudźi kritiku, kotraž tež po zetkanju dale traje.
Berlinski organist Tomaš Žur je kermušny nyšpor w swojej ródnej serbskej wosadźe hudźbnje wuhotował. Na beneficnym zarjadowanju hromadźachu za wobšěrne ponowjenje tamnišich pišćelow.
Poslednjemu kwasej wěnuje so awtorka w swojim přinošku. Mjez druhim předstaja wona jeho pochad a wšelake stare přiwěrki.
Na najwjetšim katolskim twarnišću w Drježdźanach su zakładny kamjeń połožili. Na nim nastanje nowy biskopski ordinariat. Do njeho chcedźa spočatk lěta 2025 zaćahnyć.
Seminar k přihotej na sakrament mandźelstwa wotměje so pjatk a sobotu, 25. a 26. nowembra, w Smochčanskim kubłanišću swjateho Bena. Přizjewjenja přijimuja hač do srjedy, 16. nowembra, online.
Njedźelu Chrysta Krala, 20. nowembra, su wšitcy młodostni na wosebity nyšpor do Chrósćić prošeni. Přizamknje so přednošk a zhromadna swačina.
Klóšter Marijina hwězda w Pančicach-Kukowje pyta za putnisku cyrkej w Róžeńće wosobu, kotraž chcyła nadawki zwóńka a rjedźerskeje mocy přewzać. Zajimcy měli so hač do srjedy, 30. nowembra, přizjewić.
Z podpěranjom ponowjenja Baćońskich pišćelow chce Towarstwo Cyrila a Metoda z.t. (TCM) wšěch katolskich Serbow znowa do zhromadneho skutka wjesć. Ze swojej akciju „Łužica pomha“ chce nimo toho za Caritu w Ełku wěcne dary zběrać.
„Wzajomnje so zrozumić – partnersce komunikować“ rěka kurs za pory, kotrež chcedźa swój poćah skrućić. Wón wotměje so wot pjatka do njedźele, 13. do 15. januara, w Smochčanskim kubłanišću swjateho Bena. Zajimcy měli so hač do pjatka, 3. januara, online přizjewić.
Drježdźansko-Mišnjanske biskopstwo přeprošuje młodostnych a młodych dorosćenych wot 16 do 35 lět na swětowe zetkanje młodźiny do Lissabona. Serbska skupina budźe při tym dźěl diecezanskeje skupiny. Přizjewjenja přijimuja so hač do njedźele, 22. januara 2023, online.
Serbska protyka
